1 Tham 24 - JAM DE NHIALIC 2011

Debid Aluäk Thaulo Wëi

¹ Na wën ke Thaulo ë puk yenɔm të wën cop en Pilithiin, go lɛ̈k en nɔn tɔ̈u ë Debid në jɔ̈ɔ̈r de Engedi yic.

² Ago Thaulo aguum kadiäk ke rem de tɔŋ piɛth de Yithriɛl nööm, ku le Debid kɔɔr kekë kɔcke të lɔ aköl amiäk de Kur ke Bon Roor.

³ Go bɛ̈n ë köŋ thiääk kekë kal de thök thok, të lɔ kueer këc, go rɔt yal bï lɔ biic. Ku yen ee kuur manë guöp yen aacï Debid thiaan ë yethar ciëën ya, kekë kɔcke në kökic.

⁴ Gokï lɛ̈k en, an, “Kënë ee miɛtë guöpdu. Acïï Bɛ̈nydït lɛ̈k yïn, nɔn bïï Yen kɔc ke aterdu tääu në yïcin, ku aduëërë luöi këduön kɔɔr bä luöi en.” Go Debid mol ke lɔ të nu Thaulo ku teem lupɔ de Thaulo thok ke kuc Thaulo.

⁵ Ku ëtɛ̈ɛ̈n Debid ë piɔ̈u guɔ wït,

⁶ ago lɛ̈k kɔcke an, “Nhialic abï ya muk ke ya cïï kërac bï luöi bɛ̈nydï, raan cï Bɛ̈nydït lɔc ke ye melik! Yɛn acä bï jak ë yaciin në luöi ee yen meliŋ ë lɔc Bɛ̈nydït!”

⁷ Go Debid kɔcke jɔ̈ɔ̈ny, ku pën keek luɔi bïï kek Thaulo thɔ̈ɔ̈r. Go Thaulo rɔt jɔt ku nyiëëŋ kök piny ku leer ë kueerde yic.

⁸ Na wën, ke Debid ë bɔ̈ bei në kökic ku lee ë yecök cɔɔl, an, “Bɛ̈nydï melik!” Na wën lieec Thaulo yekɔ̈u, go Debid yenɔm guöt piny në riëëu.

⁹ Ku lëk Thaulo, an, “Eeŋö yïn jam de kɔc piŋ, të lueel kek en an kaar bä yïn nɔ̈k?

¹⁰ Ee köölë acï tïŋ në yïnyin luöi cï Nhialic yï tääu në yaciin wën thɛɛr në kökic. Kɔc kɔ̈k acïk ya yɔ̈ɔ̈k an näk yïn, guɔ yïn puɔ̈l, acä lueel nɔn cän yaciin bï tääu në bɛ̈nydï guöp, në luöi cï Bɛ̈nydït yïn lɔc bä ya melik.

¹¹ Tïŋ ënɔɔnë wäär, tïŋ biäk de lupɔduön nu në yaciin! Yɛn cï biäk thiin akäŋ tëëm bei në lupɔdu thok, ku yïn kën nɔ̈k. Ënɔɔnë ŋic ëgɔk nɔn cïn en kërɛɛc kaar bä luöi yïn, ku nɔn cïn en tɔŋ kɔ̈ɔ̈r yïn. Acïn kërɛɛc cä luöi yïn, ku yïn yɔ̈p ɛn bä yɛn nɔ̈k, cakaa nɔn cïn en kë cä wäc yïn.

¹² Bɛ̈nydït abï raan de guöp awäc tïŋ në kaamda wokë yïn! Ku Bɛ̈nydït abï kërɛɛcduön ye luöi ɛn cool nɔm, ku yɛn guöpdï, yɛn cïï yaciin bï tääu në yïguöp.

¹³ Cït man cï kääŋ ɣɔn thɛɛr ye lueel an, ‘Kɔc rac piɔ̈ɔ̈th, ee kek ee karɛc looi.’ Ka yɛn cïï yaciin bï tääu në yïguöp.

¹⁴ Eeŋa jɔ meliŋ de Yithriɛl yiɛ̈n tɔŋ! Eeŋa cop! Cie jööŋ cï thou! Cie raan dhiau!

¹⁵ Bɛ̈nydït abï raan de guöp awäc tïŋ në wo yiic. Abï löŋdï tïŋ ku dɔm aril, abï yɛn thieei ku luɛ̈k ɛn në yïcin.”

¹⁶ Na wën aacï Debid kakë thöl në luɛɛl, go Thaulo dhiau ë röl dït, ku lop an, “Kënë ee röldu! Debid wëndï?”

¹⁷ Go lɛ̈k Debid an, “Yïn cï ya looi apiɛth, ku yïn ya luööi arac!

¹⁸ Ënɔɔnë yïn cï ya piac lëk këpiɛth cï luöi yɛn, Bɛ̈nydït acï ya tääu në yïciin, ago yɛn kɛ̈n nɔ̈k.

¹⁹ Të cïï raan, raan dek kek ater yök, duëër pɔ̈l ke cïï lui kërac? Bɛ̈nydït abï yï thieei apiɛth në biäk de këpiɛth cï luöi yɛn ee köölë.

²⁰ Aŋiɛc nɔn bï yïn aa melik, ku bääny de Yithriɛl abï tɔ̈u në yïciin.

²¹ Ënɔɔnë kuɛ̈ɛ̈ŋë në rin ke Bɛ̈nydït, në luöi cïï yïn mïth ke mïthkï bï riɔ̈ɔ̈r nyïïn, ku cïï keek bï nyaai rin paan de wäär.”

²² Ago Debid kuëëŋ de Thaulo gam. Na wën ke Thaulo ë puk rɔt baai, ku lɔ Debid kekë kɔcke tëdɛn ye kek thiaan thïn.