1 Tham 18 - JAM DE NHIALIC 2011

¹ Na wën, aacï Thaulo thök në jam kekë Debid, ke Jɔnathan, wën ë Thaulo ë mit piɔ̈u kekë Debid. Go Debid nhiaar guöp aläl cït man nhiɛɛr en guöpde.

² Ku ëtɛ̈ɛ̈n, Thaulo ë Debid bɛ̈n tɔ rɛ̈ɛ̈r ke yen, ku cïï be tɔ puk enɔm baaiden.

³ Ago Jɔnathan määth lueel kekë Debid, në luɔi nhiɛɛr en Debid guöp cït man nhiɛɛr en rɔt.

⁴ Go Jɔnathan lupɔde yɔ̈ɔ̈t bei në yekɔ̈u ku gëm Debid, ku gëm kakɛn ë tɔŋ, abätäu, ayï thiööth.

⁵ Ku Debid aaye tiam në tɔɔŋiic kedhie, tɔɔŋ cïï Thaulo ye tuɔɔc thïn. Na wään, ke tɔ ye bɛ̈ny ë rem de tɔŋ, go kɔc piɔ̈ɔ̈th miɛt ëbɛ̈n alɔ gut bäny ke tɔŋ de Thaulo.

Thaulo Atil Debid

⁶ Na wën, aa lɔ Debid enɔm puk tɔɔŋ kekë rem de tɔŋ, të wën cï en Goliath lɔ nɔ̈k, go diäär ke Yithriɛl Thaulo lɔ loor nɔm, diëër cï guëër në wuöt ke Yithriɛliic kedhie. Loorkï nɔm ke ke kït në miɛtëpiɔ̈u ku cöŋkï, ku gutkï lɔ̈ɔ̈r ku thom.

⁷ Ku në diɛtken ë kitkï, aaye din tök lueel an, “Thaulo acï aguum ke kɔc nɔ̈k, ku näk Debid aguum kathiëër ke kɔc.”

⁸ Ku cöökë ë Thaulo bɛ̈n wööc piɔ̈u aläl, go gɔ̈th arëët, ku lueel an, “Nɔn cï kek Debid tɔ näk aguum kathiëër ke kɔc, ku tɔkï ya näk agum de kɔc tei. Acïn däŋ ë döŋ, ee Debid yen bïk tɔ ye melik ee kë ciëënë!”

⁹ Ago tiɛɛl Thaulo dɔm ëtɛ̈ɛ̈n, go Debid jɔ biɔ̈ɔ̈k alɔ të le yen.

¹⁰ Na ɣɔn amiäk adurduur, ke jɔŋ rac ɣɔn tuuc ë Nhialic ë ke dɔm Thaulo, agokï ye miɔ̈ɔ̈l ku yɔŋkï yen. Ago Debid thom gut cït man yen e gut aköölnyïïn. Ku Thaulo aa muk tɔŋ në yeciin.

¹¹ Go lueel në yepiɔ̈u an, “Abä thäär ë päny kɔ̈u.” Go tɔŋ dɛɛny, go Debid tɔŋ kɔl raanrou.

¹² Ku Thaulo aaye riɔ̈ɔ̈c në Debid në luɔi cïï Bɛ̈nydït ye nyääŋ piny, ku le tɔ̈u kekë Debid.

¹³ Ago Thaulo Debid tɔ jäl në yelɔ̈ɔ̈m, ku le tɔ ye bɛ̈ny ë rem de tɔŋ wat agum. Go Debid remdɛn ë tɔŋ wat tɔŋ.

¹⁴ Ku Debid aaye tiam në këriëëc ye looi yic ëbɛ̈n, në biäk tɔ̈u ë Bɛ̈nydït ke yen.

¹⁵ Na ɣɔn aa lɔ Thaulo Debid tïŋ nɔn cï yen tiam aläl, ke riɔ̈c arëët.

¹⁶ Ago kɔc ke Yithriɛl Debid jɔ nhiaar guöp aläl, mɛ̈tkï në kɔc ke Juda, në luɔi ë yen bɛ̈ny ril.

