1 Tham 9 - JAM DE NHIALIC 2011

Thaulo Ayɔ̈k kekë Thamwɛl

¹ Ade raan wun ë Benjamin, raan kueth, acɔl rin Kic, ee wën de Abiel, Abiel wën de Dheror, ee raan dhiën de Bekorath, në biäk dhiën de Apia.

² Ade nɔm wëndɛn cɔl Thaulo, ee dhuŋ bɛ̈ɛ̈r läk ku wɛ̈ɛ̈r kɔc nïïm ëbɛ̈n në Yithriɛl, ku aläk arëët.

³ Na kööl tök go mul ke Kic määr, ago wun lɛ̈k Thaulo an, “Nöm lïm tök ku jälkï wekë yen bäk mul lɔ kɔɔr.”

⁴ Agokï tëëk ë kueer de piny ë kuur de Eparaim, ku tëëk ë Calica, gokï keek kɛ̈n yök. Agokï lɔ tueŋ paan de Caalim, gokï mul yök ke ke liu ëtɛ̈ɛ̈n. Na wën ke ke be tëëk në wuöt ke Benjamin yiic, agokï keek kɛ̈n yök aya.

⁵ Na wën aa lek ɣet paan de Dhup, go Thaulo lɛ̈k lïmdɛn ciɛth kek an, “Bä lok ciëën, në luöi cïï wäär bï diɛɛr në baŋde, në biäk cïï en e ŋic nɔn liu ë mul.”

⁶ Go lïm bɛ̈ɛ̈r an, “Tïŋ wunë ade yic, raan de Nhialic, ee raan riëëuwë guöp aläl. Ku kë ye lueel ëbɛ̈n ee ya yic. lokku ëtɛ̈ɛ̈n ënɔɔnë tɛk däŋ bïï wok nyuöth kueer bï wok mul yök.”

⁷ Ago Thaulo lɛ̈k lïm an, “Na lok lɔ eeŋö buk gäm en? Këcam tɔ̈u në atheepkuɔ yiic acïk thök. Wok cïn nïïm miɔ̈c buk lɔ gäm raan de Nhialic. Eeŋö tɔ̈u tëde wook?”

⁸ Go lïm bɛ bɛ̈ɛ̈r an, “Yɛn de nɔm wëu liaakäŋ. Abä keek lɔ gäm raan de Nhialic, ago wo lɔ nyuöth kueer bï wok mul lɔ yök.”

⁹ Ɣɔn thɛɛr paan de Yithriɛl, na kɔɔr bï raan Nhialic thiëëc, aaye lueel an, “Bäär, lokku tëde monydaai në baŋ ye tiët tɔ ye monydaai në ye aköölkë yiic.”

¹⁰ Ago Thaulo lïmde yöök an, “Apiɛth, bä lokku.” Agokï lɔ wut të tɔ̈u ë raan de Nhialic thïn.

¹¹ Ku të wën tëëk kek tëthöny ke ke lɔ wut, gokï rɔ̈m në duet bï bɛ̈n köör ë pïïu, gokï keek thiëëc an, “Tɔ̈u monydaai ee tënë?”

¹² Ago duet bɛ̈ɛ̈r an, “Ɣɛɛ, anu, yeka ë wenïïm tueŋ. Aa piɛc bɛ̈n wunda ee köölë, në biäk de yen kɔc de nïïm miɔ̈c bïk nɔ̈k ee köölë, të thöönyë.

¹³ Të la wek lɔ wut abäk yök ke kën kɔn lɔ tëthöny të le yen cam. Ku kɔc acïkï bï cam ke kën kɔn bɛ̈n, në biäk bï en miɔ̈c näk thieei. Ago kaaman jɔ cam, ku jɔ lɔ nhial, abäk yök ënɔɔnë ke cï bɛ̈n.”

¹⁴ Na wën aa jɔkï ɣëët ë wut këc, ke ke lɔ në wutic, gokï Thamwɛl tïŋ ke wel yenɔm tënu kek ke lɔ tëthöny.

