1 Tham 17 - JAM DE NHIALIC 2011

Goliath Alɛ̈ɛ̈t Kɔc ke Yithriɛl

¹ Na wën ke kɔc ke Pilithiin ë ke mɛ̈ɛ̈t remdɛn ë tɔŋic në Thokoth piny de Juda, ku lek piɔ̈ɔ̈t të cɔl Epeth Damim në kaam de Thoko kekë Adheka.

² Ku Thaulo kekë kɔc ke Yithriɛl acïk kenïïm mat ku piɔ̈ɔ̈tkï në Wak de Ela yic, gokï röt guiir bïk thɔ̈ɔ̈r ë kɔc ke Pilithiin ëtɛ̈ɛ̈n.

³ Ago kɔc ke Pilithiin röt kueer ë kuur nɔm, ku kueer kɔc ke Yithriɛl röt në kuur däŋë nɔm ku tɔ̈u wak në kaamden.

⁴ Ago jön cɔl Goliath raan wun ë Gath, bɛ̈n bei në kɔc ke Pilithiin yiic, go bɛ̈n bïï kɔc ke Yithriɛl bɛ̈n lääth nyïïn. Aaye raan bäär aläl, bɛ̈ɛ̈rde aaye mitïïr kadiäk.

⁵ Ku aceŋ akup ë maläŋ ë yenɔm, ku aceŋ lupɔɔ ke tɔŋ lëu kilɔɔ ke maläŋ kathiërdhïc ku dhorou.

⁶ Ku ade cök wëth ke maläŋ ee ye gël cök. Ku tɔŋ de maläŋ në yekët.

⁷ Ku wai ë tɔŋde aa dït kɔ̈u, cït wai ë cum. Ku tɔŋ guöpde aaye kilɔɔ kadhorou ke wëëth. Ku könde aa muk ë raan däŋ ee cath në yenɔm tueŋ.

⁸ Ago Goliath kɔ̈ɔ̈c ku jiëëm kɔc ke Yithriɛl në röldït an, “Eeŋö luɔikï ke we cï wekɔ̈ɔ̈th kueer baaŋ? Kɛ̈nkï ya tïŋ cä ee raan ë Pilithiin wek ee lïïm ke Thaulo kë? Lackï raan ë weyiic, raan bï bɛ̈n piɔ̈t ke yɛn.

⁹ Na le ya nɔ̈k, ka wok bï aa lïïmkun. Ku na la lɔ nɔ̈k, ka wek bï aa lïïmkuɔ.

¹⁰ Wekï lääth nyïïnë na de raan, ke dapkï tɔ bɔ̈, bïï bɛ̈n piɔ̈t ke yɛn!”

¹¹ Na wën, piŋ Thaulo kekë kɔc ke Yithriɛl jam ë raan ë Pilithiin, gokï riɔ̈ɔ̈c arëët kedhie

Debid anu në Paany de Thaulo Yic

¹² Debid ee wën ë Jethe, raan dhiën ë Eparath në Bethleɣem de Juda. Jethe aa de nɔm wɛ̈ɛ̈tke kabɛ̈t. Ku Jethe aacï dhiɔp në akööl ɣɔn ye Thaulo melik.

¹³ Ku wɛ̈ɛ̈tkɛn dïtkë kadiäk aake cï lɔ tɔŋ në Thaulo ëtök. Wën kɛ̈i acɔl Eliap, ku wën lɔ në yecök acɔl Abinadap, ku wën ye mïth diäk acɔl Cama.

¹⁴ Ku Debid yen aaye wën koor në keyiic kedhie. Ku wɛ̈ɛ̈tëkɔcken kadiäk aake tɔ̈u ë tɔŋic në Thaulo ëtök,

¹⁵ Debid aaye yenɔm puɔ̈k Jeruthalem aköölnyïïn ëbɛ̈n le thök ke wun tiit.

