2 Jɔn 1 - JAM DE NHIALIC 2011

¹ Yɛn monydït awerek en gäär tiiŋ dïït cï lɔc kekë mïthke, kɔc nhiaar në yic, ku acie yɛn a tök, ee kɔc cï yic ŋic kedhie aya,

² në baŋ de yic, yic ë tɔ̈u në woyiic, ku bï aa tɔ̈u ke wook aɣet athɛɛr:

³ Ë dhuëëŋdepiɔ̈u ë ye tɔ̈u kekë week, ku kokdepiɔ̈u, ku mät, në ke bɔ̈ tëde Nhialic Wääda, ku tëde Yecu Kërtho, Wën ë Wääda, në yic ku në nhiëër.

Yic ku Nhiëër

⁴ Yɛn ë piɔ̈u miɛt aläl luɔi cän mïthkuön kɔ̈k yök aciɛthkï ë yicic, acït man cï wo löŋ yök tëde Wääda.

⁵ Ku yïn läŋ ënɔɔnë, yïn tiiŋdït, ku yïn cïï cït kë gäär löŋ cï piac bɛ̈ɛ̈i, ee löŋ ɣɔn cath ke wook të ɣɔn gɔlë jam, yen gäär, an, buk röt aa nhiaar.

⁶ Ku cäth ee wok cath ë lööŋke cök, yen aye nhiëër. Löŋ kï, cït man cä wek e piŋ të ɣɔn gɔlë jam, an, bäk aa cath thïn.

⁷ Kɔc juëc ee kɔc math acïk bɛ̈n cath ë piny nɔm, kɔc reec Yecu Kërtho gam nɔn ë bïï yen ke ye raan guöp. Raan ee kɔc math kï, ku ye raan man Kërtho.

⁸ Yak röt tiit, ke wo cïï ka cuk looi bï mɔ̈ɔ̈r, ke wo bï ariöp yök ëbɛ̈n acïn kë liu.

⁹ Raan ëbɛ̈n raan ë löŋ wööc, ku reec rëër ë wëët de Kërthoyic, ka cïn nɔm Nhialic: ku raan ee rëër ë wëët de Kërthoyic, yen ade nɔm Wääda ku Wënde aya.

¹⁰ Na bɔ̈ raan tëde week, ku cïï wëëtë bïï, ke duökï gam ɣöndun, ku duökï lëk thieithieei.

¹¹ Raan lëk en thieithieei, ka mät kekë yen në luɔidɛn rac.

Wël Ciëën

¹² Yɛn de kajuëc duɛ̈ɛ̈r gäär week, ku yɛn cïn piɔ̈u gäär bän awerek gɔ̈ɔ̈r në miök ë gäär: ee bɛ̈n bän bɛ̈n tëde week, yen ŋääth, agoku jam ke wo tuum wonïïm, ke wo bï piɔ̈ɔ̈th a yum ë miɛtëpiɔ̈u.

¹³ Yïn thiëëc mïth ke nyankui cï lɔc.