Debid Athiak Nyan ë Thaulo

¹⁷ Ku ëtɛ̈ɛ̈n, acïï Thaulo bɛ̈n lɛ̈k Debid an, “Merap kï, nyandiën dït. Abä gäm yïn thiaak, të le yïn ɛn gam thok, ku biök tɔŋ ë Bɛ̈nydït apiɛth.” (Aa cïï Thaulo kɔɔr luɔi bï yen e nɔ̈k në yeciin, aa kɔɔr nɔn bïï kɔc ke Pilithiin ye lɔ nɔ̈k tɔŋ).

¹⁸ Go Debid lɛ̈k Thaulo an, “Ee yɛn ŋa? Ku baaida, ee baai de ŋa në Yithriɛl yic, ka yɛn duëër jɔ ee mony ë nyan ë melik?”

¹⁹ Na ɣɔn aacï akööl thök, akööl bï Merap gäm Debid tɔ ye tik, ke gëmë raan däŋ cɔl Adriɛl, raan ë kɔc ke Meɣolath.

²⁰ Ku ëtɛ̈ɛ̈n, Mical nyan ë Thaulo ë Debid bɛ̈n nhiaar aläl. Na wën aa piŋ Thaulo en ke mit piɔ̈u.

²¹ Acïï Thaulo cät në yepiɔ̈u an, “Debid abä deep në Mical. Abä tɔ thiɛɛk ke bïï kɔc ke Pilithiin en nɔ̈k.” Ago Thaulo ye bɛ nyɔk ë lëk en en Debid an, “Yïn bï ya mony ë nyandï.”

²² Go Thaulo bänyke tooc piny lek jam në Debid. Gokï lɛ̈k en an, “Eeŋö cï tïŋ? Melik anhiaar yïn, ku bänyke kedhie anhiaarkï yïn ayadäŋ. Ka yïn, bï aa mony ë nyan ë melik.”

²³ Na wën, aacï lïïm ke melik Debid guiëër ee jamë, ke lëk ë Debid keek an, “Ee këde dhuëëŋdït luɔi bï ë raan aa mony de nyan ë melik, yak tak thiëŋ ë nyan ë melik ee kë piɔlic? Yɛn ee raan kuanynyin, ku acïn kë cɔ̈k nɔm.”

²⁴ Na wën, aa lɔ lïïm ke Thaulo kë cïï Debid lueel guëër Thaulo,

²⁵ ke lëk ë Thaulo keek an, “Lak lɛ̈kkï Debid an, “Melik acïn thiëŋdɛn kɔɔr tëde yïn, ee dɛ̈l ë cuɛ̈l de Pilithiin cï thou, kek akɔɔr ke ye guur guur en rɔt në kɔc ke aterde.” (Kënë acïï Thaulo kiëët kɔɔr en nɔn bïï yen Pilithiin tɔ näk Debid.)

²⁶ Na wën, aguïïr ë lïïm ke Thaulo Debid ee jamë, ke Debid ë mit piɔ̈u në luɔi bï yen aa mony ë nyan ë melik.

²⁷ Ago Debid lɔ tɔŋ kekë kɔcke, gokï bot kaarou ke kɔc ke Pilithiin lɔ nɔ̈k, ku bïïkï dël ë cueel ë ke kedhie. Go Debid ke yiɛ̈n Thaulo ke bï aa mony ë nyan ë Thaulo. Go Thaulo Debid gäm Mical nyande tɔ ye tik.

²⁸ Acïï Thaulo bɛ̈n ŋic ëgɔk nɔn tɔ̈u ë Bɛ̈nydït kekë Debid, ku yök ayadäŋ luɔi nhiɛɛr ë nyande Mical Debid.

²⁹ Go Thaulo riɔ̈ɔ̈c aläl në Debid, ku jɔ Debid mɔ̈k ater në pïïrde yic ëbɛ̈n.

³⁰ Na wën ke wɛ̈ɛ̈t meliik ke Pilithiin ke ke bïï tɔŋ, Ku në ee tɔɔŋkë yiic ëbɛ̈n, Debid ë bɛ̈n tiam awär kɔc kɔ̈k lui në Thaulo kedhie, ago rin ke Debid bɛ̈n tïc në baai yic ëbɛ̈n.