¹⁶ Ku Goliath aaye rem de tɔŋ ë Yithriɛl lääth nyin aköölnyïïn ëbɛ̈n, miäk rial ku thëën, në nïniic kathiërŋuan.

¹⁷ Na ɣɔn ë kööl tök, ke lëk ë Jethe Debid an, “Nöm löth athiäŋ në rɛɛp cï geet yiic, ku nöm kuïn cï pam kathiëër, ku kɔt yiɛ̈në ke mïthëkɔckun nu tɔŋ.

¹⁸ Ku jɔt ca në kec kathiëër, yiɛ̈në ke bɛ̈ny de remdɛn ë tɔŋ wat agum. Ku tïŋ mïthëkɔckun luɔi tɔ̈u kek, ku lɔ yiɛ̈në yɛn kë bän e ŋic nɔn piɔl kek gup.

¹⁹ Melik Thaulo, ku mïthëkɔckun, ku rem de tɔŋ de Yithriɛl ëbɛ̈n, atɔ̈u ë Wak de Ela yic ke ke thäär në Pilithiin.”

²⁰ Ago Debid rɔt jɔt adurduur, ku nyiëëŋ thök raandäŋ, ku jɔt kacaam cït man cïï Jethe ye lɛ̈k en. Na wën aa ɣeet, ke yök rem de tɔŋ ë Yithriɛl ke lɔ në këërkëër de tɔŋic, ke ke kit diɛt ke tɔŋ.

²¹ Ago kɔc ke Pilithiin tɔŋden nyuööc ke ke wël kenïïm kɔc ke Yithriɛl, ku yen ee kɔc ke Yithriɛl aya.

²² Na wën, ke Debid ë nyiëëŋ kacaam bɛ̈ny de kacaam, ku kɔt lee ë këërkëër de tɔŋic, le mïthëkɔcken luɔp në täu tɔ̈u kek.

²³ Na wën ŋoot en ke jam ke keek, ke Goliath ë bɔ̈ bei bïï kɔc ke Yithriɛl bɛ̈n lääth nyïïn, cït man yen cool ë lɛ̈ɛ̈th en ke nyïïn. Go Debid ye piŋ.

²⁴ Na wën aa tïŋ kɔc ke Yithriɛl Goliath, ke ke riɔ̈c ku kɔtkï.

²⁵ Ku yek lɛ̈k röt kapäc an, “Tïŋ tei ku piŋ kë lueel, acïï melik Thaulo lueel an, bïï raan lɔ yen nɔ̈k gäm ariöp dït arëët. Ku acï lueel an, bïï raan gäm nyande ayadäŋ ke ee tiiŋde. Ku acï baaiden bï bɛ ee tɔ kut athölbö.”

²⁶ Go Debid rɔt cuöt kɔc thiääk në yen, ku lop keek an, “Eeŋö bï gäm raan lɔ ee raan ë Pilithiinë nɔ̈k, ku dɛ̈k kɔc ke Yithriɛl yiëth në ayärdïïtë? Ku në yic, eeŋa yen ee Pilithiin kuc Nhialicë, ka duëër rem de tɔŋ de Nhialic pïïr jɔ riääc?”

²⁷ Agokï guiëër kë bï gäm raan lɔ Goliath nɔ̈k.

²⁸ Na wën, aa piŋ Eliap Debid ke jam ke kɔc, ke ŋëny Debid ke jam ke kɔc, ku lëk en an, “Eeŋö tɔ yï bɔ̈ eenë? Eeŋa cï nyäŋ thökku ë jɔ̈ɔ̈ric? Täudu aŋic yïn ee mɛnhë, aŋiɛc nɔn yen lɛc yen ëbïï yï. Ee tɔŋ yen ë bä bɛ̈n woi baaŋ!”

²⁹ Go Debid bɛ̈ɛ̈r an, “Eeŋö cä looi ënɔɔnë? Ayï lop ayadäŋ, cä duëër lop?”

