1 Tham 20 - JAM DE NHIALIC 2011

Jɔnathan Akony Debid

¹ Ago Debid rɔt kual në Nayoth ë Rama, ku le tënu Jɔnathan. Ku lëk Jɔnathan an, “Eeŋö cä looi? Ee kërɛɛc ŋö cä wööc? Ee kän ŋö cä wäc wuur, kë bïï näk ɛn?”

² Go Jɔnathan bɛ̈ɛ̈r an, “Yïn bï thok liɛɛr! Acïn kë bï yï nɔ̈k. Acïn kë ye wäär looi ke kën lɛ̈k ɛn, kë koor ku nɔn ee yen kë dït. Ka yen acïï kë cït ee kënë duëër muöny ɛn. Acie yic!”

³ Go Debid bɛ̈ɛ̈r an, “Aŋic ë wuur nɔn nhiɛɛr yïn ɛn, ka amuny yïn ee kënë ke cï bï ŋic, ke yï cïï piɔ̈u bï dhiau. Ku alɛ̈k yïn eenë në Bɛ̈nydït nɔm, an yɛn ë thiɔ̈k aläl wokë thuɔɔu!”

⁴ Go Jɔnathan lɛ̈k Debid an, “Yɛn bï kë kɔɔr ëbɛ̈n looi.”

⁵ Go Debid lɛ̈k Jɔnathan an, “Miäk ruu piny, ee dhuëëŋ de wil ë pɛɛi, ka rɔ̈ŋ bä lɔ cam wokë Melik. Ku ënɔɔnë, na piɛth ë yïpiɔ̈u, ke yɛn duëër jäl la thiaan roor, agut cï rutui thëën.”

⁶ Na lɔ wuur ya dak nɔn liɛɛu ɛn ë këcam nɔm, ke lɛ̈kë yen nɔn cän rɔt lip tëde yïn, nɔn kat ɛn la Bethleɣem në luɔi yen akööl ke miɔ̈c de ruöön thok tëde baaida.

⁷ Na cï gam an, Apiɛth ke ŋic nɔn cïn en kërɛɛc köör ɛn. Na le gɔ̈th, ka bä jɔ guɔ ŋic nɔn de yen kërɛɛc kɔɔr bï luöi yɛn.

⁸ Ka yïn dhuëŋ ɛn guöp, ku döt thön ɣɔn cï thön ɛn. Ku na dɛ guöp awäc, ke yï näk ɛn ë yïn guöp! Acïn këduön duëër yïn ɛn tiët wuur bï ya bɛ̈n nɔ̈k?”

⁹ Go Jɔnathan bɛ̈ɛ̈r an, “Du täk aya! Na piɛŋ en nɔn kɔɔr ë wäär an nɛ̈k yïn, cä duëër lɛ̈k yïn?”

¹⁰ Go Debid Jɔnathan luɔp an, “Eeŋa bï ya lɛ̈k, të le wuur jam puk nɔm në agɔ̈th?”

¹¹ Go Jɔnathan lɛ̈k Debid an, “Jëlku lok roor.” Agokï jäl lek roor.

¹² Na wën, ke lëk ë Jɔnathan Debid an, “Bɛ̈nydït Nhialic de Yithriɛl Yen aye cäätɔ në kaamda. Miäk aköl wälë, yɛn bï wäär luɔp. Na la yök ke köör yï këpiɛth, yïn bä tɔ pïŋ.

¹³ Të lan yen yök ke köör yïn riääk. Yïn bä lɛ̈k ayadäŋ, ku ta yï jäl ke cïn kërɛɛc jak yïn, na de ka thiaan në yïn, cakaa Bɛ̈nydït abï a nɔ̈k ë cökiic. Bɛ̈nydït abï tɔ̈u ke yïn, cït man ɣɔn kɔn en tɔ̈u ke wäär!

¹⁴ Ku na la ŋoot ke ya pïïr, ke yï döt thönduön adöt, cï thɔ̈n ɛn, ku ŋoot ke yï ye ya piŋ thok. Na cä thou,

¹⁵ ke yï löök tɔ̈u wekë baaida apiɛth. Ku të cïï Bɛ̈nydït kɔc de wek ater lɔ̈ɔ̈k riɔ̈ɔ̈k taitai kedhie,

¹⁶ ke thönda wokë yïn abï rëër ë nyinde yic ke cïï rɔt waar, na lɔ dhoŋ kɔ̈u, Bɛ̈nydït abï yï nyuöth kërac.”

¹⁷ Ago Jɔnathan Debid bɛ tɔ kuëëŋ, nɔn nhiɛɛr ɛn Jɔnathan guöp, cït man nhiɛɛr en guöpde.

¹⁸ Go Jɔnathan jɔ lɛ̈k en an, “Nɔn ye miäk kööl de dhuëëŋ de wil ë pɛɛi, yïn bï dak nɔn liu yïn në këcam nɔm.

¹⁹ Ka yïn lɔ thiaanë të ɣɔn kɔn yïn thiaan thïn, lɔ thiaanë në kut ë kur kɔ̈u baŋtui.

²⁰ Yɛn bï wiɛth ke dhaŋ mɔc ëtɛ̈ɛ̈n kadiäk cït kë muuc kuur.

