2 Kor 13 - JAM DE NHIALIC 2011

Yöök ku Thiëc Ciëën

¹ Yɛn ë cök aa rou, ku diëŋden kï, bän jɔ bɛ̈n tëde wek. “Në thook ke cäätɔɔ kaarou ayï diäk abï jam lɔ kimpiny ëbɛ̈n.”

² Acä lɛ̈k week wään, ku kan lɛ̈k week tueŋ ënɔɔnë raanrou, cït man nuö yɛn wokë week, ku liu liɛɛu ɛn ënɔɔnë, en agäär ɛn kɔc cï kërac looi ɣɔn, ku gäär kɔc kedhie an, të la yɛn bɛ bɛ̈n, ke we cä bï pɔ̈l.

³ Luɔi kaar wek ŋïny bä wek e ŋic ëgɔk nɔn jiɛɛmë Kërtho ë yathok, ku yen acïï kɔ̈c tëde week, aril aläl ë weyiic:

⁴ acakaa yen ë cï piäät ë tim cï rïïu nɔm kɔ̈u ke kɔ̈c guöp, ka pïïr ënɔɔnë në riɛl dïït ë Nhialic, riɛl nu tëde week.

⁵ Thɛmkï röt nɔn rɛ̈ɛ̈r wek ë gämic ëgɔk, caathkï röt. Kuöckï wegup nɔn nu Yecu Kërtho ë weyiic, të cä wek ee kɔc cï rɛɛc tei?

⁶ Ku ya ŋäth bä wek wo ŋic nɔn cïï wok ee kɔc cï rɛɛc.

⁷ Ku ënɔɔnë yɛn läŋ Nhialic ë biäkdun, ke cïn kërɛɛc bäk aa looi, acie luɔi bï wo tɔ ye kɔc piɛth, ee luɔi bä wek këpiɛth aa looi, na cakaa wok ë ye tɔ cït kɔc cï rɛɛc.

⁸ Wok cïn ater duëërku lueel ë yic, ee män mɛt wok ë yic, en anu.

⁹ Wok ë piɔ̈ɔ̈th miɛt, të ee wok kɔ̈c, ku cöök ee wok lɔ̈ŋ aya, ee luɔi bä wek piɔ̈ɔ̈th dikëdik.

¹⁰ Yen a gäär ɛn kakë ke ya liu ë weyiic, ke we cä bï dhil nen ë nën rac miäk të cän bɛ̈n, ago riɛl cïï Bɛ̈nydït gäm ɛn, ago aa këde yïŋ de käŋ, ku acie këde dhuur ë käŋ piny.

¹¹ Cöök ciëën, mïthëkɔckuɔ, yak piɔ̈ɔ̈th miɛt. Yak piɔ̈ɔ̈th dikëdik, yak wëlpiɛth tiit, yak tɔ̈u në piɔ̈n tök, yak rëër ëdïu: ku Nhialic de nhiëër ku mät abï rëër ke wek.

¹² Thiëckï röt wapäc në ciëm ɣeric.

¹³ Wek thiëëc kɔc ɣerpiɔ̈ɔ̈th kedhie.

¹⁴ Dhuëëŋ de Bɛ̈nydan Yecu Kërtho piɔ̈u, ku nhiëër ë Nhialic, ku määth de Wëidït ɣer, ë ye tɔ̈u kekë week wedhie. Amiin.