1 Theth 4 - JAM DE NHIALIC 2011

Pïïr ee Nhialic tɔ Mit piɔ̈u

¹ Cöök ciëën, wek mïthëkɔckuɔ, wek läŋku, ku lëkku week në Bɛ̈nydït Yecu an, Acït man cä wek jam yök tëde wook, jam de rëër bä wek dhil rëër, ke we bï Nhialic tɔ mit piɔ̈u, wek läŋku, ke rëërduön piɛth bï aa cool ë ŋuak e nyin.

² We ŋic jam cuk yiɛ̈n week në Bɛ̈nydït Yecu.

³ Këde piɔ̈n ë Nhialic kï an, Ɣɛɛr bä wek piɔ̈ɔ̈th ɣɛɛr, ku päl bä wek kɔ̈ɔ̈rëdiäär pɔ̈l.

⁴ Week wedhie, ë ŋɛk e ye guöpde ŋiëc dɔm në ɣɛɛrëpiɔ̈u ku riëëu,

⁵ ku cïï e piɔ̈u tum kërac në ŋɔ̈ɔ̈ŋ ee ye dɔm, cït man ë Juöör kuc Nhialic.

⁶ Ë cïn raan bï akeu waan, ciɛm mɛnhkënë ë këdäŋ: luɔi ee yen Bɛ̈nydït yen ee Raan bï ka cït ee kakë guöör kedhie, acït man cï wok e kɔn lɛ̈k week ayadäŋ, ku cuk röt tɔ ye cäätɔɔ.

⁷ Acie këde luɔi col en ë cɔɔlë Nhialic wook, ee këde ɣɛɛrëpiɔ̈u.

⁸ Yen ka, raan reec pïŋ, acie raan en reec en këde piŋ, ee Nhialic, Raan cï we miɔɔc në Wëidïtkɛn ɣer.

⁹ Ku në këde nhiëër bä wek mïthëkɔckun nhiaar acïn kë duɛ̈ɛ̈r gäär wek, wegup, we cïï Nhialic wɛ̈ɛ̈t an, bäk röt nhiaar wapäc.

¹⁰ Ku kënë ayak looi ayadäŋ tëde mïthëkɔckun kedhie nu Makedonia ëbɛ̈n. Ku wek läŋku, wek mïthëkɔckuɔ, ke nhiëërdun bï lɔ ke ŋuak e nyin arëët.

¹¹ Ke we bï rëër bä wek rëër ëmääth aa cool ë thɛm wek e, ku bäk kakun gup aa looi, ku yak luui ë wecin, acït man cï wok e lɛ̈k week.

¹² Luɔi bä wek rëër ke we lɔ piɔ̈ɔ̈th gɔk në kɔc nu biic, ku cïn kë bï we dak.

Bɛ̈n de Bɛ̈nydït

¹³ Ku wok cïn piɔ̈ɔ̈th luɔi bä wek e kuc, wek mïthëkɔckuɔ, në këde kɔc cï niin, ke we cïï piɔ̈ɔ̈th bï jiɛth aläl, cït man ë kɔc kɔ̈k, kɔc cïn kë ŋäthkï.

¹⁴ Ku të gɛm wok en nɔn cï Yecu thou, ku be rɔt jɔt, yen acït bïï bï Nhialic kɔc cï lɔ niin ë Yecuyic bɛ̈ɛ̈i në yen ëtök.

¹⁵ Ku kënë a lëkku week në jam ë Bɛ̈nydït an: Wok kɔc pïïr, kɔc bï döŋ aɣet bɛ̈n bï Bɛ̈nydït bɛ̈n, wo cïï kɔc cï niin bï waan.

¹⁶ Bɛ̈nydït guöp abï bɛ̈n piny paannhial në kiɛɛu, ku në röl ë bɛ̈ny nu ë tuucnhial nïïm, ku kaaŋ de Nhialic, go kɔc cï thou në Kërthoyic agokï röt kɔn jɔt:

¹⁷ na ëlë, ke wok kɔc pïïr, kɔc cï döŋ, wo bï gap nhial në keek ëtök ë luäät yiic, buk lɔ rɔ̈m në Bɛ̈nydït ë yomic: ku jɔku tɔ̈u në Bɛ̈nydït ëtök aɣet athɛɛr.

¹⁸ Yen ya wek wepiɔ̈ɔ̈th muk wapäc në wëlkë.