1 Tham 2 - JAM DE NHIALIC 2011

Lɔ̈ŋ de Ɣana

¹ Go Ɣana lɔ̈ŋ ayadäŋ ku lueel an: “Piɔ̈ndï amit në Bɛ̈nydïtic, yɛn mit piɔ̈u arëët në biäk de kë cïï Bɛ̈nydït luöi ɛn! Ee yɛn tɔ dɔl kɔc ke ater gup, yɛn mit piɔ̈u aläl në luääkde!

² “Acïn raan ɣeric cït Bɛ̈nydït, acïn raan töŋ duëër kït kekë Yïn, acïn kony nu cït Nhialicda,

³ Du ee cool ë jam ke yï leec rɔt, ayï jam ee yïn jam ke yï ɣɛ̈ɛ̈c yïnɔm. Në luɔi ŋic ë Bɛ̈nydït Nhialic këriëëc ëbɛ̈n, ku Bɛ̈nydït ee këriëëc ye raan ëbɛ̈n looi them.

⁴ Kɔc ril ke tɔŋ ayek kɔ̈c, ku kɔc kɔ̈c ayek riɛl yök.

⁵ Ku kɔc wään cï keek ŋiëc muk apiɛth, ënɔɔnë acïk röt riap bïk lui, ago keek riɔp në kë bïk cam, ku kɔc wään ye cɔk keek nɔ̈k acïk kuɛth. Tiiŋ cïn nɔm meth acï mïth kadhorou dhiëëth, ku man mïth juëc, acïn töŋ cï döŋ ke yen.

⁶ Ku Bɛ̈nydït Yen ee thuɔɔu bɛ̈ɛ̈i kekë pïïr, ee Yen ee kɔc tuɔɔc paan ë thuɔɔu, ku nyɔk ë dɔk Yen kenïïm ciëën.

⁷ Yen ee kɔc kɔ̈k gäm nyin kuany, ku tɔ kɔc kɔ̈k tɔ kueth, Yen ee kɔc kɔ̈k kuɔɔr piny ku jɔt kɔc kɔ̈k nhial.

⁸ Ee abuur nyaai në buurde yic, ku tɔ bäny abïï ya adhuëëŋ rïïuwë. Ku mën ke piny nɔm ayek kake Bɛ̈nydït, aa yïk piny nɔm në kenïïm.

⁹ “Ee kɔckɛn adööt gël apiɛth, ku kɔc ee karɛc looi ayek määr ë mɔ̈ɔ̈thic, acïn raan duëër tiam në riɛlde yetök.

¹⁰ Ku kɔc ke ater de Bɛ̈nydït abï keek riɔ̈ɔ̈k, abïï Bɛ̈nydït keek rɛ̈liic paannhial. Bɛ̈nydït abï kɔc ke piny thar luöi këtuc, abï riɛl gäm melikde, abï melikdɛn cï lɔc tɔ tiëm.”

¹¹ Ago Elekana rɔt puɔ̈k Rama kekë baaide, ku dɔ̈ŋ Thamwɛl Cilo, ke luui Bɛ̈nydït në Eli cök.

Wɛ̈ɛ̈t ke Eli

¹² Wɛ̈ɛ̈t ke Eli ayek kɔc ee karɛc looi. Acïkï jam ë Bɛ̈nydït ee piŋ,

¹³ ku cïkkï wëët ë bɛ̈ny de kake Nhialic ee kuany cök në kɔc. Na de raan gɛm miɔ̈c, ke lïm ë bɛ̈ny de kake Nhialic ee bɛ̈n ke muk thialtuŋ. Të ŋoot ë rïŋ ke tuak,

¹⁴ ee thialtuŋ cuɔɔk ë tööny de thätic, ku kë cïï thialtuŋ gutic, yen aye gäm bɛ̈ny de kake Nhialic. Ku kɔc ke Yithriɛl ee bɛ̈n Cilo kedhie, bïk miɔ̈c bɛ̈n gam, aake yek keek luöi kë cït ee kënë.

¹⁵ Ku däŋ, të ŋoot ë rïŋ cuai ke kënë guɔ tɛ̈ɛ̈m bei ku nyop. Lïm de bɛ̈ny de kake Nhialic ee bɛ̈n ku yöök raan gɛm miɔ̈c an, “Gämë yɛn rïŋ bïï bɛ̈ny de kake Nhialic lɔ nyop, acïï rïŋ cï tuak bï gam tëde yïn, ee rïŋ kën tuak etök.”

¹⁶ Na lee ë raan bɛ̈ɛ̈r an, “Loiku yic, ku buk kɔl kɔn nyop tueŋ, ku yïn bï kë kɔɔr nööm.” Abï lïm ë bɛ̈ny de kake Nhialic lueel an, “Ei! Gämë yɛn ënɔnthiinë! Na lɔ jaai, ka bä nööm në riɛl!”

¹⁷ Kërɛɛc de wɛ̈ɛ̈t ke Eli, acïk rac arëët ë Bɛ̈nydït nɔm, në biäk ye kek miɔ̈c cï gäm Bɛ̈nydït looi në kueer cïn yic riëëu.

Thamwɛl anu Cilo

¹⁸ Ku ëtɛ̈ɛ̈n wënthii Thamwɛl aaye Bɛ̈nydït luööi, ke ceŋ lupɔ de ajïpɔ amujuŋ ɣer.

¹⁹ Ruöön thok ëbɛ̈n, man ee lupɔɔ thiin akäŋ looi ku yïn en, të le kek kekë monyde, lek miɔ̈c de ruöön gäm Bɛ̈nydït.

