1 Tham 8 - JAM DE NHIALIC 2011

Kɔc Akɔɔrkï Melik

¹ Wään cï Thamwɛl jɔ dhiɔp, go wɛ̈ɛ̈tke kuany ke ke ye bäny ke luk ë Yithriɛl.

² Wëndɛn kɛ̈i acɔl Jowɛl, ku wën ye kek rou acɔl Abija, aake ye bäny ke luk në Biirceba.

³ Ku mïth ke Thamwɛl akënkï luɔɔi de wunden kuany yic, gokï röt yal ë ruëëny yic, ku yek kum thok nööm, ku cïkï lööŋ ee ŋiëc guiir.

⁴ Ago röördït ke Yithriɛl kedhie keyiic määt, ku lekï të nu ë Thamwɛl ë Rama.

⁵ Gokï lɛ̈k en an, “Yïn cï dhiɔp ku wɛ̈ɛ̈tku acïkï luɔɔidu kuany yic, ënɔɔnë kuany melik bï wook wat, cït juöör kɔ̈k de nïïm melik.”

⁶ Na wën aa piŋ Thamwɛl jamdɛn kɔɔr kek melik bï keek wat, acï piɔ̈u bɛ̈n diu ku lɛ̈ŋ Bɛ̈nydït,

⁷ ago Bɛ̈nydït lëk Thamwɛl an, “Piŋ këriëëc ëbɛ̈n lëk ë kɔc yïn. Acie yïn cï kɔc rɛɛc, ee Yɛn ë rɛɛckï ke Ya ye meliŋden,

⁸ Gɔl wään bɛ̈ɛ̈i Yɛn keek bei ë Rip agut cï ee köölë, areeckï Yɛn ku lɛmkï yiëth kɔ̈k, aluikï yïn këdɛn ë yek luöi Yɛn.

⁹ Ënɔɔnë piŋ jamden, ku lɛ̈kë keek ëgɔk, ku tɔ ŋickï, yen kë bï meliŋ bï keek wat aa looi.”

¹⁰ Go Thamwɛl wël ke Bɛ̈nydït kedhie lëk kɔc wën cï yen luɔp an kɔɔrkï melik

¹¹ lueel an, “Kënë yen abï melik bï week wat aa looi: Abï mïthkun nööm ku tɔ keek lui në joŋköörkɛn ke tɔŋ, ku kɔ̈k abïk aa riŋ në abëëlkɛn ke tɔŋ nïïm tueŋ,

¹² ku kɔc kɔ̈k abï keek tɔ lui ke ke ye bäny ke kɔc juëc, ku kɔ̈k abïk aa bäny ke kɔc lik, ku kɔ̈k abïk domde aa puur ku temkï domde, ku kɔ̈k abïk ŋoot ke ke loi tɔɔŋke ku cök ke abëëlkɛn ke tɔŋ.

¹³ Abï duetkun jɔt bïk aŋiëër aa luöi yen ku thɛ̈tkï ye.

¹⁴ Abï duumkuön piɛth ke enap ayï ŋaap ku olip nööm, ku gëm keek bänyke.

¹⁵ Ku abï töŋ de thiëër aa nööm në rɛɛpkun yiic ku në kakuön ee luɔk yiic, ku gëm ke kɔc lui në yen, ku bänyke.

¹⁶ Abï lïïmkuön röör ku diäär nööm, ayï ɣɔ̈kkuön piɛth ayï mul.

¹⁷ Abï töŋ de thiëër de ɣɔ̈kkun nööm ke ye athölbɔ̈, ku week gupkun, we bï aa lïïmke.

¹⁸ Të lee ee köölë bɛ̈n, we bï dhiau arëët në biäk bïï ë we luök ë melikduön cäk lɔc, ku Bɛ̈nydït acïï lɔ̈ŋdun bï piŋ.”

¹⁹ Ku kɔc akënkï jam de Thamwɛl bɛ̈n piŋ, gokï lueel an, “Ei, wok kɔɔr melik bïï wook wat,

²⁰ agoku ciët juöör kɔ̈k kedhie, meliŋ bï wook wat ku ye cath në wonïïm tueŋ ku thɛ̈ɛ̈r tɔŋda.”

²¹ Na wën aacï Thamwɛl ka cï kɔc lueel kedhie piŋ, go ke bɛ nyɔkiic në Bɛ̈nydït nɔm.

²² Go Bɛ̈nydït bɛ̈ɛ̈r an, “Piŋ jamden ku gämë keek melik.” Ago Thamwɛl lɛ̈k kɔc ke Yithriɛl ëbɛ̈n në baŋ bïï ŋɛk aa lɔ wunden.