1 Tim 3 - JAM DE NHIALIC 2011

Bäny ke Ɣön ë Nhialic

¹ Ee jam yic ee kënë an, të kɔɔrë raan luɔi de raan ee kɔc gäm tiit, ka ye luɔi piɛth en kɔɔr.

² Raan ee kɔc gäm tiit abï dhil aa raan cïï duëërë gɔ̈k, abï aa mony de tiiŋ tök, raan ŋic rɔt muk, raan piɛth nɔm, raan ŋic rëër, ku ŋic kamaan, raan ŋic kɔc wɛ̈ɛ̈t

³ raan cïï mɔ̈u ee nhiaar, ku cïï kɔc ee dui, ku cïï ee wäth ë wëu ke ayäär, raan lir piɔ̈u, ku cïn piɔ̈u ater, ku acïï wëu ee nhiaar.

⁴ Abï aa raan ee dhiënde ŋiëc cieŋ apiɛth, ee mïthke tɔ piŋ jam apiɛth, në riëëu ee kek kɔc riëëu,

⁵ ku raan kuc dhiënde cieŋ apiɛth, bï ɣön ë Nhialic ŋiëc tiit adï?

⁶ Acïï bï aa raan ë piac gam, ke cïï rɔt bï tɔ dït, ago wïïk në këracic kërɛɛc ee jɔŋdït rac wïïk thïn.

⁷ Ku abï dhil aa raan piɛth rin tëde kɔc nu biic aya, ke cïï këdäŋ bï wööc kë bï e gɔ̈k, ago cuö lööny ë wïn ë jɔŋdït racic wïn ë dëp.

Kɔc ee Ka ke Ɣön ë Nhialic Looi

⁸ Ku yen acït täu de kɔc ee ka ke ɣön ë Nhialic looi aya, abïk dhil aa kɔc piɛth nïïm, ku cïkï ee kɔc ee liëp rou, ku cïkï ee kɔc ee mäu juëc kɔɔr, ku cïkï ee wäth ë wëu ke ayäär,

⁹ abïk aa kɔc ee jam de gäm döt ë piɔ̈n agɔk, jam ɣɔn cï moony.

¹⁰ Ku kɔckë ë ke kɔnë them, na miäk, ke ke jɔ ke tɔ loi ka ke ɣön ë Nhialic, të cïn en kë duëërë ke gɔ̈k.

¹¹ Ku diëërken aya abïk aa diëër piɛth nïïm, ku cïkï ë mantuum, abïk aa diëër ŋic röt muk, diëër ee käŋ döt apiɛth kedhie.

¹² Kɔc ee ka ke ɣön ë Nhialic looi ë ke ee ya röör de nïïm diëër töktöök, kɔc ee mïthken ŋiëc cieŋ apiɛth ku ŋickï dhiënken cieŋ aya.

¹³ Kɔc cï ka ke ɣön ë Nhialic aa looi apiɛth ayek ciɛɛŋ piɛth yök, ku jɔkï piɔ̈ɔ̈th riɛl arëët ë gäm nu ë Kërtho Yecuyic.

Këcïmoony Dït

¹⁴ Kakë aa gäär ke yïn, ke ya ŋäth bɛ̈n bän dap bɛ̈n tëde yïn.

¹⁵ Ku na cä gääu, ke yïn bï täu bï raan dhil aa tɔ̈u ɣön ë Nhialic ŋic, yen aye ɣön ë Nhialic pïïr, ku ye mën ee yic ku ye yic thar.

¹⁶ Cöök yic ka, cöök cïï duëërë jɔ̈ɔ̈ny an, Luɔidan ee wok Nhialic luööi ee këcïmoony, ku cie dap yökic: Acï tïc ë guöpic, Ku cï tɔ piɛthpiɔ̈u ë Wëi yiic, ku cï tïŋ ë tuucnhial. Ku cï këde guiëër Juöör, ku cï gam ë piny nɔm, ku cï lɛɛr nhial ë dhuëëŋic.