2 Kor 10 - JAM DE NHIALIC 2011

Paulo Akony Luɔide

¹ Ku yɛn Paulo guöp, wek yɔ̈ɔ̈k në kuur cï Kërtho rɔt tɔ koor ku në liɛɛr ë yenpiɔ̈u, yɛn raan cïn naamdï ë weyiic të wɔi wek ɛn, ku nɔn liɛɛu ɛn, yɛn cï nyin riɛl tëde week:

² ku wek a läŋ, duökï ya tɔ ŋeeny të nuö yɛn, në ŋeeny cä lueel an, bä kɔc kɔ̈k dhil ŋɛ̈ny kɔc ee jam ë wook an, yok rëër ë rëër ë guöp tei.

³ Ku na cakku rëër ë guöpic, ke wo cï tɔŋ ee biök ë biök de guöp

⁴ Wëukuɔn ke tɔŋ acïkï ee ka ke guöp, ayek riɛl ëtör ë Nhialic nɔm, bïk alocdït ril aa dhuöör piny,

⁵ ayek lööŋ rac dhuöör piny, ayï këriëëc nu nɔm nhial ëbɛ̈n, kak ee rɔt jɔt ku cakkï ater në ŋïny de Nhialic, ku jɔku kë yok tak ë wopiɔ̈ɔ̈th ëbɛ̈n tɔ ye lïm bï këde Kërtho aa piŋ.

⁶ Ku buk röt dap guöör ë reec reecë kɔc pïŋ ëbɛ̈n, të cä wek guɔ thök ë pïŋ piɛŋ wek käŋ.

⁷ Yak käŋ woi në këde tïc ee kek tïc biic? Na de raan ŋic rɔt nɔn ee yen këde Kërtho, ë be cöökë thɔ̈ɔ̈ŋ ë yepiɔ̈u aya an, Acït man ee yen këde Kërtho, yen aye wok aa ka ke Kërtho ayadäŋ.

⁸ Ku na ya cak rɔt leec aläl në riɛlda (riɛl ë gëmë Bɛ̈nydït wook në këde kuɛ̈t bï wo week kueet, ku acie këde thuur bï wo we thuöör piny) ke yɛn cïï duëër yäär.

⁹ Ku yɛn cïn piɔ̈u luɔi bän we tɔ riɔ̈c në awereek.

¹⁰ Ade kɔc ee ye lueel an, “Kakɛn cï gɔ̈ɔ̈r aciɛthkï në löŋ thiek, ku rilkï, ku täu de yenguöp akɔ̈c, ayï jamde acïn nɔm!”

¹¹ Raan luel en aya, tɔ ciët enɔm ë kënë an, täu tɔ̈u wok ë jamic ku në kacïgɔ̈ɔ̈r yiic të liiu wok, yen aye täu bï wo tɔ̈u ë luɔi yic aya të nu wok.

¹² Ku wo cïï woyiic duëër mat në kɔc kɔ̈k kɔc ee röt leec kapäc, ku cuku röt duëër thɔ̈ɔ̈ŋ ë keek aya: ku keek, thëm ee kek röt them kapäc, ku thööŋ ee kek röt thɔ̈ɔ̈ŋ kapäc, acïn kek nïïm.

¹³ Ku wook, wo cïï röt leec abuk akeu lïïr nɔm, wo bï pëk ë akeu nɔm aken ë thëm cï Nhialic yiɛ̈n wook, aken cï ɣet tëde week aya.

¹⁴ Wo kën akenda lïïr nɔm, cït man kën wo ɣet tëde week: wok ë ɣet tëde week aya në guiëër ee wok wëlpiɛth ke Kërtho guiir:

¹⁵ wo cïï röt duëër leec ë ka nu ë akenda baŋtui, kek aye luɔi ë looi kɔc kɔ̈k, ku kënë aŋäthku an, të cï gämdun rɔt guɔ ŋuak, ke riɛlda bï dït ë weyiic, ku ŋootku ke wo pëk akenda, agoku lɔ tueŋ.

¹⁶ Ku jɔku wëlpiɛth guiir ayï bɛ̈i nu ë wenïïm tueŋ, ku cuku röt ee leec në luɔi cï raan däŋ kɔn looi, luɔi cuk yök ë thök.

¹⁷ Cït man cï këcïgɔ̈ɔ̈r ye lueel an, “Ku raan ee rɔt leec, ë ye rɔt leec ë Bɛ̈nydïtic.”

¹⁸ Acie raan lec rɔt etök yen piɛth ëgɔk, ee raan leec Nhialic yen apiɛth.