1 Tham 7 - JAM DE NHIALIC 2011

¹ Go kɔc ke Kiriath Jiriim Athänduŋ de Män ë Bɛ̈nydït nööm ku leerkï paan ë raan cɔl Abinadap, Abinadap aa rɛ̈ɛ̈r ë kuur lɔ̈ɔ̈m. Agokï Eleyadhar wënde lɔc bï ye muk.

Thamwɛl Awat Kɔc ke Yithriɛl

² Athänduŋ de Män ë Bɛ̈nydït acï bɛ̈n ceŋ arëët ë Kiriath Jiriim ë run Kathiërrou. Ku ee runkë yiic baai de Yithriɛl ëbɛ̈n acïk bɛ̈n dhiau arëët në baŋ bïï Bɛ̈nydït keek kony.

³ Ago Thamwɛl lɛ̈k baai de Yithriɛl an, “Na lak wenïïm puɔ̈k Bɛ̈nydït në piɔ̈ɔ̈thkun ëbɛ̈n, ke we pälkï yiëth ke juöör ëbɛ̈n ku kïn de yanh cɔl Acetaroth. Takï röt ee kɔc ke Bɛ̈nydït ku Yen bäk aa lɔ̈ŋ Yetök, ago week kony ë kɔc ke Pilithiin cin.”

⁴ Ago Yithriɛl yiëth ku ka ye lam nyuɔp piny, ayï Baal ku Acetaroth. Ku jɔkï Bɛ̈nydït lɔ̈ŋ Yetök.

⁵ Go Thamwɛl kɔc ke Yithriɛl cɔɔl bïk kenïïm lɔ mat të cɔl Midhpa, ku lëk keek an, “Yɛn bï Bɛ̈nydït lɔ lɔ̈ŋ në biäkdun ëtɛ̈ɛ̈n.”

⁶ Agokï kenïïm lɔ kut Midhpa. Gokï pïïu gem, ku wɛ̈lkï keek piny ke ye miɔ̈c de Bɛ̈nydït, ku reeckï këcam ee köölë yic ëbɛ̈n. Gokï lueel an, “Wok cï awäc luöi Bɛ̈nydït.” (Go Thamwɛl agööth ke Yithriɛl guiir në Midhpa.)

⁷ Na wën aacï Pilithiin ye piŋ nɔn cï Yithriɛl kenïïm kut në Midhpa, go meliik ke Pilithiin kadhïc ku kɔckɛn ke tɔŋ jäl bï ke lɔ mak. Na wën piŋ kɔc ke Yithriɛl yen gokï riɔ̈ɔ̈c arëët,

⁸ agokï lɛ̈k Thamwɛl an, “Ee Bɛ̈nydït Nhialicda lɔ̈ŋ ë ceŋ, ke wo cïï kɔc ke Pilithiin bï nɔ̈k.”

⁹ Na wën ke Thamwɛl ë näk nyɔɔŋ thiin de amääl ku nyop ëbɛ̈n në mac ke ye miɔ̈c de Bɛ̈nydït. Ago Thamwɛl Bɛ̈nydït lɔ̈ŋ në biäk bï Yen kɔc ke Yithriɛl kony, ago Bɛ̈nydït lɔ̈ŋde piŋ.

¹⁰ Të wën ŋoot ë Thamwɛl ke gëm Bɛ̈nydït miɔ̈c ye nyop ëbɛ̈n, go Pilithiin guɔ bɛ̈n tëthiɔ̈k bïk Yithriɛl bɛ̈n mak, ago Bɛ̈nydït keek rël yiic paannhial. Agokï nïïm mum taitai ku riɔ̈ckï.

¹¹ Go Yithriɛl kenïïm kut ë Midhpa ku copkï Pilithiin abïk ɣet të lɔ Bethkar, ku thölkï keek ë näk ë kueer këc.

¹² Na wën ke Thamwɛl ë nöm kuur, ku wec piny në kaam de Midhpa kekë Cen, lueel an, “Bɛ̈nydït acï wo kony ee kakë yiic kedhie.” Ku jɔ ëtɛ̈ɛ̈n cäk an, “Kuur ë kuɔɔny.”

¹³ Gokï kɔc ke Pilithiin jɔ tiaam, ago Bɛ̈nydït ke pɛ̈n luɔi peec kek wuöt ke Yithriɛl wään ŋoot ë Thamwɛl ke pïïr.

¹⁴ Ku wuöt wään cï Pilithiin keek peec në kaam de Ekeron kekë Gath acï keek dɔ̈k nïïm Yithriɛl, go Yithriɛl wuötke nööm kedhie. Ku ëtɛ̈ɛ̈n mät acï bɛ̈n tɔ̈u e kaam de Yithriɛl kekë kɔc ke Kanaan.

¹⁵ Ku Thamwɛl acï bɛ̈n tɔ̈u ke ye bɛ̈ny de Yithriɛl në pïïrde yic.

¹⁶ Në ruöön thok ëbɛ̈n aaye cath ke lɔ Bethel, ku Gilgal ku Midhpa, ku ye löŋ guiir në ee ɣäänkë yiic.

¹⁷ Ku aaye yenɔm dak baaiden në Rama, të wään yen luui thïn ke ye bɛ̈ny de luk. Na wën ke yïk yïk Bɛ̈nydït në Rama.