1 Tim 4 - JAM DE NHIALIC 2011

Bäny Alueth

¹ Acï Wëidït lueel në thoŋ bï kɔc piŋ an, ë kööl wadäŋ kɔc kɔ̈k abïk lööny wei ë gämic, ku jɔkï ka ke jɔɔk ë kɔc math piŋ, ku piŋkï wëët ë jɔɔk rac,

² në ruëëny de kɔc ee lueth töör, kɔc cï jam cïk yök ee kepiɔ̈ɔ̈th tɔ gɛ̈ɛ̈rë bei cït man ë kë ë gäär ë wënh tuc.

³ Abïk kɔc aa pɛ̈n thiëëk, ku yöökkï keek an, bïk rïŋ pɔ̈l ë cäm. Aake ciɛk Nhialic bï kɔc cï gam keek aa dɔm kɔc ŋic, dɔmkï ku luelkï an, thieithieei.

⁴ Kë cïï Nhialic cak ee këpiɛth ëbɛ̈n, ku acïn töŋ bï rɛɛc ë kɔc, të cï e dɔm ku lueel raan an, thieithieei:

⁵ aye tɔ ɣeric në jam ë Nhialic ku lɔ̈ŋ.

Awun Piɛth de Kërtho Yecu

⁶ Të ee yïn mïthëkɔckuɔ täk nïïm ee kakë, ke yïn bï aa raan ee ka ke Yecu Kërtho looi apiɛth, raan cï ŋiëc muk në wël ke gäm ku wëët piɛth wëët cï kuany cök ëgɔk.

⁷ Ye kɔ̈ɔ̈r rɛɛc ka ye kɔc paar në ka ke piny, ayï ka ye dɔɔc paar. Ye rɔt them në riëëu ee yïn Nhialic riëëu.

⁸ Yïr ee raan e guöp yïïr ade naamdɛn thiinakäŋ: ku riëëu ee raan Nhialic riëëu ade naamdɛn dït ë këriëëc ëbɛ̈n, ee raan tɔ ŋɔ̈th në këde pïïr ënɔɔnë, ayï këde pïïr bï bɛ̈n.

⁹ Ee jam yic ee kënë, ku ye jam rɔ̈ŋ në luɔi bï raan e gam ëbɛ̈n.

¹⁰ Yen a ye wok luui aläl, ku koon wook, luɔi ee wok Nhialic pïïr ŋɔ̈ɔ̈th, yen aye Konydewëi de raan ëbɛ̈n, ku ye Kony dïït ë wëi tëde kɔc cï gam.

¹¹ Ye kakë guiëër kɔc wëët yïn ke.

¹² Ë cïn raan ee yï biɔɔn në biäk de kuur koor yïn, tɔ rɔt ee raan piɛth duëërë kɔc cï gam täudu aa dɔmic, në jam, ku në rëër rëër yïn, ku nhiëër, ku wëi, ku gäm, ku ɣɛɛrëpiɔ̈u.

¹³ Aɣɔ̈l të bän bɛ̈n, ye cök ë kuën yïn, ku guiir wël, ku wɛ̈ɛ̈të kɔc.

¹⁴ Du yïnɔm tɛɛk piny në miɔ̈c cath ke yïn, miɔ̈c wään cï gäm yïn në guiëërë wël ku thäny cï röördït yï thany ë kecin.

¹⁵ Ye kakë thɔ̈ɔ̈ŋ ë yïpiɔ̈u, kedhie.

¹⁶ Ye rɔt tiit apiɛth, ku ye wëët tiit aya. Ye cök ë tɔ̈u yïn ee kakë yiic: tën ee yïn e looi wuya, ke yïn bï rɔt kony ku kony kɔc ee kaku piŋ ayadäŋ.