1 Tham 29 - JAM DE NHIALIC 2011

Kɔc ke Pilithiin Areeckï Debid

¹ Na wën, ke kɔc ke Pilithiin ë ke kut kenïïm ëbɛ̈n në Apek, ku jɔ kɔc ke Yithriɛl kenïïm kut në awaŋ de Jedhreel yic.

² Go meliik ke Pilithiin kadhïc jɔ bɛ̈n bei në rem de tɔŋ de bot ku aguum juëc, ku Debid kekë kɔckɛn ke tɔŋ abïkï në kekɔ̈ɔ̈th ciëën në melik Acic.

³ Na wën cï bäny ke rem de tɔŋ ë Pilithiin keek tïŋ, gokï lop an, “Eeŋö looi ë Ɣeberuukë eenë?” Go Acic bɛ̈ɛ̈r an, “Kënë ee Debid, raan ee Thaulo melik de Yithriɛl luööi. Ku yen acï rëër ke yɛn në kaam bääric eenë. Ku acïn kërɛɛc cï wööc në kaam cï yen kök tëde yɛn agut cï ee köölë.”

⁴ Go bäny ke rem de tɔŋ ë Pilithiin gɔ̈th në melik Acic, ku lëkkï en an, “Tɔ raanë puk rɔt wun cï gäm en. Ku du tɔ lɔ tɔŋ kekë wook, tɛk däŋ duëër rɔt lɔ pɔ̈k wook në tɔŋic. Ku ee kueer ou duëër en bɛ̈nyde jɔ miëët piɔ̈u? Cie baŋ duëër en kɔckuɔ nɔ̈k?

⁵ Ku ee yen Debid, raan ɣɔn ye diäär dit kiit an, ‘Thaulo acï agumde nɔ̈k, ku näk Debid aguum kathiëërke.”’

⁶ Na wën ke Acic ë cɔl Debid, ku lueel an, “Yɛn cï kuëëŋ në Nhialic pïïr de Yithriɛl nɔn ee yïn raan ee yɛn riëëu, ku yɛn duëër piɔ̈u miɛt bä lɔ we yɛn ku bä lɔ thɔ̈ɔ̈r ee tɔŋë yic. Acïn kërɛɛc cä yök tëde yïn gɔl në kööl ɣɔn bïï yïn tëde yɛn agut cï ee köölë. Ku meliik kɔ̈k akënkï yï gam.

⁷ Ku ënɔɔnë pɔ̈kë yïnɔm wut në mät, ku du de kë bä looi kë bï ke riɔ̈ɔ̈k piɔ̈ɔ̈th.”

⁸ Go Debid lɛ̈k Acic an, “Eeŋö rɛɛc cä looi bɛ̈ny? Na ee täude ka, cït man cï yïn e lueel an cïn kërɛɛc cï yök tëde ɛn gɔl të wään luööi ɛn yïn, ku eeŋö cän lɔ wokë keek bɛ̈nydï melik, ku laar thɔ̈ɔ̈r we kɔc ke aterdu?

⁹ Ago Acic lueel an, “Agam nɔn ee yïn a riëëu guöp cït tunynhial de Nhialic. Ku acïï meliik kɔ̈kkë lueel an cïï bï lɔ tɔŋ wekë wook.

¹⁰ Ka ënɔɔnë Debid, miäk adurduur week wedhie, wek kɔc wään cï Thaulo nyääŋ piny ku bäkkï të täu ɛn, wek bï röt dhil dap jɔt miäk rial ke piny ë ɣer.”

¹¹ Go Debid jäl ɣɔn amiäk adurduur kekë kɔcke, ke puk enɔm piny de Pilithiin, ku jɔ Pilithiin lɔ Jedhreel,