2Tim 4 - JAM DE NHIALIC 2011

¹ Yïn cök ë than ɛn yïn ë Nhialic nɔm, ku Bɛ̈nydït Yecu Kërtho nɔm, raan bï löŋ de kɔc guiir kɔc pïïr ku kɔc cï thou, kööl bï en tuöl ku tul ciɛɛŋde,

² an, Ye jam guiir, ye yic lɛ̈th ë luɔi ëkööl piɛth, ayï kööl rac: ye kɔc jɔ̈ɔ̈ny, ye kɔc nen, ye kɔc riit piɔ̈ɔ̈th, ke yï lirpiɔ̈u ë thuaat në wëët ee yïn kɔc wɛ̈ɛ̈t.

³ Ade kööl bï bɛ̈n, kööl cïï kɔc wëët piɛth bï guum, abïk yith aa yilëyil, agokï röt kuöt kɔc bï keek aa wɛ̈ɛ̈t ë kë röŋ në ŋɔ̈ɔ̈ŋ ee ke dɔm.

⁴ Ku abïk keyïth wɛl wei në yicic, yiɛlkï röt të nu päär ë kɔ̈ɔ̈r.

⁵ Ku yïn, ye röt tiit ë këriëëcic ëbɛ̈n, ye katuc guum, ye luɔi de raan ee wëlpiɛth guiir looi, ku jɔ luɔidu tiiŋic ëgɔk.

⁶ Yɛn ë thiɔ̈k wo luɔi bï a lam ënɔɔnë, ku kööl ë jäldï ë guɔ thiɔ̈k.

⁷ Yɛn ë biök ë biök piɛth, tëdiën an, bän lɔ pëk ë riŋ acä thöl, yɛn ë gäm ŋiëc döt.

⁸ Ku ënɔɔnë ade göl ë dhuëëŋ cï täu ɛn, göl ë piathëpiɔ̈u, göl bïï Bɛ̈nydït gäm ɛn ëköölë, Bɛ̈ny ee löŋ ŋiëc guiir apiɛth: ku acie yɛn a tök, abï gäm kɔc cï tïcde nhiaar kedhie ayadäŋ.

Wël ke Yenguöp

⁹ Cök ë them yïn bɛ̈n bï yïn dap bɛ̈n të nuö yɛn.

¹⁰ Demath acï a päl wei, në nhiëër cï en pinyë ënɔɔnë nhiaar, ago jäl le Thethalonika, ku lɔ Kerethke Galatia, ku lɔ Tito Dalmatia.

¹¹ Ee luk etök en a rɛ̈ɛ̈r ke yɛn. Nöm Mak, bä wekë yen, ee raan duëër a kony ë luɔi.

¹² Ku Tukiko acä tuɔɔc Epetho.

¹³ Alulut de wiir wën cä nyääŋ piny Toroa tëde Karpo, të bï yïn, ke luɛ̈thë ya, kekë awereek, ku awereek lɔ reprep kek akaar aläl.

¹⁴ Alekandaro thänh ë maläŋ acï a luöi kërac aläl: abïï Nhialic tɔ yök këdɛn rɔ̈ŋ ke luɔide.

¹⁵ Ayïk yïn, ye rɔt tiit ë yen aya, ee ater dït cak kekë wëlkuɔ.

¹⁶ Kööl ë kan ɛn këdï lueel ë göönyic, acïn raan ë kɛ̈ɛ̈c wok ëtök, yɛn cïï kɔc päl wei kedhie. Ë cïï tɛ̈ɛ̈uwë ë keyiëth!

¹⁷ Ku Bɛ̈nydït yen aa kääc ë yalɔ̈ɔ̈m, ago a tɔ ril piɔ̈u, luɔi bï jam thök ë guiëër ë yathok, ago Juöör piŋ ëbɛ̈n: ku yɛn cï luäk bei ë köör thok.

¹⁸ Ku Bɛ̈nydït abï a luök ë luɔi racyic ëbɛ̈n, ku jɔ a muk aɣet ciɛɛŋdɛn nu paannhial. Ë dhuëëŋ ë ye tɔ̈u kekë yen aɣet athɛɛr ya! Amiin.

Thiëc Ciëën

¹⁹ Thiëc Perithika kekë Akula, ku dhiën ë Onethiporo.

²⁰ Erathato acï döŋ Korinth: ku Toropimo acä nyääŋ Mileto ke de guöp juäi.

²¹ Cök ë them yïn bɛ̈n bï yïn bɛ̈n të ŋootë rut wei. Yïn thiëëc Yubulo, ku Puda, ku Lino, ku Kalaudia, ku mïthëkɔckuɔ kedhie.

²² Ë Bɛ̈nydït Yecu Kërtho ë ye tɔ̈u ke wëiku. Ë dhuëëŋdepiɔ̈u ë ye tɔ̈u ke week wedhie Amiin