1 Tham 5 - JAM DE NHIALIC 2011

Athänduŋ de Mät anu ë Kɔc ke Pilithiin Yiic

¹ Na ɣɔn cï kɔc ke Pilithiin Athänduŋ de Män ë Nhialic peec, gokï jɔt në Ebenedher leerkï Acedɔd.

² Na wën ke ke leer Athänduŋ de Män ë Nhialic luaŋ yaath de Dagon, ku tɛ̈ɛ̈ukï në Dagon lɔ̈ɔ̈m.

³ Na ɣɔn amiäk pɛ̈ɛ̈c ë kɔc ke Acedɔd, ke ke lɔ luaŋ de Dagon, gokï Dagon yök ke cï wïïk ke gut yenɔm piny në Athänduŋ de Män ë Nhialic nɔm tueŋ, gokï Dagon jɔt ku pukkï nɔm tëde.

⁴ Na ɣɔn amiäk ë kööl däŋë të wën pɛ̈ɛ̈c kek gokï Dagon yök acï wïïk ke gut yenɔm piny në Athänduŋ de Män de Bɛ̈nydït nɔm tueŋ. Ku acï nɔm dhuɔɔŋ kekë cökke, ku adɛlkï piny tɛ̈n ë nïn nɔm, ale dɔ̈ŋ ke ye guöpde yetök.

⁵ (Yeka cïï tït ke Dagon ee tɛ̈ɛ̈k ë nïn nɔm, ayï kɔc kɔ̈k ee lɔ luaŋ de Dagon në Acedɔd, acïkï ee tɛ̈ɛ̈k ë nïn nɔm aɣet cï ënɔɔnë, gɔl ë kööl ë gɔ̈ɔ̈rë ee jamë.)

⁶ Ago Bɛ̈nydït kɔc ke Acedɔd luöi këtuc, ayï wuöt thiääk në yen, ku tɔ keek tɔ dɔm ë jɔŋ cɔl apeŋeŋ, ago kɔc ke Acedɔd riääc ku tɔ ke jeth piɔ̈ɔ̈th.

⁷ Na wën aa lɔ kɔc ke Acedɔd ye tïŋ, yen kë loi rɔt, gokï lueel alëyɔ̈ɔ̈ an, “Athänduŋ de Män ë Nhialic de Yithriɛl acïï bïï pɔ̈l atɔ̈u ke wook ee tënë, në biäk cï Bɛ̈nydït wo luöi këtuc në yanhdan Dagon.”

⁸ Agokï röördït ke wuöt ke Pilithiin cɔɔl, ku thiëckï keek an, “Eeŋö buk looi në Athänduŋ de Män ë Nhialic de Yithriɛl?” Gokï puɔ̈k nɔm keek an, “Takï Athänduŋ de Män ë Nhialic de Yithriɛl leerë Gath.”

⁹ Agokï Athänduŋ de Män ë Nhialic de Yithriɛl lɛɛr Gath. Ku wën cïï kek en lɛɛr ëtɛ̈ɛ̈n, go Bɛ̈nydït wut luöi këtuc, ku tɔ keek riɔ̈c aläl, ë riɔ̈ɔ̈c dïït cï kɔc tɔ̈u wutic bɛ̈n dɔm ëbɛ̈n, kɔc kor ku röördït, ku tɔ keek tɔ dɔm apeŋeŋ kedhie.

¹⁰ Agokï Athänduŋ de Män ë Nhialic tuɔɔc Ekeron. Na wën aa lɔ Athänduŋ de Män ë Bɛ̈nydït ɣet Ekeron, go kɔc ke Ekeron kiɛɛu puɔ̈l arëët an, “Acïk Athänduŋ de Män ë Nhialic de Yithriɛl bɛ̈ɛ̈i ee tënë, ke bï wook bɛ̈n nɔ̈k ku nɛ̈k kɔckuɔ kedhie!”

¹¹ Gokï bäny ke wuöt ke Pilithiin cɔɔl kedhie ku lueelkï an, “Athänduŋ de Män ë Nhialic de Yithriɛl abï lɛɛr tëdɛn wään bïï ë yen thïn, ago wook cuö näk ku nɛ̈k bɛ̈ikuɔ.” Wut aacï yic dɛk riɔ̈ɔ̈c dït, në baŋ cïï Nhialic kɔc luöi këtuc arëët.

¹² Ku kɔc wën cï poth ë thuɔɔu thok acïï apeŋeŋ ke bɛ̈n dɔm, agokï kiɛɛu dït luɔc paan nhial bïï ke kony.