1 Tham 31 - JAM DE NHIALIC 2011

Thon ë Thaulo kekë Wɛ̈ɛ̈tke

¹ Go kɔc ke Pilithiin tɔŋ thɔ̈ɔ̈r në kɔc ke Yithriɛl në kuur de Gilbowa nɔm. Go kɔc juëc ke Yithriɛl nɔ̈k ëtɛ̈ɛ̈n, ku kɔt kɔc kɔ̈k ayï melik Thaulo kekë wɛ̈ɛ̈tke.

² Go kɔc ke Pilithiin ke gïth ku näkkï wɛ̈ɛ̈t ke Thaulo kadiäk Jɔnathan, ku Abinadap ku Malkicua.

³ Tɔŋ aa cï dït arëët ë melik Thaulo lɔ̈ɔ̈m, ago melik Thaulo moc në dhaŋ de kɔc ke ater, ku gëm guöp buɔ̈t dït.

⁴ Go Thaulo dhuŋ muk kakɛn ë tɔŋ yɔ̈ɔ̈k an, “Bɛ̈ɛ̈iyë abätäudu bei ku näk ɛn, ke ya cïï kɔc kuc Nhialic bï bɛ̈n leeŋ ku näkkï yɛn.” Ku dhuŋ ee kakɛn ë tɔŋ muk aacï riɔ̈ɔ̈c arëët në luɔi bïï yen kë cït ee kënë looi.” Go Thaulo abätäude nööm ku cuɛt rɔt në ye thok.

⁵ Na wën cï dhuŋ ee kakɛn ë tɔŋ ye tïŋ nɔn cïï Thaulo thou, go rɔt cuat në abätäude thok aya agokï thou kekë Thaulo ëtök.

⁶ Yen thon ë thouwë Thaulo kekë wɛ̈ɛ̈tke kadiäk ka, ku lɔ dhuŋ ee kakɛn ë tɔŋ muk, ago kɔc ke Thaulo kedhie thou ee köölë.

⁷ Na ɣɔn aa lɔ kɔc ke Yithriɛl tɔ̈u ë Wak de Jedhreel nɔm lɔɔk ye piŋ nɔn cïï rem de tɔŋ ë Yithriɛl kat ku Thaulo kekë wɛ̈ɛ̈tke acï ke nɔ̈k, acïk wuötken bɛ̈n nyääŋ piny ku kɔtkï. Go kɔc ke Pilithiin bɛ̈n ku ɣapkï wuöt.

⁸ Na ɣɔn ë kööl ë tɔŋ cök ke Pilithiin ë ke lɔ ku rumkï gup ke kɔc cïk nɔ̈k, gokï guöpde Thaulo kekë wɛ̈ɛ̈tke kadiäk lɔ yök, ke ke tɔ̈u piny në kuur de Gilbowa nɔm.

⁹ Gokï Thaulo tɛ̈ɛ̈m nɔm bei, ku bïïkï kakɛn ë tɔŋ bei në yeguöp, ku jɔkï thok tuɔɔc në wuöt ke Pilithiin yiic bïk thoŋ de wëlpiɛth lɔ lɛ̈k yiëthken ku kɔcken.

¹⁰ Ëtɛ̈ɛ̈n gokï kakɛn ë tɔŋ tääu ë luaŋ de yanh cɔl Acetaroth yic, ku jɔkï guöpde piäät në päny de wun cɔl Beth Can kɔ̈u.

¹¹ Na ɣɔn aa lɔ kɔc ke Jabec tɔ̈u në Giliyad ye piŋ yen kë cïï kɔc ke Pilithiin luöi Thaulo,

¹² go jööt ril röt jɔt, ku ciɛthkï në wɛ̈ɛ̈ric ëbɛ̈n ke ke lɔ Beth Can. Gokï gup ke Thaulo kekë wɛ̈ɛ̈tke bɛ̈ɛ̈i piny në päny kɔ̈u, ku bïïkï ke Jabec ku nyopkï keek ëtɛ̈ɛ̈n.

¹³ Na wën ke ke nöm yom ku jɔkï keek tɔ̈ɔ̈u në tim thar wutic, ku jɔkï cäm rɛɛc në nïn kadhorou.