1 Tham 30 - JAM DE NHIALIC 2011

Tɔŋ në Kɔc ke Amalek

¹ Na ɣɔn cï Debid ɣet Dhiklak kekë kɔcke në kööl ee kek diäk, ke ke yök kɔc ke Amalek acïk tɔŋ luöi piny ë Juda në baŋ të lɔ wöuwic ku mɛkï kɔc ke Dhiklak. Gokï wut ɣök mac ëbɛ̈n,

² ku peckï diäär kedhie, ku acïn raan cïk nɔ̈k, aake jɔt kɔc tɔ̈u wutic kedhie wën jiël kek.

³ Na wën aa lɔ Debid bɛ̈n kekë kɔcke, gokï wut yök ke cï nyuɔp piny ku yökkï diäärken, ku mïthken, ku duetken acï keek peec.

⁴ Go Debid kekë kɔcke dhiau aläl ku reeckï mim agut të bï keek jɔ bäp ke ke cïï dhiëëu be lëu.

⁵ Ayï diäär ke Debid kaarou, yï Aɣinowam de Jedhreel kekë Abigail tiiŋ abaar de Nabal raan wun ë Karmel, acï keek jɔt aya.

⁶ Go Debid nuan aläl, në biäk cïï kɔcke piɔ̈ɔ̈th kɛc ku luelkï an bïk Debid biɔ̈ɔ̈k në kur ë këde mïthken ku diäärken ku duetken, ku Bɛ̈nydït Nhialic acï Debid bɛ̈n riit piɔ̈u.

⁷ Go Debid lɛ̈k Abiathar wën ë Aɣimelek, bɛ̈ny de kake Nhialic an, “Gamë yɛn ajïpɔ,” go Abiathar ajïpɔ yiɛ̈n en.

⁸ Go Debid Bɛ̈nydït luɔp an, “Bä lɔ ee kɔckë cök? Ku bä keek gïth?” Go puɔ̈k nɔm en an, “Lɔ ë kecök abä ke lɔ gïth, ku yïn bï kɔc cï peec dɔ̈k nïïm ciëën.”

⁹ Go Debid kekë bot kadhetem de kɔcke jäl, na wën aa cïk ɣet të de awuöl de Bethor, go kɔc kɔ̈k döŋ ëtɛ̈ɛ̈n.

¹⁰ Go Debid lɔ tueŋ kekë bot kaŋuan de kɔc, ku bot kaarou ke kɔc wën cï dak në luɔi teem kek awuöl acïk döŋ ciëën ë Bethor.

¹¹ Go kɔc wën cath ë Debid lɔ rɔm ë mɛnh ë Rip rooric, gokï yiɛ̈n Debid. Gokï gäm këcam ku pïïu go cam ku dëk,

¹² ku gëmkï mïth ke ŋaap cï riɛl, ku kuïïn cï pam kaarou. Na wën cï thök ë cäm ke jɔ guöp riɛl, ku aa cï nïn kadiäk ku wɛ̈ɛ̈r kadiäk thöl ke cïï cäm ku cïï dëk.

¹³ Go Debid luɔp an, “Eeŋa yen ee bɛ̈nydun, ku ee tënou yen ë bïï yïn thïn?” Go bɛ̈ɛ̈r, an, “Yɛn ee raan ë Rip, ku ya lïm de raan de Amalek, bɛ̈nydï acï ya nyääŋ piny në biäk cï juäi yɛn dɔm, në nïn kadiäk cï tëëkë.

¹⁴ Wok aa cï tɔŋ lɛɛr Kereth të lɔ wöuwic de Juda, ku leerku tɔŋ, dhiën de Kalep, ku jɔku Dhiklak ɣök mac.”

¹⁵ Ago Debid lɛ̈k en an, “Bä wo lɛɛr të tɔ̈u ë rem de tɔŋ?” Ago pɔ̈k nɔm en an, “Yïn bä nyuööth të le yïn kuëëŋ në rin ke Nhialic, nɔn cïn ɛn bï nɔ̈k ku cïï ɛn bï thɔ̈n bɛ̈nydï.”

