1 Tham 16 - JAM DE NHIALIC 2011

Debid Atɔc ke ye Melik

¹ Ago Bɛ̈nydït lɛ̈k Thamwɛl an, “Bä Thaulo dhiëëu aɣet cï nɛn? Acä rɛɛc acï bï bɛ aa meliŋ de Yithriɛl. Ka yïn nöm miök de olip, ku lɔ Bethleɣem tënu raan cɔl Jethe, në baŋ cän wëndɛn tök lɔc në wɛ̈ɛ̈tke yiic bï aa melik.”

² Ago Thamwɛl lop an, “Ku bä ee kënë jɔ looi adï? Na le Thaulo piŋ, cïï ya bï nɔ̈k!” Go Bɛ̈nydït bɛ̈ɛ̈r an, “Kuath dɔu ke yïn, na cï yï luɔp ke luel an, yɛn lɔ la Bɛ̈nydït miɔɔc.

³ Caalë Jethe në miaac yic, ku yïn bä lɔ lɛ̈k kë bä looi. Yïn bï raan lɔ tɔc nɔm ke ye melik, raan bä lɔ nyuöth yïn.”

⁴ Ago Thamwɛl kë cïï Bɛ̈nydït lɛ̈k en looi, go jäl ke lɔ Bethleɣem. Na wën aa tïŋ ë röördït ke wut, ke ke lɛth ë riɔ̈ɔ̈c keek. Gokï loor nɔm lek luɔp, an, “Ee këpiɛth yen ciɛɛth yïn bɛ̈ny?”

⁵ Go bɛ̈ɛ̈r an, “Ɣɛɛ, ee këpiɛth. Yɛn aa bɔ̈ bä Bɛ̈nydït bɛ̈n miɔɔc. Ka week, waakkï, ku bäk lokku ëtök.” Ku yöök Jethe an, wɛɛk kekë wɛ̈ɛ̈tke ëtök, ke ke bï lɔ në yen ayadäŋ.

⁶ Na wën aa cïk ɣet, ke Thamwɛl ë tïŋ Eliap, wën ë Jethe, go lueel ë yepiɔ̈u an, “Yen raan kɔɔr ë Bɛ̈nydït guöp ka, yen acïï Bɛ̈nydït dhil lɔc.”

⁷ Ago Bɛ̈nydït lɛ̈k Thamwɛl an, “Duk rɔt tɔ diir ë läkde, ayï bɛ̈ɛ̈rde, acie yen cä lɔc. Yɛn cie lɔc cït man ye raan lɔc. Raan ee raan woi guöp biic, ku Yɛn ee raan woi piɔ̈u thïn.”

⁸ Ago Jethe Abinadap wënde cɔɔl, ku yïn Thamwɛl. Go Thamwɛl jaai nyɔk, lueel an, “Ayï yen ayadäŋ akën ë Bɛ̈nydït lɔc.”

⁹ Go Jethe Cama wënde bɛ bɛ̈ɛ̈i. Go Thamwɛl bɛ lueel an, “Akën ë Bɛ̈nydït ye lɔc aya.”

¹⁰ Jethe ë wɛ̈ɛ̈tke bɛ̈n yiɛ̈n Thamwɛl kedhie kadhorou në ee kueerë, ku ŋoot Thamwɛl ke lëk en an, “Acïn raan töŋ cïï Bɛ̈nydït lɔc në keyiic kedhie.”

¹¹ Go Thamwɛl Jethe luɔp an, “Dek mɛnhduön däŋ cï döŋ?” Go Jethe lɛ̈k en, “Wën koor në keek anu, ka ee luɔi nu yen roor ë thökiic, ke tit thök.” Go Thamwɛl lɛ̈k en an, “Lɔ tɔ bɔ̈ eenë. Wok cïï Bɛ̈nydït bï miɔɔc të kën en kɔn bɛ̈n.”

¹² Go Jethe ye tuöc raan, ku tɔ bïïyë. Ku yen aaye dhuŋ läk guöp ku le nyin top. Ku ëtɛ̈ɛ̈n, acïï Bɛ̈nydït bɛ̈n lɛ̈k Thamwɛl an, “Yen raan cä lɔc ka, tɔc ë miök!”

¹³ Go Thamwɛl miök de olip nööm ku wɛ̈l ë Debid nɔm në wɛ̈ɛ̈tëkɔcken nïïm. Gɔl ëtɛ̈ɛ̈n, ku le tueŋ, Wëi ke Bɛ̈nydït acïk bɛ̈n tɔ̈u në Debid guöp. Ku jɔ Thamwɛl rɔt bɛ̈n puɔ̈k Rama.

Debid Atɔ̈u Baai ë Thaulo

¹⁴ Ago Wëi ke Bɛ̈nydït jäl në Thaulo guöp, ku tɔ Bɛ̈nydït jɔŋ rac lɔ në yepiɔ̈u, agokï ye nuaan.

¹⁵ Go lïïmke lɛ̈k en an, “Aŋicku luɔi cïï jɔŋ rac cïï Bɛ̈nydït tuöc yïn yï nuaan.

¹⁶ Ka yïn tɔ wo kɔɔr raan ŋic gun ë thom. Ago na cï jɔŋ rac yï dɔm, ke raan abï thom gut go piɔ̈u waar.”

¹⁷ Go Thaulo gam, ku lëk keek an, “Kɔ̈ɔ̈rkï ya raan ŋic gun ë thom apiɛth, ku bɛ̈ɛ̈ikï.”

¹⁸ Go lïmdɛn tök e lueel ëtɛ̈ɛ̈n an, “Jethe, raan wun ë Bethleɣem ade nɔm wëndɛn ŋic gut aläl. Ee wën läk, ku ee ŋeny de tɔŋ, ku aril, ku aŋic jam. Bɛ̈nydït atɔ̈u ke yen.”

¹⁹ Ago Thaulo kɔc tuöc Jethe lek lɛ̈k en an, “Tuöcë yɛn Debid wënduön ee thök tiit.”

²⁰ Go Jethe Thaulo tuöc Debid, ku tuc amɛthɔ̈k, ku mul athiäŋ kɔ̈u kekë kacaam, ku tuc athep athiäŋ ke mɔ̈u.

²¹ Go Debid lɔ baai de Thaulo lee luööi. Go Thaulo ye nhiaar guöp aläl ku tɔ ee raan ee kakɛn ë tɔŋ muk.

²² Ago Thaulo thok tɔ yïnë Jethe lueel an, “Debid ee mɛnh piɛth, päl ë yök ke luui yɛn eenë.”

²³ Ku ëtɛ̈ɛ̈n, të cïï jɔŋ rac ë tuc ë Bɛ̈nydït Thaulo dɔm, Debid aaye thom nööm ku gut, ago jɔŋ rac jäl, go Thaulo piɔ̈u waar.