1 Tham 6 - JAM DE NHIALIC 2011

Athänduŋ de Mät Apuk nɔm

¹ Na ɣɔn aacï athänduŋ de mät pɛ̈i aa dhorou ke rëër paan ë Pilithiin,

² go kɔc ke Pilithiin gucken ku tïtken cɔɔl ku lopkï keek an, “Eeŋö buk luöi Athänduŋ de Män ë Bɛ̈nydït? Nyuöthkï wook kueer bï wok e pɔ̈k nɔm kɔc de yen.”

³ Gokï puk nɔm an, “Na kaarkï an pɔ̈kkï Athänduŋ de Män ë Nhialic de Yithriɛl nɔm, ke duökï puk nɔm baaŋ, takï cath kekë miɔ̈c de awäc. Ku ëtɛ̈ɛ̈n, wek bï gup jɔ pial në jɔɔk, ku abäk jɔ ŋic ëgɔk yen kën ë lui en we këtuc.”

⁴ Go kɔc ke Pilithiin ke luɔp an, “Ku ee miɔ̈c de awäc cït ŋö buk jɔ gäm en?” Agokï puk nɔm an, “Luɔikï ŋoiŋooi ka adhääp kadhïc ke ke kït gup, ku cuɛ̈ckï cuɔl kadhïc në adhääp thöŋkï ke kuën ke bäny ke Pilithiin kedhie, në luɔi ë cïï jɔk we dɔm wedhie ayï bänykun kedhie kadhïc.

⁵ Cuɛ̈ckï gup ke kak ë riäk pinydun, ŋoiŋooi ke pii, ku cuɔl, ku dhuɛ̈ŋkï Nhialic de Yithriɛl guöp. Tɛk däŋ cïï we bï bɛ luöi këtuc në yiëthkun, ku pinydun.

⁶ Eeŋö duɛ̈ɛ̈rkï wenïïm tɔ ril cï melik de Rip kekë kɔcke? Wään bïï Nhialic ke luöi këtuc acïk kɔc ke Yithriɛl bɛ̈n pɔ̈l ajäl ë Rip.

⁷ Ka week kiëëtkï abël, ku kaarkï ɣɔ̈k tur kaarou, ɣɔ̈k kën kɔn thel ku takï ke thel abël, ku tääukï daauken ë luakic.

⁸ Ku jatkï athänduŋ de män ë Bɛ̈nydït në abëlic, ku tääukï adhäm de miɔ̈c de awäc në athänduŋ däŋ yic, ku jatkï abëlic ayadäŋ. Ku ruackï abël cök kueer ku takï lɔ yetök.

⁹ Ku woikï na bïï lɔ, na le yenɔm wɛl wun cɔl Beth Cemec, ke ŋiɛckï nɔn Yen Nhialic de Yithriɛl Yen ë yïn wook ee jɔɔkë. Ku na kën yenɔm wɛl Beth Cemec, ka abuk jɔ ŋic nɔn cie Yen ë yïn wook ee jɔɔkë, ka jɔɔk aake bɔ̈ kapäc tei.”

¹⁰ Ago kɔc ɣɔ̈k tur kaarou nööm, ɣɔ̈k kën abël kɔn thel ku dutkï kekɔ̈ɔ̈th abël, ku guurkï daauken luɛɛk.

¹¹ Ku jiɛtkï Athänduŋ de Män ë Bɛ̈nydït në abëlic, ku jiɛtkï athänduŋ däŋë nhial ayadäŋ, athänduŋ de yic ŋoiŋooi ka adhääp cï thɔ̈ŋ gup pii ku kɔ̈k cï thɔ̈ŋ gup cuɔl.

¹² Ago ɣɔ̈k kueer dɔmic ke ke lɔ Beth Cemec, ciɛthkï ke ke lɔ. Agokï baaric ke ke cïï röt yɛl ciɛɛm ku cïkï röt yɛl cuëëc. Ago bäny ke Pilithiin ke ruac cök kueer abïk jɔ ɣet në aken ë Beth Cemec nɔm.

¹³ Ku ëtɛ̈ɛ̈n, kɔc ke Beth Cemec aake tem agamɔken në wakic. Na wën aa jiɛtkï kenyïïn nhial ke ke tïŋ Athänduŋ de Män ë Bɛ̈nydït, agokï piɔ̈ɔ̈th miɛt në tïŋde.

¹⁴ Na wën ke abël ëbɔ̈ ku kɛ̈ɛ̈c ë kuur dït lɔ̈ɔ̈m kueer ë dom ë raan cɔl Jocua, raan wun ë Beth Cemec. Ago kɔc guëër ku ɣɛ̈ɛ̈rkï tiim ke abëlic ku näkkï ɣɔ̈k ku gëmkï ke Bɛ̈nydït ke ye miɔ̈c ye nyop ëbɛ̈n.

¹⁵ Ku të thiin wën bïï abël, go kɔc ke Lebai athänduŋ de män ë Bɛ̈nydït jɔ̈t bei në abëlic kekë athänduŋ däŋ de yic awëc, ku tɛ̈ɛ̈ukï keek në kuurdïïtë nɔm. Ago kɔc ke Beth Cemec Bɛ̈nydït jɔ gäm miɔ̈c ye nyop ëbɛ̈n ku miɔ̈c juëc kɔ̈k.

¹⁶ Ago bäny ke Pilithiin kë loikï gɔɔk ëbɛ̈n, ku pukkï kenïïm Ekeron në ee kööl manë.

¹⁷ Yen luɔi ë gëmë kɔc ke Pilithiin miɔ̈c de awäc Bɛ̈nydït ka, aake ye ŋoiŋooi ka adhääp kadhïc ke ke thöŋ në pii, tök ke wun tök në wuötken yiic: Acedɔd ku Gadha, ku Acekelon, ku Gath, ku Ekeron.

¹⁸ Ku toockï cuɔl ka adhääp kadhïc ayadäŋ, në pɛ̈ɛ̈nydït ke meliik ke Pilithiin kedhie, pänydït aaye col gam ke ye awëc, pɛ̈ɛ̈nydït cï gël ayï bɛ̈i kënë gël. Ku kuurdïït ɣɔn nu dom de Jocua në Beth Cemec, kuur ɣɔn tɛ̈ɛ̈u kek Athänduŋ de Män ë Bɛ̈nydït ë yenɔm aŋoot ke nu ëtɛ̈ɛ̈n, ku aŋoot ke ye kɔc täk nïïm në kë ɣɔn cï rɔt looi.

¹⁹ Ku Bɛ̈nydït aacï kɔc kathiërdhorou bɛ nɔ̈k në kɔc ke Beth Cemec yiic, në luɔi cï kek Athänduŋ de Bɛ̈nydït luiitic. Ago kɔc piɔ̈ɔ̈th dhiau arëët në luɔi cïï Bɛ̈nydït kɔc juëc nɔ̈k në keyiic.

Athänduŋ de Mät anu ë Kiriath Jiriim

²⁰ Na wën ke lueel kɔc ke Beth Cemec an, “Nhialic aɣeric, eeŋa duëër kɔ̈ɔ̈c ë yenɔm? Ka buk jɔ lɛɛr ënou?”

²¹ Agokï kɔc tuɔɔc Kiriath Jiriim lek lɛ̈k keek an, “Kɔc ke Pilithiin acïk Athänduŋ de Män ë Bɛ̈nydït puk nɔm. Ka week bäk diëckï.”