1 Tham 19 - JAM DE NHIALIC 2011

Thaulo Ayɔŋ Debid

¹ Ku ëtɛ̈ɛ̈n, acï Thaulo bɛ̈n lɛ̈k Jɔnathan wënde, ku lëk bänyke kedhie an näkkï Debid. Ku Jɔnathan aa nhiaar Debid arëët.

² Ago Jɔnathan lɔ lɛ̈k Debid an, “Wää akɔɔr bï yï nɔ̈k. Ka yïn tit rɔt apiɛth, miäk adurduur, ke yï lɔ thiaan apiɛth të cïn raan ŋic en, ku tɔ̈u ëtɛ̈ɛ̈n.

³ Ku yɛn bï lɔ kɔ̈ɔ̈c në wäär lɔ̈ɔ̈m roor ëtɛ̈ɛ̈n të cï yïn thiaan, ku yɛn bï jam wokë yen në këdu. Na de këpiɛth cä yök në ye röl, ka abä lɛ̈k yïn.”

⁴ Ago Jɔnathan Debid lɛ̈c Thaulo wun, lueel an, “Bɛ̈ny, du de kërɛɛc luöiyë Debid, në luɔi cïn en kërɛɛc cï wäc yïn. Këriëëcdɛn cï looi ëbɛ̈n aaye gök de kuɔɔny kony en yïn.

⁵ Acï wëike kuɔɔn ɣɔn nɛ̈k en Goliath, ago Bɛ̈nydït tiëm dït gäm Yithriɛl ëbɛ̈n. Ago piɔ̈u bɛ̈n miɛt arëët wën tïŋ yïn en. Ka eeŋö cï guɔ bɛ̈n, kë kɔɔr yïn an, näk Debid ke cïn këdɛn cï wööc taitai?”

⁶ Go Thaulo jam de Jɔnathan yök ke ee yic, go kuëëŋ në rin ke Bɛ̈nydït nɔn cï yen Debid bï bɛ nɔ̈k.

⁷ Na wën, ke Jɔnathan ë cɔl Debid, ku guïïr këriëëc cï rɔt looi ëbɛ̈n, ku jɔt yïn Thaulo. Go Debid Thaulo lɔ luööi cït man ɣɔn tueŋ.

⁸ Agokï bɛ thɔ̈ɔ̈r në Pilithiin, go Debid lɔ thɔ̈ɔ̈r ke keek. Go ke tiaam ku cop keek.

⁹ Na ɣɔn ë kööl tök, ke jɔŋ rac bɔ̈ tëde Bɛ̈nydït ë ke dɔm Thaulo ke rɛ̈ɛ̈r ɣönde ke muk tɔŋ ë yeciin, ku Debid aa gut thom.

¹⁰ Go Thaulo Debid thɔ̈ɔ̈r në tɔŋ, go Debid tɔŋ kɔl alɔ tɔŋ rɔt miɛŋ ë päny kɔ̈u abïï kɔ̈ɔ̈c ë tiŋtiŋ. Ago Debid kat ku kuɛl rɔt.

¹¹ Go Thaulo kɔc tooc, lek Debid tiɛɛt ɣöt ke bïk nɔ̈k adurduur të riëël en bei ɣönde. Ago Mical tiiŋde ye yɔ̈ɔ̈k an, “Të kën yïn kat ë nɔn wakɔ̈u, ke yïn bïï nɔ̈k në run ë piny.”

¹² Ago Mical Debid luaai piny në awëërnyin ku tɔ kual rɔt.

¹³ Ku nöm Mical kë cït raan, ku tɛ̈ɛ̈c në agen nɔm, ku thïïr nɔm në kë cït kɔm cï cuëëc në nhïm ke bou. Ku kum piny në lupɔɔ.

¹⁴ Na wën, aa tooc Thaulo kɔc lek Debid diëc, ke le Mical lɛ̈k keek an, Debid acïï juäi wïk.

¹⁵ Go Thaulo kɔc bɛ lɔ puk nïïm, lek Debid diëc, ku lëk keek an, “Lak bɛ̈ɛ̈ikï kekë agende, ke bä bɛ̈n nɔ̈k.”

¹⁶ Na wën, aa lɔ kɔc ɣöt, ke ye tiim cït raan yen yökkï në agen nɔm ke cï kuöm piny, ku cï thïïr nɔm në kë cï cuëëc në nhïm ke bou.

¹⁷ Go Thaulo Mical luɔp an, “Eeŋö mɛth yïn ɛn, ku tɔ raan de wok ater kual rɔt?” Go Mical bɛ̈ɛ̈r, an, “Acï ya riääc an, bï ya nɔ̈k, të kɛ̈n ɛn en tɔ kual rɔt.”

¹⁸ Go Debid rɔt kual tënu Thamwɛl thïn ë Rama, ku guïïr këriëëc cïï Thaulo luöi en ëbɛ̈n. Agokï lɔ Nayoth kekë Thamwɛl, ku lek rëër ëtɛ̈ɛ̈n.

¹⁹ Go Thaulo piŋ nɔn nu Debid ë Nayoth, piny ë Rama,

²⁰ go Thaulo kɔc lɔ Debid dɔm tuɔɔc. Na wën aa lek ɣëët, ke ke tïŋ kut de tït ke ke cɔ̈ŋ, ku caarkï käŋ, ku tïŋkï Thamwɛl anu në tït nïïm tueŋ, Ago Wëi ke Nhialic tuuc ke Thaulo dɔm arëët agokï mɛt lɔ̈ɔ̈r cɔ̈ŋkï, ku caarkï käŋ ayadäŋ.

²¹ Ago Thaulo kë cï rɔt looi piŋ, go kɔc kɔ̈k bɛ tooc, agokï bɛ̈n bɛ mɛt lɔ̈ɔ̈r cɔ̈ŋkï, ku caarkï käŋ ayadäŋ. Ago Thaulo kɔc ye kɔc yiic diäk bɛ nyɔk ë tuöc, gokï bɛ mɛt lɔ̈ɔ̈r cɔ̈ŋkï.

²² Ago jɔ lɔ Rama guöpde. Na wën, aacï ɣet ë yinh dïït ë Theku nɔm, ke lop të nu ë Thamwɛl thïn kekë Debid. Go lɛ̈k en nɔn nu kek ë Nayoth.

²³ Na wën, aa le ɣet ëtɛ̈ɛ̈n, go Wëi ke Nhialic dɔm ayadäŋ, ago cath ke cɔ̈ŋ, ku ciɛth ke caar käŋ, abï ɣet Nayoth.

²⁴ Ago lupɔɔke yɔ̈ɔ̈t bei, ku cɔ̈ŋ, ku cɛɛr käŋ në Thamwɛl nɔm, ku tɔ̈ɔ̈c piny ke cïn kɔ̈u lupɔ, ee köölë ëbɛ̈n, ku niin në yekɔ̈u ë wɛ̈ɛ̈ric ëbɛ̈n. (Yen të ë bïï ë kääŋ ka, an, “Ayï Thaulo ayadäŋ cï bɛ̈n aa tiët?”)