2 Kor 11 - JAM DE NHIALIC 2011

Paulo ku Tït Alueth

¹ Adï miɛt piɔ̈u të guöm wek tëthiinakäŋ ë piɔl piaal ɛn piɔ̈u: yeka, guömkï tei!

² Yɛn de yic tiɛɛl ë biäkdun, tiɛɛl ë Nhialic: luɔi cän week tɔ thiak ë mony tök, luɔi bän week gäm Kërtho cït man ë dhueny awai.

³ Ku yɛn riɔ̈c, luɔi bï en dɛ të bä wek piɔ̈ɔ̈th riääk, cït man cï kërac Ɣawa math në ruëënyde, aguɔkï piɔ̈ɔ̈th cuö bɛ aa tök, ku cäkï piɔ̈ɔ̈th be lɔ wai në Kërtho.

⁴ Ku na raan bɔ̈ ënɔɔnë, tën ee yen këde Kërtho däŋ guiir, Kërtho kën wo këde guiir, ku të yök wek wëi mɛɛn wëi kɛ̈nkï yök wään, ayï wëlpiɛth mɛɛn wël kɛ̈nkï gam wään, aduɛ̈ɛ̈rkï yiɛ̈n guum apiɛth.

⁵ Ku ë yapiɔ̈u, yɛn kït wokë tuuc ëbɛ̈n, acakaa tuuc dït nu tueŋ aläl, acïn këthiin täu ɛn ciëën.

⁶ Ku na cakaa yɛn ë dɛk ë jam, ka cïn ka dak ɛn në ŋïnydekäŋ, ee yic, kënë acuk cök ë nyuth wok e week në këriëëcic ëbɛ̈n.

⁷ Cä kërac looi, ë kuur cän rɔt kuɔɔr piny, luɔi bï we jat nhial, nɔn cän wëlpiɛth ke Nhialic guiëër week youyou?

⁸ Yɛn ë wëu ke ɣööt ke Nhialic kɔ̈k rum, wään nɔ̈ɔ̈m ɛn ariöp tëde keek, luɔi bän këdun aa looi.

⁹ Ku të wään rɛ̈ɛ̈r ɛn wo week, akööl ë de en kë dak ɛn, acïn raan cä miɛn, në kën ee ya dak, aye mïthëkɔckuɔ yiɛ̈n ɛn abä kuɛth, mïthëkɔckuɔ ë bɔ̈ Makedonia, ku yɛn aaye rɔt muk në këriëëc ëbɛ̈n aguɔ we cuö min, ku yɛn bï rɔt muk ë muŋdï.

¹⁰ Yic de Kërtho acath ke yɛn, acïn raan bï a pɛ̈n lɛc lɛɛc ɛn rɔt në cöökë, piny de Akaya nɔm ëbɛ̈n.

¹¹ Ee käŋö? Ee luɔi cän we nhiaar? Nhialic en aŋic en!

¹² Ku kë luɔɔi ënɔɔnë, yen abä ya looi, luɔi bän kë bï kek röt leec tɛɛm wei tëde kɔc kɔɔr en: ago an, leckï röt, ka bïk röt yök akït ë wook.

¹³ Kɔc cït ee kake kek aye tuuc aluɛth, kɔc ë luui ëcuëër, agokï röt aa puk tɔkï röt ë tuuc ke Kërtho.

¹⁴ Ku acie kake gäi en ee kënë! Catan guöp ee rɔt puk tɔ rɔt ë tuny ë ɣɛɛrëpiny tunynhial!

¹⁵ Ku acie këdït, të ye kɔc ee këde looi röt puk tɔkï röt ee kɔc ë ka ke piathëpiɔ̈u looi, ku këdɛn bïk yök rial abï röŋ ke luɔiden.

Guöm de Paulo ke ye Tuc

¹⁶ A bɛ lueel an, ë cïn raan ë ya tɔ ye raan mum nɔm, ku na yak a tɔ ye raan mum nɔm, ke we dɔm ɛn tei, cït man ë raan mum nɔm, ke ya bï rɔt leec tëthiinakäŋ.

