1 Tim 6 - JAM DE NHIALIC 2011

¹ Lïïm ëbɛ̈n lïïm cï mac yiëth, ë ke ye bänyken gup tɔ de naamden, bïk keek aa riëëu apiɛth, ke rin ke Nhialic ë ke cïï bï aa läät, ku cïï wëët ee läät aya.

² Ku lïïm de nïïm bänykɛn cï gam, ë ke cïï keek ee biɔɔn, luɔi ee kek mïthëkɔcken, aŋuän bï kek ke ya luööi apiɛth, luɔi ee kek kɔc cï gam kɔc nhiaar, ku yek piath ë wëlpiɛth rɔm ëtök. Ye kɔc wɛ̈ɛ̈t ee kakë ku guiëërë ke keek.

Wëët Rac ku Kuɛth Yic

³ Na de raan ee wëët ë wëët mɛɛn pei, ku reec wël piɛth gam, wël ke Bɛ̈nydan Yecu Kërtho, ku reec wëët ee röŋ ke riëëu de Nhialic gam,

⁴ ka ye rɔt tɔ dït, acïn kë ŋic, ku ye raan ee jiɛɛm wei në thiëc ɣɔ̈ric ku teer ë wël, ku jam cït ee kënë ee tiɛɛl bɛ̈ɛ̈i, ku bïï ater ku lɛ̈ɛ̈t, ku meek rɛɛc ee kɔc kenyïïn mɛɛk,

⁵ ku bïï lööŋ ɣäär yiic lööŋ ke kɔc cï piɔ̈ɔ̈th riääk, kɔc cïn yic cath ke keek, kɔc ee ye lueel an, Riëëu ee raan Nhialic riëëu ee kueer bï kake ŋuak nyïïn: ratë rɔt wei ë kɔc cït ee kakë lɔ̈m.

⁶ Ku riëëu de Nhialic kekë ayum de piɔ̈u yen aye ŋuäŋ de käŋ ëgɔk.

⁷ Acïn kë cuk bɛ̈ɛ̈i ë piny nɔm, ku aŋicku ëgɔk nɔn cïn en kë duëërku lɛɛr.

⁸ Ku ënɔɔnë, të de wok këcam ku lupɔɔ ceŋku, ke wo bï piɔ̈ɔ̈th a yum ë keek.

⁹ Ku kɔc kɔɔr luɔi bï kaken juëc ayek lööny ë thëmic, ku löönykï ë bɔi yic, ku ye ŋɔ̈ɔ̈ŋ ke dɔm ŋɔ̈ɔ̈ŋ ë kajuëc ɣäär yiic, kak ee kërac bɛ̈ɛ̈i, ku yek kɔc thɛl ë riääkic tɔkï ke mär ë taiwei.

¹⁰ Nhiëër ë wëu ee mei de këriëëc rac ëbɛ̈n: aye kɔc kɔ̈k woi ë kepiɔ̈ɔ̈th, ago ke cɔ̈k nïïm wei ë gämic, ku jɔkï röt guööt ë jiɛth ë kajuëc cï kek piɔ̈ɔ̈th jiɛth.

Jiëëm de Kɔc

¹¹ Ku yïn, yïn raan de Nhialic, ye kat ee kakë, ku ye piathëpiɔ̈u cop, ku cop riëëu de Nhialic, ku gäm, ku nhiëër, ku liɛɛrëpiɔ̈u, ku rëër ëmääth.

¹² Ye biök ë biök piɛth biök de gäm, ye pïïr athɛɛr muk aril, en aa cɔɔlë yï aya, ku yen aa gëm yïn ë gäm piɛth ë yïthok ee cäätɔɔ juëc nïïm.

¹³ Yïn than ë Nhialic nɔm, Raan ee käŋ tɔ pïïr kedhie, ku than yïn ë Kërtho Yecu nɔm, raan ee rɔt tɔ ye cäätɔ ë Pontio Pilato nɔm, në gäm piɛth cï gam ë yethok.

¹⁴ Yïn than an, ye jam döt apiɛth, acïn tëthiin col, ku cïn kë bï yï gɔ̈k, aɣet tïc bï Bɛ̈nydan Yecu Kërtho tïc.

¹⁵ Tïc bï Bɛ̈nydït cath ke athiɛɛi nyuɔɔth ëkööldɛn cï lueel, Bɛ̈nydïït ceŋ piny cïn bɛ̈nydïït ee kek rou, ku ye Melik nu ë meliik nïïm, ku ye Bɛ̈nydïït nu ë bäny nïïm.

¹⁶ Yen etök, yen acath ke ciën thuɔɔu, ku ye rëër tëɣer të cïn raan duëër thiääk ke ye, Raan cïn raan cï ye tïŋ, ku cïï duëërë tïŋ aya: ëye tɔ̈u ke riëëu ku riɛldït aɣet athɛɛr ya. Amiin.

¹⁷ Kɔc juëc ë kaken ë pinyë nɔm, ye ke yɔ̈ɔ̈k, ë ke cïï röt ee tɔ dït, ku cïkï juëc ë käŋ ee ŋɔ̈ɔ̈th, ka kuc ë raan nɔn bï kek tɔ̈u në yen, ë ye Nhialic pïïr yen yek ŋɔ̈ɔ̈th, Raan ee wo miɔɔc ë käŋ kedhie në dhuëëŋ, ke wo bï piɔ̈ɔ̈th aa miɛt ë keek.

¹⁸ Ku yɔ̈ɔ̈k ë keek, bïk këpiɛth aa looi, ku bïk aa kɔc juëc ë luɔidɛn piɛth, ku yek adhuɛ̈ŋ ee kɔc dap miɔɔc, ku yek kaken dap tɛ̈k kɔc.

¹⁹ Agokï këdɛn piɛth kueet kë ril thar, kë bï döŋ ëkööl rial, ke ke bï pïïr athɛɛr muk aril, yen pïïr yic.

²⁰ Yïn Timotheo, ye kë cï kuɛ̈i yïn cök ë tiit yïn en, ku ye rɔt kɔl ë jam ë dhɔ̈ɔ̈n jam ɣɔ̈ric cïnic riëëu, ayï ater ë kë cï tɔ ye ŋïnydekäŋ ke ye lueth:

²¹ ade kɔc kɔ̈k ee jam cït ee kënë guiir, agokï kueer ë gäm wööcic. Ë dhuëëŋdepiɔ̈u ë ye tɔ̈u ke week wedhie Amiin