1 Tham 3 - JAM DE NHIALIC 2011

Nhialic Atul tëde Thamwɛl

¹ Ku Thamwɛl aa luui Bɛ̈nydït ke rɛ̈ɛ̈r kekë Eli, ku në aa köölkë yiic jam ë Bɛ̈nydït aa dak të de kɔc.

² Na ɣɔn wakɔ̈u, të niin ë Eli tëdɛn yen dap tɔ̈c thïn, ku Eli aa cï dhiɔp ku cïï daai be lëu apiɛth.

³ Manyëalath ë Nhialic aa kën guɔ liu, ku Thamwɛl aa nin piny ë Luaŋdïtic, të ye Athänduŋ de Män ë Nhialic tɔ̈u thïn.

⁴ Na wën, ke Bɛ̈nydït ë cɔl Thamwɛl. Go Thamwɛl bɛ̈ɛ̈r an, “Yakï, bɛ̈ny.”

⁵ Go lɔ të nu Eli, ku lueel an, “Ë yï cï ya cɔɔl, yakï eenë.” Go Eli bɛ̈ɛ̈r an, “Yïn kɛ̈n cɔɔl, lɔ ciëën në agen nɔm.” Go lɔ ciëën ku tɛ̈ɛ̈c.

^6-7 Go Bɛ̈nydït Thamwɛl bɛ cɔɔl. Aa kuc ë meth nɔn yen Bɛ̈nydït, në luɔi kën ë Bɛ̈nydït kɔn jam ke yen. Go rɔt jɔt ku lee tëde Eli ku lueel an, “Yïn cï ya cɔɔl, ku yakï eenë.” Go Eli bɛ̈ɛ̈r an, “Yïn kɛ̈n cɔɔl mɛnhdï, lɔ ciëën në agen nɔm.”

⁸ Na wën ke Bɛ̈nydït ë be Thamwɛl cɔɔl në këde diäk an, “Thamwɛl.” Go Thamwɛl rɔt jɔt, ku le tënu Eli, ku lueel an, “Yïn cï ya cɔɔl, yakï eenë.” Go Eli jɔ ŋic nɔn Yen Bɛ̈nydït, Yen ee meth cɔɔl.

⁹ Go Eli lɛ̈k Thamwɛl an, “Lɔ ciëën në agen nɔm ku tɔ̈c, ku të cï yen yïn bɛ cɔɔl, luel an, ‘Jam Bɛ̈nydït, lïmdu apïŋ.”’ Ago Thamwɛl jäl ke lɔ tɔ̈c në agende nɔm.

¹⁰ Go Bɛ̈nydït bɛ̈n ku kɛ̈ɛ̈c në yelɔ̈ɔ̈m, ku cɔɔl cït man awën an, “Thamwɛl, Thamwɛl!” Go Thamwɛl bɛ̈ɛ̈r an, “Jam, lïmdu apïŋ.”

¹¹ Ago Bɛ̈nydït lëk Thamwɛl an, “Ade kë kaar bä luöi kɔc ke Yithriɛl, kë bïï kɔc aa piŋ ku jiethkï piɔ̈ɔ̈th.

¹² Ku ee köölë Yɛn bï këdiën cä lueel në biäk de dhiën de Eli looi ëbɛ̈n, gɔl ë kë tueŋ leer ciëën.

¹³ Ë luöi cän e lëk, an, Yɛn bï dhiëndu luöi këtuc në biäk de kërɛɛc yic, mïthke acïk röt tɔ rac, ku acïn kë cï looi në baŋden. Ku akën keek jɔ̈ɔ̈ny.

¹⁴ Në biäk de ee kënë Yɛn cï kuëëŋ, në biäk de dhiën de Eli an, kërɛɛc ë dhiën de Eli acïï bï waar taitai në thök näk ayï miɔ̈c.”

¹⁵ Go Thamwɛl niin agut cï run de piny. Na wën ke pääc, ku liep Luaŋdït thok, acï riɔ̈ɔ̈c në biäk bï yen Eli lëk nyuöth.

¹⁶ Na wën ke Eli ë cɔl Thamwɛl an, “Thamwɛl wëndï!” Go Thamwɛl lueel an, “Yakï bɛ̈ny.”

¹⁷ Go Eli ye luɔp an, “Thamwɛl mɛnhdï, Eeŋö yen ë lëk ë Bɛ̈nydït yïn, du thian në biäkdï, Nhialic abï piɔ̈u diu kekë yïn aläldïïtë, të le yïn kë cï lɛ̈k yïn thiaan në yɛn.”

¹⁸ Ago Thamwɛl ye lɛ̈k këriëëc ëbɛ̈n, abïï ciën kë dɔ̈ŋ. Na wën ke lueel an, “Yen ee Bɛ̈nydït, abï këdɛn cï tïŋ ke piɛth looi.”

¹⁹ Ku Bɛ̈nydït aa tɔ̈u kekë Thamwɛl të ɣɔn dhuuk en, acïn lɔ̈ŋdɛn cï tɔ lööny piny.

²⁰ Ago kɔc ke Yithriɛl ëbɛ̈n ŋic, gɔl ë Dan leer Biirceba, nɔn ye Thamwɛl tiët de Bɛ̈nydït cï lɔc.

²¹ Go Bɛ̈nydït ŋoot ke nyooth rɔt në Cilo, ago rɔt nyuöth Thamwɛl ëtɛ̈ɛ̈n ku jiɛɛm ke yen. Ku të jiɛɛm ë Thamwɛl aaye kɔc ke Yithriɛl piŋ ëbɛ̈n.