¹⁷ Kë luɛɛl ënɔɔnë, acie këde Bɛ̈nydït en a lueel ɛn en, ku ja rɔt leec aya, ke ya cï nyin riɛl.

¹⁸ Ënɔn juëc ë kɔc ee röt leec në këde guöp, ke yɛn aya yɛn bï rɔt leec.

¹⁹ We ŋic këde kɔc mum nïïm guum, luɔi aa wek kɔc pel nïïm.

²⁰ Të ye raan week lïïm, ayak guum, ayï të ciɛmë raan week, ayï të rumë raan week, ayï të biëëkë raan wenyïïn.

²¹ Yɛn jam ee jam ë raan cïn naamde, acït man kɔ̈c wok. Ku na de kë bï raan e nyin riil, (yɛn jam ë jam ë mumënɔm), ke yɛn cï a nyin riil aya.

²² Kɔckë yek Ɣeberuu? Ayï yɛn aya. Yek kɔc ke Yithriɛl? Ayï yɛn aya. Yek kɔ̈th ke Abraɣam? Ayï yɛn aya.

²³ Yek kɔc ë ka ke Kërtho looi? (Yɛn jam cït raan jiɛɛm wei) awäär ke, ë luɔi tuc, en awäär ɛn keek, ku wäär keek ë dui cïï duëërë kueen, ku mäny ee ya cool ë mɛcë yɛn ë aloc yiic, ku ŋïny aa yɛn cool ë ŋïc rɔt thuɔɔu.

²⁴ Tëde Judai yɛn aa dui raandhïc ë wɛt kathiërŋuan a lɔ tök liu.

²⁵ Yɛn aa dui ë thieec raandiäk, ku biöökë yɛn ë kur raantök, yɛn aa tukë wei abëlic raandiäk, wɛ̈ɛ̈r tök ku cool tök ke ya tɔ̈u ë pïïuwiic.

²⁶ Awäär ke në keny aa yɛn cool ë keny, ku riɔ̈ɔ̈c wïïr, ku riɔ̈ɔ̈c de kɔc ee kɔc luc, riɔ̈ɔ̈c ë jurda, riɔ̈ɔ̈c ë juöör, riɔ̈ɔ̈c nu ë pänydïtic, riɔ̈ɔ̈c nu ë jɔ̈ɔ̈ric, riɔ̈ɔ̈c nu ë wɛ̈ɛ̈ric, riɔ̈ɔ̈c nu ë mïthëkɔckuɔ cuɛ̈ɛ̈r yiic.

²⁷ Në luɔi tuc ë kɔc doony, ku luɔi ë kɔc nɔ̈k, në ruu aa yɛn ruu yiɛ̈n ëcaŋɣɔn, ku në cɔŋ ë ya nɔ̈k ayï rou, ku në nyäŋ aa yɛn cool ë nyäŋ rɔt ë këcam, ku në wiir ë ya nɔ̈k, ku cïn aa yɛn kɔ̈u ciën lupɔ.

²⁸ Jakï kakë pɔ̈l, ee ka nu biic tei, lɔ kën ee ya miɛn piɔ̈u ë aköölnyïïn kedhie, yen aye diɛɛr aa yɛn piɔ̈u diɛɛr ë ɣööt ke Nhialic kedhie.

²⁹ Eeŋa kɔ̈c, ku cä kɔ̈c ayadäŋ? De raan cï tɔ wäc käŋ, ku cä piɔ̈u bï tuöc?

³⁰ Na de kë bän rɔt dhil leec, ke yɛn bï rɔt leec në kak aa yɛn ke kɔ̈c ë ke.

³¹ Nhialic Wun Bɛ̈nydan Yecu Kërtho, yen aŋic en nɔn cän lueth tör, yen acath ke athiɛɛi aɣet athɛɛr.

³² Bɛ̈ny ë Damathko bɛ̈ny nu ë melik Areta cök aaye pänydït ë Damathko tɔ tit, akɔɔr luɔi bï en a dɔm.

³³ Ku yɛn aa luɛɛiyë piny ë diönyic ë awëërnyin, awër nu ë päny kɔ̈u, aguɔ ban në yecin.