2Tim 2 - JAM DE NHIALIC 2011

Raan de Tɔŋ Adöt

¹ Yeka mɛnhdï, ye riɛl në dhuëëŋdepiɔ̈u nu ë Kërtho Yecuyic.

² Ku ka cï piŋ tëde yɛn ë cäätɔɔ juëc nïïm, jɔ ke yiɛ̈n kɔc adööt, kɔc bï kɔc kɔ̈k lëu në wëët aya.

³ Ku yïn, ye këril guum cït man ë raan de tɔŋ piɛth raan de tɔŋ ë Yecu Kërtho.

⁴ Acïn raan ee luui ke ye raan de tɔŋ ee rɔt nääi ë ka ke pïïrë, luɔi bï en raan ë tɛ̈ɛ̈u en ë luɔi de tɔŋic tɔ mit piɔ̈u kekë yen.

⁵ Ayï raan ee wït, acïï bï yiëk nɔm göl, të kën en wït në këde löŋ de wït.

⁶ Raan ee luui domic yen abï dhil kɔn dɛ këde në ka cï luɔk.

⁷ Ye yïnɔm tak në ka luɛɛl, ku Bɛ̈nydït abï yï gäm ŋïnydekäŋ në këriëëc ëbɛ̈n.

⁸ Ye yïnɔm cät në Yecu Kërtho, raan cï jɔt ë kɔc cï thou yiic, raan ë bɔ̈ në käu de Debid, acït man cï wëlkiën piɛth e lueel.

⁹ Kek wëlpiɛth aa yɛn këtuc guum në biäkden aɣët mäny mɛcë yɛn, acït man ë raan cï kërac looi, ku jam ë Nhialic acie mac.

¹⁰ Yen a ya yɛn këriëëc guum ëbɛ̈n në biäk de kɔc cï lɔc, ke ke bï kunydewëi yök aya kuny nu ë Kërtho Yecuyic kekë dhuëëŋ bï tɔ̈u aɣet athɛɛr.

¹¹ Jam yic bï dhil gam ka an: “Të cï wok thou në yen ëtök, ke wo bï pïïr ëtök.

¹² Të ye wo käŋ guum, ke wo bï piny cieŋ në yen ëtök. Të jiɛi wok en, ka bï wo jai aya.

¹³ Të cïï wok ee kɔc adööt, ka ye tɔ̈u ke ye Raan adöt, acïï rɔt ee lëu ë jiɛi.”

Raan Ŋic Lui

¹⁴ Ye keek täk nïïm ë kakë, ku ye cök ë yöök yïn ke ë Bɛ̈nydït nɔm, ke ke cïï wël bï aa tɛɛr ë teer cïn këpiɛth ee yök thïn, teer ee kɔc pïŋ riɔ̈ɔ̈k piɔ̈ɔ̈th.

¹⁵ Cök ë them yïn rɔt ë gɛm bï yïn rɔt gäm Nhialic, ke yï bï tɔ ye raan piɛth, raan ee käŋ looi ke cïï yäär, raan ee jam de yic ŋiëc tek.

¹⁶ Ku yïn bï rɔt tɔ̈ɔ̈u pei ë jam ë dhɔ̈ɔ̈n jam ɣɔ̈ric cïnic riëëu: jam cït ee kënë abï lɔ ke lɔ, ago reec ee kɔc Nhialic rɛɛc go rɔt ŋuak.

¹⁷ Jamden abï cool ë cäm cït man ë tëtök de pajii. Kɔckë adekï yiic yï Kumenayo ku Pileto.

¹⁸ Kɔc cï këde yic wööc, ayek lueel an, cï jön ee kɔc röt jɔt guɔ wan, agokï gäm de kɔc kɔ̈k riɔ̈ɔ̈k.

¹⁹ Na cak kɔc e looi aya, ke këërkëër ë wec Nhialic akääc, ke cïï wiëëk, acï gäär kɔ̈u cöökë an, “Bɛ̈nydït aŋic kɔc cï aa kɔcke.” Ku cöökë aya an, “Raan ëbɛ̈n raan ee Kërtho cɔɔl rin ë nyaai ë luɔi de këracic.”

²⁰ Ku ɣöndïït ë bɛ̈ny adeyic töny ee käŋ muk, ku acïkï ee kak ë cuëc ë adhääp ku ateek kapäc, ku adeyic kak ë cuëc ë tim, ku tiɔp ayadäŋ, ku kɔ̈k ee ka ke dhuëëŋ, ku kɔ̈k acïkï ee ka ke dhuëëŋ.

²¹ Ku raan ee rɔt waak në ka cïï piɛth, yen abï aa töny de dhuëëŋ, töny ɣeric, ku piɛth në luɔi de bɛ̈ny, ku ye röŋ ke luɔi piɛth ëbɛ̈n.

²² Ye kat ë karɛc kɔɔr dhuök: ku ye piathëpiɔ̈u cop, ku cop gäm, ku nhiëër, ku mät, në kɔc ëtök kɔc ee Bɛ̈nydït cɔɔl në piɔ̈n awai.

²³ Ku ye lop ɣɔ̈ric rɛɛc, lop ë kɔc kën wëët lop, aŋic nɔn ee kek ateer bɛ̈ɛ̈i.

²⁴ Ku lïm de Bɛ̈nydït acïï piɛth luɔi bï en teer, abï dhil aa jam ë määth kekë kɔc kedhie, abï aa raan ŋic wëët, raan lir piɔ̈u,

²⁵ raan ee kɔc luel ater wɛ̈ɛ̈t ë piɔ̈n lir, nɔn de të bï Nhialic ke gäm puŋdepiɔ̈u, agokï yic gam,

²⁶ ku jɔkï pääc bïk bei ë wïn ë jɔŋdït racic, kek kɔc wään cï dɔm, bïk këde Nhialic piɔ̈u aa looi.