1 Tham 22 - JAM DE NHIALIC 2011

Nääk de bäny ke kake Nhialic

¹ Go Debid jäl wun ë Gath ku le thiaan në kökic, köŋ thiääk kekë wun de Adulam. Na wën aacï mïthëkɔcken ku kɔc paanden ye piŋ nɔn nu yen ëtɛ̈ɛ̈n, gokï biɔɔth cök ku mɛ̈tkï röt yen.

² Ago kɔc wään yɔŋ keek ayï kɔc cï piɔ̈ɔ̈th dak, ku lɔ kɔc de gup käny röt mat në Debid, aake ye bot kaŋuan kedhie, ku tɔ rɔt ee bɛ̈nyden.

³ Go Debid jäl ëtɛ̈ɛ̈n lee Midhpa në Mowap, ago lɛ̈k meliŋ de Mowap, an, “Yïn läŋ, tɔ wäär kekë maar rɛ̈ɛ̈r në yïn, agut të lan kë köör ë Nhialic ɛn yök.”

⁴ Ago Debid wun kekë man nyäŋ melik de Mowap, ku jɔkï rëër ëtɛ̈ɛ̈n në nïn wään ye Debid tɔ̈u tëde thiaan në kɔ̈k yiic.

⁵ Na wën ke tiët Gad ëbɔ̈ tëde Debid lueel, an, “Jël tëde thiaan eenë raantök ku lɔɔr Juda ku du rɛ̈ɛ̈r eenë.” Go Debid jäl ku lee roor de Ɣereth.

⁶ Na wën aacï Thaulo en ŋic nɔn cï Debid yök kekë kɔcke. Ku Thaulo aa rɛ̈ɛ̈r në tim thar ë Gibia, ke muk tɔŋde ë yeciin, ku jɔ kɔckɛn lɔ ë yecök kɔ̈ɔ̈c ë yecök,

⁷ ago Thaulo lɛ̈k bänyke an, “Piɛŋkï kënë wek kɔc ke Benjamin, bï Debid wën ë Jethe we gäm duum ayï tiim ke enap wedhie, ku bïï week tɔ ye bänydït ke remdɛn ë tɔŋ wedhie?

⁸ Yeka kaar wek bäk yɛn nɔ̈k wedhie? Acïn raan cï yɛn lɛ̈k ɣɔn looi ë wëndï mät kekë Debid, ku acïn raan cï ya yɔ̈ɔ̈k aya an Debid, raan töŋ de kɔckï akɔɔr bï ya nɔ̈k, ku aye wëndï riit piɔ̈u luɔi bïï yen ɛn nɔ̈k!”

⁹ Ku Doweg raan de Edom, aa kääc kekë bäny ke Thaulo, go lueel an, “Yɛn cï Debid wënde Jethe tïŋ ke jäl kekë Aɣimelek wën de Aɣitup wutic ë Nop.

¹⁰ Go Aɣimelek Bɛ̈nydït luɔp në biäkde, ku miɔɔc në këcam ku gëm tɔŋ de Goliath raan de Pilithiin.”

¹¹ Na wën ke melik ë tooc kɔc bïk Aɣimelek wën de Aɣitup lɔ cɔɔl kekë kɔc baaiden kedhie, ayï bäny ke kake Nhialic lui ë Nop, agokï bɛ̈n kedhie tëde melik.

¹² Go Thaulo lëk Aɣimelek an, “Piŋ kënë Aɣimelek!’ Go bɛ̈ɛ̈r an, “Yakï, bɛ̈ny.”

¹³ Go Thaulo lɛ̈k en, an, “Eeŋö kaar wek bä a nɔ̈k wekë Debid? Acï gäm këcam kekë tɔŋ, ku luɔpë Nhialic në këde? Ënɔɔnë aloi tɔŋ kekë yɛn, ku ee ya buuth kueer ke kɔɔr bïï ya nɔ̈k!”

¹⁴ Ago Aɣimelek bɛ̈ɛ̈r, an, “Eeŋa nu në bänyku yiic, raan ee yïn riëëu cït man ë Debid, mony de nyan ë melik, bɛ̈ny de kɔc ee yïn tiit, ku raan ye kɔc riëëu aläl paandu?

¹⁵ Yen ee köölë ee yen ee kööl tueŋ ë luɔp ɛn Nhialic në biäkde? Aŋic acie yen! Du lïmdu kekë paande dhöl yïn melik, në luɔi cïn ë lïmdu kë ŋic në biäk de ee kakë kedhie!”

¹⁶ Go melik lueel an, “Aɣimelek, yïn bï dhil nɔ̈k wekë baai de wuur wedhie.”

¹⁷ Na wën ke melik ë yɔ̈ɔ̈k kɔckɛn ë ye tiit tɔ̈u ë yelɔ̈ɔ̈m an, “Pɔ̈kkï röt ku näkkï bäny ke kake Nhialic de Bɛ̈nydït në luɔi cï kek mat në Debid. Aŋickï nɔn kɛt en, ku akënkï lɛ̈k ɛn.” Go kɔc ee melik tiit jaai në luɔi bï kek kecin tääu në bäny ke kake Bɛ̈nydït gup, bïk keek nɔ̈k.

¹⁸ Na wën ke melik ë yöök Doweg, an, “Yïn puk rɔt ku näk bäny ke kake Nhialic.” Ago Doweg raan de Edom keek nɔ̈k kedhie. Në ee köölë yic acï bäny ke kake Nhialic kathiërbɛ̈t ku dhïc bɛ̈n nɔ̈k, kɔc ee ajïpɔ ɣääc.

¹⁹ Go thaulo kɔc ke Nop, wun de bäny ke kake Nhialic tɔ näk ayadäŋ, ku tɔ röör ku diäär ku mïthdït ku mïthkor, ku ɣɔ̈k, ku thɔ̈k, ku mul näk kedhie.

²⁰ Ku Abiathar wën de Aɣimelek, wën de Aɣitup, aacï rɔt kual ku lee mat kekë Debid.

²¹ Go Debid lɛ̈k nɔn cï Thaulo bäny ke kake Nhialic nɔ̈k.

²² Ago Debid Abiathar yɔ̈ɔ̈k, an, “Kööl wään nu Doweg raan wun Edom ëtɛ̈ɛ̈n, aŋiɛc nɔn bï yen Thaulo dhil lɛ̈k, ee yen de ka nɛ̈kkë baai de wuur ëbɛ̈n.

²³ Rɛ̈ɛ̈rë wekë yɛn, ku du riɔ̈c. Thaulo akɔɔr bïï yïn nɔ̈k ku akɔɔr bï ya nɔ̈k aya, ku yïn bï dhil poth wek yɛn.”