1 Tham 27 - JAM DE NHIALIC 2011

Debid Arɛ̈ɛ̈r ë Kɔc ke Pilithiin Yiic

¹ Ago Debid jam në yepiɔ̈u an, “Ee nïn kë yiic Thaulo abï yɛn nɔ̈k ka këpiɛth bä looi ë luöi bän rɔt kual la Pilithtia. Yen abïï Thaulo bäp ke kɔɔr yɛn, ku cïï ya yök piny ë Yithriɛl, aguɔ poth.”

² Ago Debid kekë kɔckɛn ke tɔŋ lëu bot kadhetem lɔ tëde Acic wën ë Mawok, melik de Gath.

³ Go Debid kekë kɔcke ɣap piny ë Gath në diëërken ku mïthken. Ku Debid aa rɛ̈ɛ̈r kekë diäärke kaarou, Aɣinowam wun ë Jedhreel ku Abigail, tiiŋ abaar ë Nabal, raan wun ë Karmel.

⁴ Na wën aa piŋ Thaulo nɔn cï Debid rɔt kual Gath, go kɛ̈n bɛ kɔɔr.

⁵ Ago Debid lɛ̈k Acic an, “Na ye mɔ̈th ke yï nyuth ɛn wun thiin bän rëër thïn eenë. Acïï piɛth, bɛ̈ny, bä rëër wo yïn ë pänydïtic.”

⁶ Ago Acic gäm wun cɔl Dhiklak, ku yen kën ë tɔ Dhiklak ee këde meliik ke Juda aɣët cï ee köölë.

⁷ Go Debid jɔ rëër piny de Pilithtia ë pɛ̈i kathiëër ku dhetem.

⁸ Ku në ee runkë yiic Debid kekë kɔckɛn ke tɔŋ aake ye tɔŋ yiɛ̈n kɔc ke Gecur, ku kɔc ke Girdhi, ku kɔc ke Amalek, kɔc wään ceŋ ee pinyë ɣɔn thɛɛr. Aa ye pinyden yiɛ̈n tɔŋ gɔl piny de Cur ɣeet paan ë Rip,

⁹ Aa ye röör ku diäär nɔ̈k ku nööm thök, ku ɣɔ̈k, ku mul, ku thɔ̈rɔ̈ɔ̈l, ayï lupɔɔ. Na lë ke puk yenɔm Acic,

¹⁰ të cï Acic ye luɔp an, “Ee tënou cïn lɔ pëëc ee köölë?” Na lë ke lɛ̈k ë Debid yen an, yɛn aacï lɔ të lɔ wöuwic piny de Juda, ku nɔn ee piny ë dhiën ë Jerɣameel ku nɔn ee të rëër ë kɔc ke Ken thïn.

¹¹ Debid ee kɔc nɔ̈k kedhie, röör ku diäär, abïï ciën raan töŋ dɔ̈ŋ ee kɔckë yiic raan bï yenɔm dak Gath bïï kë cï kɔckɛn ke tɔŋ looi lɔ lueel. Yen kë ye Debid looi ka wään tɔ̈u en piny ë Pilithiin.

¹² Ku Acic aa ŋäth Debid aläl ku aa luel ë yepiɔ̈u an, “Acïï kɔckɛn ke Yithriɛl kuöc maan aläl, ka yen abï yɛn jɔ aa luööi në pïïrde yic ëbɛ̈n.”