¹⁵ Ku kööl ɣɔn ŋoot ë Thamwɛl ke kën guɔ bɛ̈n, Nhialic aacï Thamwɛl nyuöth ee kënë

¹⁶ lueel an, “Në kaam cït ee kaamë miäk. Yïn bä tuöc raan bɔ̈ dhiën de Benjamin, tɔc nɔm ke ye melik de kɔckiën ke Yithriɛl, abï kɔckï luök në kɔc ke Pilithiin cin, Yɛn cï nuan de kɔckï tïŋ, ku Yɛn cï dhiëndɛn kɔɔr kek kuɔɔny piŋ.”

¹⁷ Na wën aa lɔ Thamwɛl Thaulo tïŋ, go Bɛ̈nydït lɛ̈k en an, “Raan wään lɛ̈k Ɛn yïn këde ka. Raan bï kɔckï wat.”

¹⁸ Ago Thaulo rɔt cuɔt ë Thamwɛl lɔ̈ɔ̈m në kal thok ku lop an, “Duëërë ya nyuöth ɣön rëër ë monydaai thïn?”

¹⁹ Go Thamwɛl bɛ̈ɛ̈r an, “Ee yɛn monydaai, lɔɔr tueŋ ë yanɔm tëde lɔ̈ŋ, në baŋ bïï yïn cam we yɛn ee köölë, ku miäk adurduur yïn bä tɔ jël, ku yïn bä lëk këriëëcduön tɔ̈u ë yïpiɔ̈u ëbɛ̈n.

²⁰ Ku në biäk de mul wään bï määr ë nïn kadiäk cï wan, du diɛɛr në baŋden, acï keek yök. Ku kɔc ke Yithriɛl kedhie akɔɔrkï yïn wekë baai de wuur.”

²¹ Ago Thaulo bɛ̈ɛ̈r an, “Yɛn ee raan de Benjamin, dhiën koor ë dhiëën ke Yithriɛl yiic, ku ɣönda yen ee ɣön koor aläl në dhiën ke Benjamin yiic, ka eeŋö duëër yïn ya lɛ̈k kë cït ee kënë?”

²² Na wën ke Thamwɛl ë bïï Thaulo kekë lïmde ɣöt, ku nyuuc ke në kɔc kathiërdiäk cï keek cɔɔl nïïm.

²³ Go Thamwɛl raan ee thät yöök an, “Bɛ̈ɛ̈iyë thïm de rïïŋ wën gäm yïn, kë wën lɛ̈k yïn an tɔ̈u pei.”

²⁴ Ago raan ee thät ɣäm bɛ̈ɛ̈i kekë kake kedhie ku tɛ̈ɛ̈u në Thaulo nɔm. Go Thamwɛl lueel an, “Kënë ee kë cï täu yïn. Cam në luɔɔi cïï ë yen tɔ̈ɔ̈u pei në këdu, në biäk de ee köölë, të wään luɛɛl ɛn en nɔn cän kamaan cɔɔl.” Ago Thaulo jɔ cam kekë Thamwɛl ee köölë.

²⁵ Ku ëtɛ̈ɛ̈n, na cïk jɔ bɛ̈n piny të de lɔ̈ŋ, ke ke lɔ wut, go Thamwɛl jɔ jam kekë Thaulo ɣöndɛn nhial.

Thamwɛl atɔ Thaulo ee Melik

²⁶ Na ɣɔn aa lek pääc ɣɔn amiäk, go Thamwɛl Thaulo cɔɔl ke nu ɣöndɛn nhial, ku lueel an, “Guiir rɔt, ke we bä tɔ jäl.” Na wën aacï Thaulo rɔt guiir gokï lɔ biic kekë Thamwɛl ëtök.

²⁷ Ku të wën jɔ kek lɔ ë wut këc biic, go Thamwɛl Thaulo yɔ̈ɔ̈k an, “Lëkkë lïmdu ke bï lɔ tueŋ në wonïïm tueŋ, ku yïn rɛ̈ɛ̈rë ë määth eenë, aguɔ yïn gäm jam bɔ̈ tëde Nhialic.” Ago lïmde lɔ ë kenïïm tueŋ.