2 Kor 2 - JAM DE NHIALIC 2011

¹ Ku yɛn ë löŋ lueel ë yapiɔ̈u yatök, nɔn cän bï bɛ bɛ̈n tëde week ke ya dhiau piɔ̈u.

² Të cän week tɔ dhiau piɔ̈ɔ̈th, ke eeŋa bï a tɔ mit piɔ̈u, cie yen raan cä tɔ dhiau piɔ̈u?

³ Ku yɛn ë këmanë gäär week, na miäk, të cän bɛ̈n, ke yɛn cïï dhiënëpiɔ̈u duëër yök tëde kɔc bï a dhil tɔ mit piɔ̈u, ku we cä gam wedhie, nɔn cï miɛt de yɛnpiɔ̈u aa miɛt de wepiɔ̈ɔ̈th wedhie.

⁴ Acä gäär week wään wokë pïïu juëc ë yanyin ë këdïït dhal ɛn, ku jiɛthëpiɔ̈u, acie luɔi bä wek piɔ̈ɔ̈th dhiau, ë luɔi bä wek nhiëërdï ŋic nhiëër nhiaar ɛn week awär këriëëc.

Luɔi bïï Raan cï Wäc Pɔ̈l

⁵ Ku na de raan cï kɔc tɔ dhiau piɔ̈ɔ̈th, acie yɛn ë tɔ dhiau piɔ̈u yɛn atök, ee week wedhie we cï tɔ dhiau piɔ̈ɔ̈th ë biäk (ke we cä bï gɔ̈k ë gääk dït).

⁶ Gäŋ cï raanë gɔ̈k ë loi ënɔɔnë, gäŋ cï kɔc juëc e gɔ̈k.

⁷ Ku ënɔɔnë aŋuän nɔn bä wek e pɔ̈l, ku jakï muk piɔ̈u, ke raanë cïï tiëël bï dɔm në dït de jiɛth ë yenpiɔ̈u.

⁸ Yen a läŋ ɛn week, an, bäk bɛ tɔ ŋic nhiëërduön nhiaar wek en.

⁹ En aa gäär ɛn week wään aya, luɔi bän week them aguɔ piɔ̈ndun ŋic, nɔn aa wek këriëëcdï piŋ ëbɛ̈n.

¹⁰ Ku raan bäk päl këdäŋ, ka cä pɔ̈l aya, ku të cän këdäŋ päl raan, ka ye biäkdun week, en aa päl ɛn en ë Kërtho nɔm,

¹¹ ke Catan cïï bï dɛ të bï en wo wöör: ruëënyde acuku kuc, aŋicku.

Paulo ade Piɔ̈u lɔ Toroa

¹² Cöök däŋ, wään cän bɛ̈n Toroa bä wëlpiɛth ke Kërtho bɛ̈n guiir, ago Bɛ̈nydït kueer liëp thok yɛn.

Tiëm në Kueer de Kërtho

¹³ Acïn lɔ̈ŋ cä yök ë yapiɔ̈u, luɔi kɛ̈n ɛn Tito mɛnhkäi yök: aguɔ kɔckë tɔ̈ɔ̈ŋ, guɔ jäl ëtɛ̈ɛ̈n la Makedonia.

¹⁴ Ku thieithieei Nhialic, Raan ë cool ë tɔ wo tiam käŋ ë Kërtho yic, ago atuömde tɔ tiëc në wook ë baai nɔm ëbɛ̈n, atuöm de ŋïny bï kɔc e ŋic.

¹⁵ Wok ee atuöm de Kërtho në këde Nhialic ë kɔc yiic, ayï kɔc kony wëi ayï kɔc mär.

¹⁶ Tëde kɔcke wok ee atuöm ë thuɔɔu a lueel thuɔɔu, ku tëde kɔcke wok ee atuöm ë pïïr a lueel pïïr. Ku eeŋa duëër kacït ë kake lëu?

¹⁷ Ku wook, wo cïï cït tëdïït ë kɔc, kɔc ë jam ë Nhialic riɔ̈ɔ̈k në biäk de wëu: jam yok lueel ee piɔ̈n yic yen aye wok e lueel, ku cït liem de Nhialic, ë Nhialic nɔm yen aye wo jam ë Kërtho yic.