¹⁶ Ago Debid lɛɛr të tɔ̈u rem de tɔŋ thïn. Ku yökkï kɔc ë pec kɔc acïk röt tɛk piny, aciëmkï, ku dëkkï ku jɔkï piɔ̈ɔ̈th miɛt në kajuëc cï keek peec paan ë Pilithiin kekë Juda.

¹⁷ Na ɣɔn amiäk adurduur ke Debid ë loi tɔŋ ke keek aɣët cï ɣɔn thëën. Ale döŋ ke ye bot kaŋuan ke dhuök cï thɔ̈rɔ̈ɔ̈l guiëk kɔ̈ɔ̈th ku jiëlkï, acïn raan töŋ cï ban ë keyiic.

¹⁸ Go Debid ka cï kɔc ke Amalek peec ëbɛ̈n bɛ̈ɛ̈i ciëën, agut cï diäär ke kaarou,

¹⁹ acïn töŋ cï määr e käŋ yiic kedhie. Debid acï kɔcke, ku wɛ̈ɛ̈tke, ku duetke pɔ̈k nïïm ciëën, ku lɔ kajuëckɛn wään cïï kɔc ke Amalek ke jɔt.

²⁰ Go kɔcke këriëëc ëbɛ̈n ɣɔ̈k, ku thök, ku mul, ku thɔ̈rɔ̈ɔ̈l dak ë kenïïm tueŋ, ku luelkï an, “Ee kakë Debid!”

²¹ Na wën, ke Debid puk e nɔm bot kaarou ke kɔckɛn wään cï döŋ ke ke kën lɔ tɔŋ në baŋ cïï kek dak arëët agokï döŋ në awuöl de Bethor lɔ̈ɔ̈m. Na wën ke ke loor Debid nɔm kekë kɔckɛn ke tɔŋ, go Debid keek lɔ thiëëc ke mit piɔ̈u.

²² Na wën ke lueel kɔc kɔ̈k rac kɔc cïn piɔ̈ɔ̈th në ke yiic, kɔc wään cath ë Debid an, “Akënkï lɔ në wook ëtök, ka cuk keek bï miɔɔc ë ka wään lok peec. Ë ke nööm diäärken ku mïthken, ku ë ke jël.

²³ Go Debid lɛ̈k keek an, “Mïthëkɔckuɔ, kë cït ee kënë acäkkï duëër looi, në kake gëm ë Bɛ̈nydït ke wook! Acï wo kony wëi, ku acï wo tɔ tiam kɔc ee kɔc peec.

²⁴ Acïn raan bï mat ke week në kë luɛlkï yic! Käŋ abï keek dhil tek akït, raan cï döŋ ciëën ku raan cï lɔ tɔŋ.”

²⁵ Kënë acï Debid looi ke ee löŋ, ku acï kɔc ke Yithriɛl bɛ̈n kuany cök agut cï ee köölë.

²⁶ Na wën ke Debid puk e nɔm Dhiklak, ku jɔ ka wën cïï peec tuöc määth ke, ku röördït ke Juda an, “Kënë ee miɔ̈c gäm week miɔ̈c wään pec tëde kɔc ke ater ë Bɛ̈nydït.”

²⁷ Go tuɔɔc tëde kɔc ke Bethel, ku kɔc tɔ̈u në Rama ku të lɔ wöuwic de Juda, ku kɔc tɔ̈u në wuöt ke Jatir yiic,

²⁸ ku Aroyer, ku Thipmoth, ku Ecetemowa,

²⁹ ku Rakal, ku dhiën ë Jerɣameel, ku lɔ kɔc ke Ken,

³⁰ ku kɔc tɔ̈u e wuöt ke Ɣorma yiic, ku Boracan, ku Athac,

³¹ ku Ɣebron. Acï keek tɛk piny ëbɛ̈n të wään cï yen tëëk thïn kekë kɔcke.