1 Theth 5 - JAM DE NHIALIC 2011

Coc Rɔt në Bɛ̈n de Bɛ̈nydït

¹ Ku në këde run ku akööl, wek mïthëkɔckuɔ, acïn kë duɛ̈ɛ̈r gäär week.

² Wegup aŋiɛckï ëgɔk nɔn bï aköl ë Bɛ̈nydït bɛ̈n cït man ee cuɛ̈ɛ̈r bɛ̈n wakɔ̈u.

³ Ku të lueel kek en an, “Piny arɛ̈ɛ̈r ëdïu, ku acïn riɔ̈ɔ̈c nu,” en a bï riääk ë kegup ëthiäu, cït man ë kɛ̈c cï tik käc, ku acïn kë duëër kek poth.

⁴ Ku week, mïthëkɔckuɔ, wek cïï nu ë cuɔlic, bï ee köölë we math cït man ë cuɛ̈ɛ̈r:

⁵ luɔi aa wek wɛ̈ɛ̈t ke ɣɛɛrëpiny wedhie, ku yak wɛ̈ɛ̈t ke aköl: wo cie kɔc ke wɛ̈ɛ̈rwakɔ̈u, ayï cuɔlëpiny.

⁶ Yen du wok ee niin cït man ë kɔc kɔ̈k, yok yïn ku piɛthku nïïm.

⁷ Kɔc ee niin ee wɛ̈ɛ̈rwakɔ̈u en aye kek niin, ayï kɔc ee röt tɔ wit mɔ̈u, ee wɛ̈ɛ̈rwakɔ̈u en aye mɔ̈u ke wit.

⁸ Ku wook, wok kɔc ke aköl, yok nïïm piath, abuk wëu pät yiic ee yɔu gël aa cieŋ, wëu ke gäm ku nhiëër, ku në baŋ de akup de aŋäth ku kunydewëi.

⁹ Nhialic akën wo dɔm në këde agɔ̈th, ee luɔi bï wo kunydewëi yök, en aa dɔm en wook në Bɛ̈nydït Yecu Kërtho,

¹⁰ raan cï thou në biäkda, luɔi bï wook pïïr në yen ëtök, ayï të yïn wok ayï të niin wok.

¹¹ Yen aa wek wepiɔ̈ɔ̈th muk wapäc, ku yak röt kueet wapäc, acït man aa wek e looi ayadäŋ.

Wëët Ciëën ku Thiëc

¹² Ku wek läŋku, wek mïthëkɔckuɔ, ke we bï kɔc ee luui ë weyiic aa ŋic, kɔc nu ë wenïïm ë Bɛ̈nydïtic, kɔc ee we täk wël.

¹³ Aguɔkï ke aa riëëu aläldïïtë ku nhiaarkï keek në biäk de luɔiden. Ku yak ŋiëc rëër ë röt apiɛth.

¹⁴ Wek lëkku, wek mïthëkɔckuɔ an, Yak kɔc ee löŋ yalic nen, yak kɔc ee piɔ̈ɔ̈th riɔ̈ɔ̈c muk piɔ̈ɔ̈th, yak kɔc kɔ̈c kony, yak piɔ̈ɔ̈th liɛɛr në kɔc kedhie.

¹⁵ Mäthdhiën, ë cïn raan ee raan luöi kërac raan cï e kɔn luöi kërac, yak këpiɛth kuany cök anandun, ë ŋɛk ë ye ŋɛk luöi këpiɛth, ayï raan ëbɛ̈n.

¹⁶ Yak piɔ̈ɔ̈th miɛt anandun,

¹⁷ yak cool ë lɔ̈ŋ acïn pëk.

¹⁸ Yak thieithieei lueel në këriëëc ëbɛ̈n. Kënë ee këde piɔ̈n ë Nhialic në këdun ë Kërtho Yecuyic.

¹⁹ Duökï Wëidït ee piɔɔk abïk liu,

²⁰ wël cï guiir duökï keek ee biɔɔn.

²¹ Yak käŋ them kedhie: yak këpiɛth muk aril,

²² yak tɛɛm ë luɔi de kërac ëbɛ̈n.

²³ Ku ënɔɔnë, Nhialic de mät, Yen guöp, ee we tɔ ɣerpiɔ̈ɔ̈th ëliŋliŋ, ku wëikun ëbɛ̈n ku piɔ̈ndun ku guöpdun ë ye ke muk acïn këliu, ku bï ciën kë duëërë ke gɔ̈k aɣet bɛ̈n bï Bɛ̈nydan Yecu Kërtho bɛ̈n.

²⁴ Raan ë cɔl week ee raan adöt, Raan bï luɔi dhil thöl ayadäŋ.

²⁵ Mïthëkɔckuɔ, yak lɔ̈ŋ në biäkda.

²⁶ Thiëckï mïthëkɔckuɔ kedhie në ciëm ɣeric.

²⁷ Wek yɔ̈ɔ̈k në Bɛ̈nydïtic an, Takï awerekë kueen mïthëkɔckuɔ ɣerpiɔ̈ɔ̈th kedhie.

²⁸ Ë dhuëëŋ de Bɛ̈nydan Yecu Kërtho piɔ̈u ë ye tɔ̈u ke week. Amiin.