1 Theth 1 - JAM DE NHIALIC 2011

¹ Yɛn Paulo, wokë Thiluano, ku Timotheo. Awerek en gɛ̈ɛ̈rku ɣön ë Nhialic de Thethalonikei nu ë Nhialic Wäädyic, ku Bɛ̈nydït Yecu Kërthoyic: Ë dhuëëŋdepiɔ̈u tɔ̈u ke week, ayï mät, në kë bɔ̈ tëde Nhialic Wääda, ku Bɛ̈nydït Yecu Kërtho.

Pïïr ku Gäm de Kɔc ke Thethalonikei

² Wok ee cool ë lec Nhialic nɔm ë aköölnyïïn kedhie në biäkdun week wedhie, ku wok ee këdun lueel ë lɔ̈ŋda yic.

³ Luɔiduön ë gäm ayok tak acïn pëk, ku takku luɔiduön ë nhiëër, ku aŋäth aa wek Bɛ̈nydït Yecu Kërtho ŋɔ̈ɔ̈th në liɛɛr ë wekpiɔ̈ɔ̈th ë Nhialic Wääda nɔm.

⁴ Lönyduön cï Nhialic we lɔc aŋicku, wek mïthëkɔckuɔn nhiaar,

⁵ wëlkuɔn piɛth aake cïï bɔ̈ ë weyiic në jam tei, aake bɔ̈ në riɛl ayadäŋ, ku në Wëidït ɣer, ku në ŋïny aa wek ke ŋic ëgɔk, we ŋic täudan ë ye wo tɔ̈u ë weyiic në biäkdun week.

⁶ Ku we cï aa kɔc cï täuda dɔmic, ayï täu de Bɛ̈nydït, në gäm cä wek jam gam në këtuc dhal week arëët, ku në miɛtëpiɔ̈u ë Wëidït ɣer.

⁷ Aguɔkï aa kɔc bï kɔc täudun aa dɔmic, kɔc nu Makedonia ku Akaya ëbɛ̈n.

⁸ Luɔi cä wek jam de Bɛ̈nydït tɔ kök abï kɔc piŋ, acie Makedonia kekë Akaya kapäc, gämduön cä wek Nhialic gam acï thiëi ë thäi nɔm ëbɛ̈n, ku acïn ke buk dhil lueel.

⁹ Kek gup ayek wook nyuöth lɔ cï wo lɔ ë weyiic, ku wël cä wek röt wɛ̈l Nhialic në yiëthkun yiic, bäk ka ke Nhialic yic pïïr aa looi,

¹⁰ ku bäk Wënde aa tiɛɛt paannhial, Wëndɛn cï jɔ jɔt ë kɔc cï thou yiic, yen Yecu raan cïï wo luök ë agönh bï bɛ̈n.