1 Tim 1 - JAM DE NHIALIC 2011

¹ Yɛn Paulo, tuny ë Yecu Kërtho në löŋ de Nhialic Konyda, ku aŋäthdan Kërtho Yecu.

² Ee Timotheo en gäär, ee mɛnhdiën yic në gämic: Ë dhuëëŋdepiɔ̈u ë ye tɔ̈u ke yïn, ku kokdepiɔ̈u, ku mät, në ke bɔ̈ tëde Nhialic Wääda ku Kërtho Yecu Bɛ̈nydandït.

Jäny në biäk de Wëët lueth

³ Acït man wään yɔ̈ɔ̈k ɛn yïn an, bä döŋ Epetho, wään la yɛn Makedonia, luɔi bï yïn kɔc kɔ̈k yɔ̈ɔ̈k an, Duökï ee wëët ë wëët mɛɛn.

⁴ Ku duökï päärëkɔ̈ɔ̈r ee piŋ, ayï jam de rɛm thɛɛr, jam cïn pëkde, ee kak ee teer bɛ̈ɛ̈i tei, ku acïkï kɔc ee tɔ kuet në ka ke Nhialic ku në gäm: jɔ keek aa yɔ̈ɔ̈k wuya, mɛnhdï.

⁵ Thar ë jam cï guiir en aye nhiëër ee kɔc röt nhiaar në piɔ̈n awai ku në ŋïny ee raan epiɔ̈u ŋic nɔn piɛth en ëgɔk, ku në gäm cïnic mɛthë nyin.

⁶ Kakë acï kɔc kɔ̈k ke ke röt yal, ku jɔkï kepiɔ̈ɔ̈th wɛ̈l jam ɣɔ̈ric.

⁷ Adekï piɔ̈ɔ̈th luɔi bï kek aa kɔc ee wëët ë löŋ, ku kuckï kë luelkï, ayï thar ë jam ŋɛkkï akuckï ayadäŋ.

⁸ Ku löŋ aŋicku nɔn piɛth en, të tiiŋë raan e yic ë luɔi.

⁹ Në luɔi ŋic wok kënë an, Löŋ akënë tääu në këde raan piɛthpiɔ̈u, ee këde kɔc reec löŋ gam kɔc ee löŋ yalic, yen aa tɛ̈ɛ̈uwë ye, ayï këde kɔc reec Nhialic gam ku kɔc ee kërac looi, këde kɔc cïn piɔ̈ɔ̈th riëëu ku cïnku gup athɛɛk, këde kɔc ee wärken dui ku duikï märken, këde kɔc ee kɔc nɔ̈k,

¹⁰ këde kɔc ee diäär kɔɔr, ku röör ee röör kɔɔr, ku kɔc ee kɔc peec, ku kɔc ee lueth töör, ku kɔc ee gutguut lueel ë lueth, ku na de däŋ kë de ater ke wëët piɛth,

¹¹ kë cïï räm kekë wëlpiɛth ke dhuëëŋ de Nhialic de athiɛɛi, wëlpiɛth cï tääu ë yacin.

Kɔ̈ɔ̈r de Kokdepiɔ̈n ë Nhialic

¹² Ku aluɛɛl an, thieithieei raan cï a gäm riɛl, yen Kërtho Yecu Bɛ̈nydït, luɔi cï en a tɔ ye raan adöt, ago ya dɔm bä luɔide looi.

¹³ Acakaa yɛn ë ye raan ee Nhialic läät ɣɔn, raan ee kɔc yɔŋ, ku ya ke kuur: ku yɛn ë kokdepiɔ̈u yök, luɔi cän e looi ke kuöc në ciën gäm.

¹⁴ Ku dhuëëŋ de Bɛ̈nydïïtda piɔ̈u acï rɔt ŋuak abï kït aläl kekë gäm ku nhiëër nu ë Kërtho Yecuyic.

¹⁵ Ee jam yic ee kënë, jam ee röŋ në luɔi bï kɔc gam kedhie an, Kërtho Yecu aa bɔ̈ ë piny nɔm bï kɔc ee kërac looi bɛ̈n kony wëi. Ku yɛn ee raan nu ë kɔc nïïm tueŋ në rac:

¹⁶ ku yen aa yɔ̈k ɛn kokdepiɔ̈u, ee luɔi bï Yecu Kërtho guömdɛn cï dikëdik ëbɛ̈n tɔ tiëc ë yaguöp, yɛn ë raan nu tueŋë, ku luɔi bä yɛn aa raan bï kɔc woi ku dɔmkï täudï yic kek kɔc bï këde gam agokï pïïr athɛɛr yök.

¹⁷ Ku ënɔɔnë, Melik tɔ̈u aɣet athɛɛr ya, ke cïï dhiap, ku cïï duëërë tïŋ, Yen Nhialic de nɔm pɛl etök, ë riëëu ku dhuëëŋ ë ke ye tɔ̈u në Yen aɣet wadäŋ thɛɛr. Amiin.

¹⁸ Thönë yen atääu ë yïciin yïn Timotheo mɛnhdï, në baŋ de wël cï kɔn guiir tueŋ në këdu, ke bï yïn ke tɔŋ piɛth aa biök:

¹⁹ ku bä gäm aa muk, ku muk ŋïny ee yïn yïpiɔ̈u ŋic nɔn le en gɔk, ŋïnyë acïï kɔc kɔ̈k cuat wei, agokï gämden tɔ riääk, acït man abël cï pol ë pïïu yiic.

²⁰ Kɔc de yiic yï Kumenayo kekë Alekandaro, kɔc cä yiɛ̈n Catan, luɔi bï ke wɛ̈ɛ̈t, ke ke cïï Nhialic bï aa läät.