³⁰ Ago rɔt puɔ̈k raan däŋ, ku be nyɔk ë lop en en ee lopë, go bɛ ŋoot ke bëër cït man wën.

³¹ Go kɔc kɔ̈k kë cïï Debid guiir piŋ, gokï lɔ lɛ̈k Thaulo. Go Thaulo Debid tɔ cɔl.

³² Go Debid lɛ̈k Thaulo an, “Acïn raan duëër riɔ̈ɔ̈c në ee Pilithiinë bɛ̈ny! Yɛn bï lɔ piɔ̈t wo yen.”

³³ Go Thaulo lɛ̈k Debid an, “Duɛ̈ɛ̈rë jɔ piɔ̈t we raan ë Pilithiinë adï? Yïn ee mɛnh thiinakäŋ, ku yen ee raandïït ë tɔɔŋ biök ɣɔn ee yen dhuk?”

³⁴ Go Debid lɛ̈k Thaulo an, “Bɛ̈ny yɛn aaye thök ka wäär tiit. Ku të cïï köör ku nɔn yen köör ayuääl thɔ̈k gɔp,

³⁵ aya gïth ku piät wo yen, ku luäk thɔ̈k bei. Ku të cïï köör ku nɔn yen köör ayuääl, rɔt puɔ̈k ɛn, aya ŋuany röl ku näk.

³⁶ Yɛn ë kɔ̈ɔ̈r nɔ̈k ku näk köör ayuääl, ka yɛn bï ee Pilithiin cïn nɔm Nhialicë nɔ̈k ayadäŋ, Pilithiin ee rem de tɔŋ de Nhialic pïïr läät.”

³⁷ Go Debid lueel, an “Bɛ̈nydït ë ya kony në kɔ̈ɔ̈r ku kony ɛn në köör ayuääl, ka Yen abï ya kony në ee Pilithiinë aya.” Go Thaulo lɛ̈k en an, “Apiɛth lɔ, Bɛ̈nydït abï tɔ̈u ke yïn.”

³⁸ Ku gëm Debid kakɛn ë tɔŋ ye ke cieŋ. Gëm akup ë maläŋ, ku lupɔ de tɔŋ.

³⁹ Ago Debid abätäu de Thaulo nööm ku them an jël, ku aa kuc luɔi ye ka ke tɔŋ cieŋ. Go lɛ̈k Thaulo an, “Yɛn cï duëër piɔ̈t ke ya cieŋ ee kakë, akɛ̈n ke kɔn cieŋ.” Go Debid ke bɛ̈ɛ̈i bei në yekɔ̈u kedhie.

⁴⁰ Ku nööm thienydɛn yen thök tiit, ku kuëny rɔt kɔi täc kɔ̈ɔ̈th kadhïc në nyin yic, ku tɛ̈ɛ̈u keek në athepde yic. Ku nööm niplade ku lee të nu Goliath.

Debid Atiam Goliath

⁴¹ Ku ëtɛ̈ɛ̈n, Goliath alɔ ke cut rɔt Debid, ku raan ɣɛ̈ɛ̈c könde acath në yenɔm tueŋ.

⁴² Na wën, aa lɔ Goliath Debid tïŋ ke ye dhuŋ thiinakäŋ, ke biɔɔn guöp.

⁴³ Go lɛ̈k en an, “Ye tak ya jö, ka yïn jɔ bɛ̈n wekë thieec ë yïciin?” Go Debid läm yanhden.

⁴⁴ Ku lëk Debid an, “Bäär eenë, ke guöpdu bä bɛ̈n gäm diɛt ku läi ënɔɔnthiinë bïk cuet.”

⁴⁵ Go Debid bɛ̈ɛ̈r an, “Yïn bɔ̈ tënu yɛn wekë abätäu ku tɔɔŋ kaarou, ku yɛn lɔ tënu yïn në rin ke Bɛ̈nydït de rɛm, Nhialic de rem de tɔŋ ë Yithriɛlduön cï läät.

