2 Kor 12 - JAM DE NHIALIC 2011

Nyuuth ku Nyuöth de Paulo

¹ Yɛn bï rɔt dhil leec, acakaa yen ë cïï piɛth, ku yɛn bï bɛ̈n të nu jam de tïŋ cän Bɛ̈nydït tïŋ ku nyuuth cï en rɔt nyuöth ɛn.

² Yɛn ŋic raan nu ë Kërtho yic, ku run acïk tëëk kathiëër ku ŋuan (nɔn ë ciɛth en kekë guöpde, ku nɔn ë cïï en cath ke yen, a ja kuc, aŋic Nhialic), raanë yen raan wën luɛɛl acï gap nhial ɣeet paan ë Nhialic ya.

³ Yɛn ŋic raan cï lɛɛr Paraditho (nɔn ë ciɛth en kekë guöpde, ku nɔn ë cïï en cath ke yen, a ja kuc, aŋic Nhialic),

⁴ raanë acï gap nhial ɣeet Paraditho, ago wël piŋ wël ë raan pɛ̈n luɛɛl lueel en ke.

⁵ Në këde raan cït ee kënë, en a bän rɔt leec: ku në këdï guöp yɛn cïï rɔt bï leec, ee kɔ̈c kääc ɛn tei, en a bän rɔt leec.

⁶ Ku na cak piɔ̈u dɛ luɔi bän rɔt leec, ke yɛn cïï duëër aa raan mum nɔm, luɔi ee yen yic en bä lueel, ku ënɔɔnë acä pɔ̈l, ke cïn raan bï a tɔ ye raan dït awär tïŋ tïŋ en ɛn, ku wɛ̈ɛ̈r kë cï piŋ në këdï.

⁷ Ku luɔi cän rɔt tɔ dït ë dït cïï piɛth, në biäk de ka juëc göök cï nyuöth ɛn, yen aa yïkë ya guöp kou kon nu ë rïŋic, ee tuny ë tuucë Catan bï yɛn aa biɔ̈ɔ̈k guöp, ke ya cïï rɔt bï tɔ dït ë dït cïï piɛth.

⁸ Guɔ Bɛ̈nydït lɔ̈ŋ në biäk de kënë raandiäk, ke bï jäl ë yaguöp.

⁹ Go lɛ̈k ɛn an, “Dhuëëŋ de yɛnpiɔ̈u ee yï kiët: riɛldiën dït aye tɔ ye dikëdik në kɔ̈c kɔ̈ɔ̈cë raan.” Yen abän rɔt aa leec ke ya mit piɔ̈u aläl në kɔ̈c aa yɛn guöp kɔ̈c, ke riɛldït ë Kërtho bï rëër ë yaguöp.

¹⁰ Yɛn a ya yɛn ë piɔ̈u miɛt ë kɔ̈c kääc ɛn, ku në lɛ̈ɛ̈t ee ya läät, ku në dak aa yɛn dak ë käŋ, ku në yöŋ ee ya yɔŋ, ku në dhäl ee käŋ a dhal, në biäk de Kërtho: kööl kääc ɛn en aye kööl riɛl ɛn.

Diɛɛr de Paulo në Korinthoi

¹¹ Yɛn cï aa raan mum nɔm ë lɛc lɛɛc ɛn rɔt, we cï a dhil tɔ lec rɔt, adï cäk a leec week: acïn kë ye tuuc a wöör acakaa tuuc dïït nu tueŋ aläl, acakaa yɛn ë cïn këdäŋ.

¹² Ŋïny duëërë ye ŋic nɔn aa yɛn tuc ë guɔ looi ë weyiic në yic në guöm de këriëëc ëbɛ̈n, ku në göök ku ka gɛ̈iyë kɔc, ku luɔi ril ëbɛ̈n.

¹³ Ee käŋö kë cï we tɔ kor ë ɣööt ke Nhialic kɔ̈k, ee luɔi ë cän kakun ee cäm lɛ̈ɛ̈ny etök, yɛnguöp, pälkï yɛn ee kë cä wööcë!

¹⁴ Tiëŋkï, yɛn ë cök aa rou tëde week, ku diëŋden kï, yɛn jɔ bɛ̈n, ku kakun acä ke bï aa cäm lɛ̈ɛ̈ny: acie kakun ke kaar, ee wegup wek kaar, acïï piɛth luɔi bï mïth kɔc ë dhiëth ke kuɛ̈t käŋ, ee kɔc ë dhiëth mïth kek aye käŋ kuɛ̈t mïthken.

¹⁵ Ku yɛn bï kakï aa riäär piny ke ya mit piɔ̈u, ku ja rɔt riäär piny aya në biäk de wëikun, ciɛk an, dït nhiëër nhiaar ɛn week ke yen aye nhiëërduön nhiaar wek ɛn tɔ koor.

¹⁶ Në tɔ̈u aya tei, wek kɛ̈n miɛn, ee ruëëny en ë dam ɛn week, en luɛlkï?

¹⁷ De raan töŋ cä tɔ cam week, në kɔc cä tuöc week yiic?

¹⁸ Yɛn ë Tito lɔ̈ŋ an, bï lɔ tëde week, ku ja mɛnhkënëdan däŋ tooc kekë yen ëtök. De kë cï Tito we cam? Ë wo cïï cath ë piɔ̈n töŋë? Ë wo cïï cath ë kueer töŋë?

¹⁹ Cöök däŋ an, yak lueel an, konyku röt ë wenïïm ë caŋawën? Wok jam ë Nhialic nɔm ë Kërtho yic. Ku ka luelku kedhie, wek kɔc nhiaar, ee ka ke kuɛ̈t bï we kueet.

²⁰ Yɛn ë riɔ̈ɔ̈c, miäk, të cän bɛ̈n, ke we cït ka cä bï yök aye kɔc kaar ë yapiɔ̈u, ku yɛnguöp yɛn cït kë cäkï bï yök aye raan kaarkï ë wepiɔ̈ɔ̈th, yɛn ë riɔ̈ɔ̈c ë ciët kë bï dɛ ateer nu, ku tiɛɛl, ku agööth, ku tɔɔŋ, ku ciëk de thok, ku atuum, ku lɛc leec ë kɔc röt, ku awuööu.

²¹ Ku yɛn ë riɔ̈ɔ̈c, miäk, të la yɛn bɛ bɛ̈n, ke Nhialicdï acït kë bï a tɔ yäär ë weyiic, ku yɛn cït kë bï kɔc juëc dhiëëu kɔc cï kërac kɔn looi, ku kënkï kepiɔ̈ɔ̈th puk në luɔidɛn col ku kɔ̈ɔ̈r ee kek diäär kɔɔr ku dhöömden, luɔidɛn rɛɛc ë cïk aa looi.