1 Tim 2 - JAM DE NHIALIC 2011

Lɔ̈ŋ Ɣön ë Nhialic

¹ Yen a kan ɛn yï yɔ̈ɔ̈k ë käŋ kedhie an, Pal, ku lɔ̈ŋ, ku kɔ̈ɔ̈r ë këdäŋ, ku thieithieei, abï ke ya lueel në baŋ de raan ëbɛ̈n,

² në baŋ de meliik, ku kɔc nu ë kɔc nïïm kedhie, luɔi bï wo tɔ̈u ke wo rëër ke cïn riɔ̈ɔ̈c, ku rëërku ëdïu, në riëëu dïït ee wok Nhialic riëëu ku thɛ̈k ee wo kɔc theek.

³ Kënë ee këpiɛth tëde Nhialic Konydan ëwëi, ku piɛth ë yepiɔ̈u,

⁴ Raan de piɔ̈u luɔi bïï kɔc kony wëi kedhie, ku yökkï ŋïny de yic.

⁵ Nhialic tök tei en anu ku ade raan töŋ ee luk lueel raan nu ë kaam de Nhialic kekë kɔc, yen aye raan cɔl Kërtho Yecu,

⁶ raan cï rɔt gaam bï aa kë ye kɔc wɛ̈ɛ̈r bei kedhie, raan cïï këde lueel në cäätɔɔ ëkööldɛn piɛth,

⁷ ku yɛn cï dɔm aye raan bï këde guiir, ku ya tuc (yic en aa luɛɛl ë Kërthoyic, yɛn cïï lueth tör), ku ya raan ee Juöör wɛ̈ɛ̈t në gäm ku në yic!

⁸ Yen a dɛ yɛn piɔ̈u luɔi bï röör aa lɔ̈ŋ ë baai nɔm ëbɛ̈n, ke ke ye kecin jat nhial cin ɣeriic, ke cïn agɔ̈th ku cïn teer ë wël.

⁹ Ku diäär ayadäŋ, ë ke ye röt kiir ë lupɔ röŋ ë kegup, në riɔ̈ɔ̈cdenyin ku piathënɔm, ku kë cïï kenïïm ë nai, ku cïkï adhääp ë cieŋ ayï guën tuc ë ɣööcde ayï lupɔ tuc ë ɣööcde,

¹⁰ aŋuän luɔi ee kek röt kiir ë luɔi piɛth (kë rɔ̈ŋ ke diäär ka, diëër an, yek Nhialic riëëu).

¹¹ Ë tik wëëtë ke lɔ lik, ke ye rɔt tääu ë kɔc wëët en cök.

¹² Yɛn cïï tik ee päl wëët wëët en kɔc, ku cä pɛ̈l ciɛɛŋ ceŋ en moc, ë ye tɔ̈u ëlik.

¹³ Adam en aa kɔnë cak, ku jɔ Ɣawa cak ciëën.

¹⁴ Ku Adam akënë math, ee tik en ë mɛthë, a le en ë këracic.

¹⁵ Ku tik abï kony të dhiëëth en meth, na lee tïït të tɔ̈u kek në gämic ku nhiëër ku ɣɛɛrëpiɔ̈u ku piathënɔm.