⁴⁶ Bɛ̈nydït abï yï gäm ɛn ee köölë, yïn bä nɔ̈k ku tɛ̈ɛ̈m yïnɔm bei. Ku gup ke rem de tɔŋ ë Pilithiin abä ke tɔ ciɛm ë diɛt ee köölë ayï läi roor. Yen abï piny nɔm e jɔ ŋic nɔn de Yithriɛl nɔm Nhialic.

⁴⁷ Yen abï amatnɔmë ëbɛ̈n ye jɔ ŋic ë gɔk, nɔn cïï Bɛ̈nydït abätɛ̈ɛ̈u ayï tɔɔŋ kɔɔr bïï En kɔcke kony. Tɔŋ ee këde, ka bï we gäm wook wedhie ee köölë.”

⁴⁸ Ago Goliath rɔt bɛ cuöt ë Debid lɔ̈ɔ̈m, go Debid bɛ̈n thïn ke rïŋ bï bɛ̈n piɔ̈t ke yen.

⁴⁹ Na wën ke Debid ë lut yeciin ë athepic, ku bïï kɔɔi tök bei, ku tɛ̈ɛ̈u ë nipla yic, ku moc Goliath. Ago kɔɔi lɔ lööny në Goliath nyin tueŋ, go ɣɔ̈p nɔm, go wïïk ke bɔ̈ɔ̈p.

⁵⁰ Ku ëtɛ̈ɛ̈n, Debid ë Goliath bɛ̈n nɔ̈k në kɔɔi ë nipla të cïn abätäu.

⁵¹ Na wën, aacï Goliath wïïk, ke Debid ë kɔt ke lɔ tënu yen, ku le käc yeth, ku mïït abätäude bei, ku teem en en röl ku ŋuïth nɔm bei. Na wën, aa tïŋ ë kɔc ke Pilithiin nɔn cïï ë jönden nɔ̈k, ke ke miɔ̈ɔ̈t kɔtkï.

⁵² Ago kɔc ke Yithriɛl kenïïm mony në kɔc ke Judai ëtök, ku copkï keek agut cï Gath ku kal de Ekeron thok. Go kɔc ke Pilithiin bɛ̈n döŋ piny kueer ë Caaraim kɔ̈u ke ke cï thäär agut cï Gath kekë Ekeron.

⁵³ Na wën, aacï kɔc ke Yithriɛl kenïïm lɔ dɔk në kecök, ke ke yak wun ë Pilithiinic.

⁵⁴ Go Debid nɔm ë Goliath käp leer Jeruthalem, ku tɛ̈ɛ̈u kakɛn ë tɔŋ në paanyde yic.

Debid Agëmë Thaulo

⁵⁵ Wën tïŋ ë Thaulo Debid ke lɔ piɔ̈t ke Goliath, Thaulo acï Abener bɛ̈ny de remdɛn ë tɔŋ bɛ̈n luɔp an, “Abener, eeŋa de ee wëndɛnë?” Go Abener bɛ̈ɛ̈r an, “Akuöc bɛ̈nydï.”

⁵⁶ Go Thaulo lɛ̈k en an, “Lɔɔr luɔpë ee wën de ŋa.”

⁵⁷ Na wën, aacï Debid Goliath lɔ nɔ̈k, ku le bɛ̈n ciëën, ke jɔt ë Abener yen yïn Thaulo. Ku Debid aa ŋoot ke ɣɛ̈ɛ̈c nɔm ë Goliath.

⁵⁸ Go Thaulo ye luɔp an, “Dhuŋë, ye mɛnh ë ŋa?” Go Debid bɛ̈ɛ̈r an, “Yɛn ee wën ë lïmduön Jethe, raan wun ë Bethleɣem.”