2Tim 3 - JAM DE NHIALIC 2011

Akööl Ciëën

¹ Jɔ kënë ŋic an, të cï thök de piny thiɔ̈k, ke akööl rac bï kɔc dhal abïk bɛ̈n.

² Kɔc abï ŋɛk ke rɔt aa nhiaar, ku nhiaar ŋɛk rɔt, ku bïk aa kɔc nhiaar wëu, kɔc ee röt leec, kɔc ee röt tɔ ye adhuëŋ, kɔc ee lɔ̈t, kɔc ee ka ke kɔc ë dhiëth keek rɛɛc piŋ, kɔc ee thieithieei rɛɛc lueel, kɔc cïï piɔ̈ɔ̈th ɣer,

³ kɔc cïï kɔcken ee nhiaar, kɔc reec mät, kɔc ee atuum caath, kɔc kuc röt muk, kɔc gäi piɔ̈ɔ̈th, kɔc cïï këpiɛth ee nhiaar,

⁴ kɔc ee kɔc nyiɛɛn, kɔc ril nïïm ëtör, kɔc ee röt tɔ dït, kɔc nhiaar këmit ë kepiɔ̈ɔ̈th awär nhiëër nhiɛɛr kek Nhialic,

⁵ kɔc ee röt tɔ cït ka cath në riëëu de Nhialic, ku yek riɛlde jai. Ye rɔt yal wei ë kɔckë lɔ̈m.

⁶ Kɔc kɔ̈k ë keyiic ee kɔc ee lɔ ɣööt ke kɔc yiic, lek diëër piɔl piɔ̈ɔ̈th rum piɔ̈ɔ̈th, diëër juëc ë karɛckɛn cïk wööc, ku yek ke thɛl wei në ŋɔ̈ɔ̈ŋdɛn ë ke dɔm ŋɔ̈ɔ̈ŋ de këriëëc,

⁷ diëër ee cool ë piööcë ke, ku cïkï ŋïny de yic duëër yök ananden.

⁸ Ku acït man ɣɔn lueelë Jane ku Jambere lueel kek ater në Mothe, yen acït luɛl ee kɔckë ater lueel në yic aya, ee kɔc cï nïïm riääk ëtaiwei, ku cï ke tɔ cïn naamden në këde gäm.

⁹ Ku acïkï bï bɛ lɔ tueŋ: cïn cïn kek nïïm abï tïc ë kɔc nïïm kedhie, acït man ɣɔn tïc ë cïn cïnë kɔckë nïïm aya.

Wëët Ciëën

¹⁰ Ku yïn, cï wëëtdï ŋic ëgɔk, ku ŋic täu aa yɛn tɔ̈u, ku kë nu ë yapiɔ̈u, ku gämdï ku guöm aa yɛn käŋ ŋiëc guum, ku nhiëërdï, ku liɛɛr ë yɛnpiɔ̈u,

¹¹ ku yöŋ ee ya yɔŋ, ku katuc cä guum, ka cä yök ë Antiokia, ku Yikoniom, ku Luthera, yöŋ ë yɔŋë yɛn ëtɛ̈ɛ̈n: ku Bɛ̈nydït acï a luök ë keyiic kedhie.

¹² Yeka, ku kɔc kedhie kɔc ee nyïïn riɛl an, bïk aa rëër ë Kërtho Yecuyic ke ke riëëu Nhialic, kek abï dhil yɔŋ.

¹³ Ku kɔc racpiɔ̈ɔ̈th ku kɔc ee käŋ töör, racden abï lɔ ke ŋuak rɔt, abïk kɔc aa math, ku mɛthë keek aya.

¹⁴ Ku yïn, ye tɔ̈u ë käŋ yiic ka cï yï wɛ̈ɛ̈t ë ke, ku cï ke ŋic ëgɔk, luɔi ŋic yïn raan ë wëët yïn ë ke,

¹⁵ ku ŋic kënë aya an, ɣɔn ee yïn mɛnhthiinakäŋ, yïn ë ŋic kacïgɔ̈ɔ̈r kaɣer yiic, ka cath në riɛl bïk yï tɔ ye raan pelnɔm aɣet kuny bï yï kony wëi në gäm cï yïn Kërtho Yecu gam.

¹⁶ Këcïgɔ̈ɔ̈r ëbɛ̈n ee kë cï Nhialic tɔ bɔ̈ në Wëike, ku ade naamde në këde wëët, ku jäny, ku kïït ee käŋ kiɛt piny, ku piööc në piathëpiɔ̈u:

¹⁷ ke raan de Nhialic bï piɔ̈u aa dikëdik, ku jɔ röŋ në luɔi piɛth ëbɛ̈n.