²⁰ Na wën ke Eli ë gëm athiɛɛi Elekana kekë tiiŋde, ku jɔ lɛ̈k Elekana an, “Yïn bï Bɛ̈nydït gäm mïth kɔ̈k wekë tiiŋë, bïk aa nyin ë raan cï gam.” Ku ëtɛ̈ɛ̈n ayek röt jɔ puɔ̈k baaiden.

²¹ Go Bɛ̈nydït Ɣana thieei, ago mïth dhiëth kadhïc mïth röör kadiäk ku duet kaarou. Ago Thamwɛl dït ke kuany luɔi de Bɛ̈nydït yic.

Eli kekë Mïthke

²² Ku Eli ë jɔ dhiɔp. Ku acï piŋ tëde kɔc juëc ke Yithriɛl, nɔn ye mïthke kɔc rac arëët, ku yek diäär nööm, diäär ee luui në paany de mät thok.

²³ Ago lëk keek an, “Eeŋö luöikï kërɛɛc cït ee kënë? Kɔc juëc acïk yɛn lɛ̈k karɛc cäk keek looi.

²⁴ Mälkï, mïthkï! Ee kërac aläl kɔc ke Bɛ̈nydït ajamkï në këdun!

²⁵ Na cï raan awäc luöi raandäŋ, aduëër ë Nhialic kony wëi, ku raan cï awäc luöi Bɛ̈nydït eeŋa duëër en lëu ë kuny?” Ku akënkï bɛ̈n piŋ yen kë lëk ë wun keek, në biäk cï Bɛ̈nydït Yen tak nɔn bï En keek nɔ̈k.

²⁶ Go Thamwɛl lɔ ke ŋuak luɔide tëde Bɛ̈nydït ku ŋuɛk mände kekë kɔc.

Kë cï Caar në Biäk de Dhiën de Eli

²⁷ Ago raan de Nhialic bɛ̈n tëde Eli ku lëk en an, “Kënë lueel Bɛ̈nydït kï, an, Yɛn cï rɔt nyuöth kuaar Aron wään tɔ̈u kek ë Rip, ke ke yɔŋ ë melik de Rip keek.

²⁸ Në dhiëën ke Yithriɛl thook ëbɛ̈n, acä keek lɔc kekë paande kedhie, bïk Yɛn aa luööi ke ke ye bäny ke kake Nhialic, bïk aa luui ɣön ë Nhialic ë yïk nɔm, bïk wal ŋïr aa nyop, ku cieŋkï lupɔɔ de ajïpɔ, ku bïk aa jam ë Yɛn. Acä keek gäm riɛl bïk biäk de miɔ̈c de Bɛ̈nydït ye nyop ë yïk nɔm nööm.

²⁹ Ku eeŋö tɔ yïn tɔ woi miɔ̈c de Bɛ̈nydït në dït ë piɔ̈u, miɔ̈c Ya kɔɔr tëde kɔckï? Eeŋö, Eli, ee yïn mïthku riëëu awär Ɛn, tɔ keek nöm biäk piɛth në miɔ̈c de Bɛ̈nydïtic, miɔ̈c ye kɔckï gäm Ɛn?

³⁰ Yɛn, Bɛ̈nydït Nhialic de Yithriɛl, Yɛn cï gutguut looi ɣɔn thɛɛr wokë kɔc paandu ku dhiëndun, nɔn bän yïn looi ke yï ye bɛ̈ny de kake Nhialic anandu. Ku ënɔɔnë acä lueel, nɔn cän yen bï bɛ looi ë kööl däŋ! Ku kë bä looi, Yɛn bï kɔc ee Yɛn riëëu guöp riëëu, ku Yɛn bï kɔc ee Yɛn biɔɔn guöp luöi këtuc.

³¹ Piɛŋkï, ade kööl bɔ̈, kööl bän kɔc kor nɔ̈k paandu ku baai de wuur ëbɛ̈n, abï ciën raan ë paandun bï tëde dhiɔɔp cuööp.

³² Ku yïn bä jut guöp ke yï daai ke yï cï piɔ̈u diu, në athiɛɛi bä gäm kɔc ke Yithriɛl, ku acïn raan ë dhiëndun bï dhiɔɔp cuööp.

³³ Yɛn bï raan töŋ de mïthku tɔ pïïr, ku abï Yɛn luööi ke ye bɛ̈ny de kake Nhialic ë yïïŋdï nɔm. Ku abï cɔɔr, ka abï piɔ̈u guɔ bäp, ku kɔc ke dhiëndu kɔ̈k abïk thou në akuöörkuöör.

³⁴ Kööl lee wɛ̈ɛ̈tku kaarou yï Ɣopni ku Pineɣath lɔ thou ë köölë tökic, yen abï yïn en ŋic, nɔn bïï ka cä lɛ̈k yïn aa yith.

³⁵ Yɛn bï bɛ̈ny de kake Nhialic adöt lɔc, raan bï këde Yapiɔ̈u looi. Abä gäm mïth juëc, ku abï A luööi ëceŋ të tɔ̈u melikdiën cä lɔc thïn.

³⁶ Raan töŋ de käudu bï pïïr abï lɔ tëde bɛ̈ny de kake Nhialic, ku lek lip në atek ku nɔn ee këcam, ke ke bï bɛ̈ny de kake Nhialic aa kuɔny. Ago rɔt yök kë bï cam.”