²¹ Ku yɛn bï lïmdï tooc le wiɛth diëc. Na la lɛ̈k lïmdï an, ‘Lɔ wiɛth anukï në yï baŋë, lɔ nöm ke,’ ke yï bɔ̈ bei, acïn kërɛɛc bï yï yök, yɛn ë kuëëŋ në Bɛ̈nydït pïïr.

²² Ku na la lɛ̈k lïm an, ‘Wiɛth anukï në yïkɔ̈u ciëën.’ Ke yï jäl, në luɔi cïï Bɛ̈nydït yï gäm jäl.

²³ Na thöndan nu në kaamda wokë yïn, abïï Bɛ̈nydït tɔ dötku ëgɔk ananda.”

²⁴ Go Debid lɔ thiaan roor. Na wën aa loi dhuëëŋ de wil ë pɛɛi, ke melik Thaulo ë lɔ në këcam nɔm,

²⁵ ku nyuuc tëdɛn yen dap nyuc ke thiääk ke päny, ku nyuc Abener në ye lɔ̈ɔ̈m, ku nyuc Jɔnathan ke wël enɔm en. Ku tëde Debid aa cïnic raan,

²⁶ ku acïn kë cï Thaulo bɛ̈n lueel ee köölë aaye lueel në yepiɔ̈u an, “Dhil dɛ kë cï Debid yök, ka cïï guöp piath.”

²⁷ Na në kööl ye akööl rou, tëde Debid aa ŋoot ke cïnic raan, go Thaulo Jɔnathan luɔp an, “Eeŋö kɛ̈në Debid bɛ̈n cam ee köölë, ayï wään aköl?”

²⁸ Go Jɔnathan bɛ̈ɛ̈r an, “Acï ya yɔ̈ɔ̈k nɔn päl ɛn en alɔ Bethleɣem.

²⁹ Lueel an, ‘Yɛn cïï wäänmääth tuöc thok an la Bethleɣem, në luɔi de baaida nɔm dhuëëŋ de miaac ee köölë wut. Ka na ye mäth ë yic, ke yï tɔ ya lɔ tënu baaida.’ Yen ke liiu en ka tëduön ë cäm.”

³⁰ Go Thaulo Jɔnathan ŋɛ̈ny arëët, ku lëk en an, “Tïŋ! Mɛnh ë tiiŋ cïn thaarde, tiiŋ cïï kake kɔc ee piŋ. Në yïn an kuöc luɔi cï yïn wën ë Jethe lɔc yɔ̈ɔ̈r yïn rɔt, ku yɔ̈ɔ̈r moor ayadäŋ!

³¹ Kuc luɔi cïï yïn duëër kɔn aa melik de ee pinyë të pïïr ë Debid? Jäl ënɔɔnthiinë lɔ bɛ̈ɛ̈iyë bä bɛ̈n nɔ̈k!”

³² Go Jɔnathan bɛ̈ɛ̈r an, “Eeŋö cï looi kë nɛ̈kë yen?”

³³ Go Thaulo tɔŋ kuany, ku thɛ̈ɛ̈r Jɔnathan an nɛ̈k. Go Jɔnathan ja gam ëyic nɔn kɔɔr ë wun bïï Debid nɔ̈k.

³⁴ Go Jɔnathan rɔt jɔt ë këcam nɔm ke cï ŋeeny arëët, ku koon këcam ku jiël. Acï piɔ̈u riääk në këde Debid, në biäk cïï wun en yɔŋ.

³⁵ Na ɣɔn miäk ke Jɔnathan ë lɔ roor tënu Debid cït man wään cï kek e mat. Go wën thiinakäŋ tɔ cath ke yen.

³⁶ Na wën, ke lëk en an, “Kɔt lɔ diëcë wiɛth ke dhaŋ, abä ke moc ënɔɔnthiinë. Ago meth kat, ku moc Jɔnathan with në yekɔ̈u ciëën.

³⁷ Na wën, aacï meth ɣet të wën cïï with lööny thïn, ke lëk ë Jɔnathan en an, “With anu ë yïkɔ̈u ciëën!

³⁸ Dap kat du kääc tei aya baaŋ! Dap bɛ̈n!” Go meth with kuany, ku bïï ciëën ke rïŋ, yïn Jɔnathan,

³⁹ ku meth akuc kë loi rɔt, ee Jɔnathan kekë Debid kek aŋic kë loi rɔt.

⁴⁰ Ago Jɔnathan meth gäm tɔɔŋke leer ke wut.

⁴¹ Na wën aacï meth jäl, ke Debid ë jɔt rɔt në kut ë kur kɔ̈u ku bïï yenɔm bɛ̈n guöt piny në Jɔnathan nɔm raan diäk. Ku dhiaukï kedhie kekë Jɔnathan, ku cimkï kethook. Debid aacï piɔ̈u dhiau aläl awär Jɔnathan.

⁴² Go Jɔnathan lɛ̈k en an, “Lɔ, Nhialic abï tɔ̈u ke yïn. Ku Bɛ̈nydït abï wo tɔ muk thöndanë yic ananda, ku tɔ muk ë mïthkuɔn bï lɔ̈ɔ̈k tɔ̈u në wocök ciëën ananden ayadäŋ.” Ago Debid jɔ baaric ku puk Jɔnathan e nɔm wut.