1 Tim 5 - JAM DE NHIALIC 2011

Ka bï aa Luöi Kɔc cï Gam

¹ Raandït nu ë kɔc nïïm du ye nen aläl, ye lɔ̈ŋ tei cït man ë wuur, ye dhuök tɔ cït mïthëkɔckun,

² ye diëër dït tɔ cït märkun, ku tɔ diëër kor cït nyïïrëkɔckun në ɣɛɛr ee yïn piɔ̈u ɣɛɛr ëwic.

³ Ye diäär riëëu diëër cïn nïïm röörken në yic.

⁴ Ku na de tiiŋ cïn nɔm monyde ku de nɔm mïthke ayï mïth ke mïthken tɔ ke wëëtë abïk kɔc ke dhiënden kɔn riëëu, ago kɔc ë dhiëth keek cuööt: kënë ee këpiɛth, ee kën ee Nhialic tɔ mit piɔ̈u.

⁵ Ku tiiŋ cïn nɔm monyde, ku ye thuööm ëgɔk, aŋäthde ee cath ke Nhialic, ago cool ë pal Nhialic ku lɛ̈ŋ wɛ̈ɛ̈rwakɔ̈u ku aköl.

⁶ Ku tiiŋ ee kuɛth ë yänyde kɔɔr tei, na ciɛk pïïr ka cï thou.

⁷ Jɔ kɔc aa lɛ̈k ee kakë, agokï aa tɔ̈u ke cïn gääk gɛ̈k ë ke.

⁸ Ku na de raan reec diɛɛr në këde kɔcken, ka ye raan rac, ku na reec diɛɛr në këde dhiënde guöp, ka ye raan rac aläl, acï gäm rɛɛc ëtaiwei, aŋuɛ̈ɛ̈n ë raan kën kɔn gam.

⁹ Tiiŋ cïn nɔm moc du rinke tɔ gäär ë këde miɔ̈c të kën en run kathiërdhetem thöl, ku abï aa tiiŋ ë thiɛɛk mony tök.

¹⁰ Abï dhil aa tiiŋ cï leec në biäk de luɔidɛn piɛth, tiiŋ cï mïthke ŋiëc muk apiɛth, ku ye kamaan ŋiëc luööi ɣɔn, ku ye kɔc ɣerpiɔ̈ɔ̈th waak cök, ku ye kɔc cïï këtuc dhal kony, ku ye cök ë kuɛny en luɔi piɛthic ëbɛ̈n.

¹¹ Ku diëër kor cïn nïïm röörken ye ke nyɔ̈ŋ: miäk, të cï kek ater gɔl në Kërtho, ka bïk thiëëk kɔɔr,

¹² adekï yiëth gääk, luɔi cï kek gämdɛn tueŋ cuat wei.

¹³ Ku ayek röt wɛ̈ɛ̈t ëŋɛɛrëguöp, ku jɔkï aa riäu lek dhiënë ku lek dhiënë, ku acïkï gup ee ŋɛɛr tei, ayek kɔc ee guak ë keliëp, kɔc ee röt gap ë luɔi de kɔc kɔ̈k yiic, agokï ka cïï piɛth aa lueel.

¹⁴ Yen a dɛ yɛn piɔ̈u luɔi bï diëër kor thiaak, ku dhiëthkï mïthken, ku ceŋkï dhiënken apiɛth, ku cïkï raan de ater ee tɔ yök ka bï en lat.

¹⁵ Ade diëër kɔ̈k cï röt guɔ yal të nu Catan.

¹⁶ Na de raan cï gam, nɔn ee yen moc ku nɔn ee yen tik, raan de diëër cïn nïïm röör, ë kony keek, ke ɣön ë Nhialic cïï bï duɔɔny, luɔi bï en diäär kony diëër cïn nïïm röörken ku yek thum ëgɔk.

¹⁷ Röördït nu ë kɔc nïïm röör ee kɔc tiit apiɛth, tɔ ke de naamden, bï ke riëëu ë riëëu dït, ku kɔc ee luui aläl ë jam ku wëët, kek abï dɛ riëëu dït aläl.

¹⁸ Luɔi cï këcïgɔ̈ɔ̈r e lueel an, “Du awalɔ ee tääu ë miɔɔr thok miɔɔr ee rap kɔ̈ɔ̈m.” Ku lueel aya, Raan ee luui ee röŋ ke ariöpde.

¹⁹ Du gööny ee gam gööny cïï monydït nu ë kɔc nïïm gaany, ee cäätɔ kaarou nïïm ayï diäk, yen a duëër yïn en gam tei.

²⁰ Kɔc ee kërac looi, ye ke jɔ̈ɔ̈ny ë kɔc nïïm kedhie, ke kɔc kɔ̈k ë ke bï riɔ̈ɔ̈c aya.

²¹ Yïn yɔ̈ɔ̈k ë Nhialic nɔm, ku Bɛ̈nydan Yecu Kërtho nɔm, ku tuucnhial ɣer yiic cï lɔc nïïm an, Ye kakë döt apiɛth, ku du ŋɛk ee nhiaar ku man ŋɛk, ku du këdäŋ ee looi ke yï kuany kɔc yiic.

²² Du yïcin ee dap thany ë raan nɔm, ku du ye mɛt ë karɛc ke kɔc kɔ̈k yiic: ye rɔt muk ke yï lɔ piɔ̈u wai.

²³ Du ee bɛ dek ë pïïu tei, ye dek ë mɔ̈n thiinakäŋ në biäk de yäc, ku në biäk de tɔ̈ɔ̈k ee cool ë töökë yï.

²⁴ Karac ë looiyë kɔc kɔ̈k ayek tïc ë kɔc nïïm, ayek keek wat të nu kööl ë guiëërëlöŋ, ku karɛc ke kɔc kɔ̈k ayek ke kuany cök.

²⁵ Yen acït luɔi piɛth aya, luɔi ke kɔc kɔ̈k ayek tïc ë kɔc nïïm, ku luɔi cie tïc aya acïkï duëër thiaan.