1 Theth 2 - JAM DE NHIALIC 2011

Luɔi de Paulo në Thethalonikei

¹ Ku wegup, wek mïthëkɔckuɔ, we ŋic bɛ̈ndan cï wo bɛ̈n ë weyiic, nɔn cïï en ee ɣɔ̈ric:

² Ku acakaa wok ë cï kërac kɔn guum, ku wo ye luöi kërac aläl ë Pilipoi, acït man ŋiɛc wek en, ke wo ŋoot ke wo ye week guiëër wëlpiɛth ke Nhialic në ater dït, ke wo ril piɔ̈ɔ̈th ë riɛl ë Nhialicda.

³ Ku guiëër ee wo wël guiir aa cïnic mɛth ee kɔc math, ayï jam col aa liu thïn, ayï ruëëny:

⁴ Ku acït man cï Nhialic wo tɔ piɛth an, bï wëlpiɛth tääu ë wocin, yen aye wok jam, acie kɔc ke yok tɔ mit piɔ̈ɔ̈th, ee Nhialic Raan ee wo them piɔ̈ɔ̈th.

⁵ Ku acïn kööl töŋ cï wok wël ë mɛthë nyin lueel, acït man ŋiɛc wek en, ku acïn wui de kalei cuk moony, Nhialic ee cäätɔda:

⁶ ku acïn lɛc cuk kɔɔr tëde kɔc, ayï tëde week, ayï tëde kɔc kɔ̈k, acakaa wek ë cuk duɛ̈ɛ̈r miɛn, luɔi ee wok tuuc ke Kërtho.

⁷ Ku wok aaye ŋiëc rëër ëmääth ë weyiic, cït man ee tik mïthke ŋiëc muk apiɛth.

⁸ Ku në täŋ ee wok week tak arëët, en aaye wok piɔ̈ɔ̈th miɛt, luɔi yïn wo week wëlpiɛth ke Kërtho, ku acie keek kapäc, ee wëikuɔ ayadäŋ, në nhiëër cï wo nhiaar aläl!

⁹ Wek ee wenïïm tak, wek mïthëkɔckuɔ, në luɔi dïït thieek yok looi: wo ye luui aköl ku wakɔ̈u, wok ë cïn piɔ̈ɔ̈th luɔi bï wo raan tök miɛn ë weyiic, agoku wëlpiɛth ke Nhialic guiëër week aya.

¹⁰ Wek aye cäätɔɔ, ayï Nhialic aya, në täu ee wok tɔ̈u ë weyiic wek kɔc cï gam, täudan ɣeric ku piɛthic ku cïnic gääk duëërë wo gɔ̈k:

¹¹ acït man ŋiɛc wek en, guiëër ee wok week guiëër ku muŋ ee wo week muk piɔ̈ɔ̈th, ku lëk ee wok week lɛ̈k wedhie, cït man ee wun mïth jam kekë mïthke,

¹² an, bäk ŋiëc rëër ë rëër ee röŋ ke Nhialic, Raan ë cɔl week ë ciɛɛŋde ku dhuëëŋde.

¹³ Yen a ye wok cool ë lec Nhialic acïn pëk, luɔi kɛ̈n wek jam gam cït nɔn ee yen jam de kɔc tei, wään gam wek jam cäk piŋ tëde wook, ku acäk tɔ ye jam ë Nhialic, ku ye jam ë Nhialic ëgɔk, jam ë cool ë lui ë weyiic ayadäŋ wek kɔc gäm.

¹⁴ Ku week, mïthëkɔckuɔ, we cï aa kɔc ë täu de ɣööt ke Nhialic dɔmic ɣööt ke Nhialic nu ë Yecu Kërthoyic ë Juda: në guöm cä wek karɛc manë guum ayadäŋ tëde kɔc ke paandun, ka kït e ka cïk guum tëde Judai.

¹⁵ Kek kɔc cï Bɛ̈nydït Yecu nɔ̈k ayï tït ayadäŋ, ku acïk wo yɔŋ, ku acïkï Nhialic ee tɔ mit piɔ̈u, ku yek ater lueel ë kɔc kedhie!

¹⁶ Ayek wook pɛ̈n guiëër guïïr wok Juöör jam ë kuny bï ke kony wëi: yen aye kek karɛcken kut nïïm ëcaŋɣɔn: ku agɔ̈th acï bɛ̈n tëde keek ka cïn kë ye döŋ.

Akɔɔr Paulo bï Ke Neem

¹⁷ Ku wook, mïthëkɔckuɔ, nɔn cï wo jɔt ë welɔ̈m buk ceŋ roor ë akööl liaakäŋ, ku ye wogup kek ë jɔt acie wopiɔ̈ɔ̈th, yen aa ŋɛk wok en aläl ë tïŋ bï wo we tïŋ nyïïn, we cuk tak aläl:

¹⁸ yen aa ya yɛn bɛ̈n tëde week kɔɔr, yɛn Paulo guöp, nɔn bän bɛ̈n raantök, ku nɔn ee yen raanrou, go Catan wo pëën.

¹⁹ Aŋäth ŋäthku ee käŋö, ayï miɛt ë wopiɔ̈ɔ̈th, ayï göldan ë dhuëëŋ, yek kaŋö? Cïkï ee week, ë Bɛ̈nydan Yecu Kërtho nɔm në bɛ̈n bï en bɛ̈n?

²⁰ Wek aye dhuëëŋda ku yak miɛt ë wopiɔ̈ɔ̈th.