1 Tham 14 - JAM DE NHIALIC 2011

Jɔnathan Amɛk Pilithiin

¹ Na wën ke Jɔnathan wën de Thaulo ë yɔ̈ɔ̈k dhuŋ ee kakɛn ë tɔŋ muk an, “Bäär lokku tënu nëëm ke Pilithiin ë baŋtui.” Ku aa kën lëk wun.

² Ku Thaulo aa nu ë Gibia këc, ë tiim ke pomegraneet thäär ë Migron, ku aa rɛ̈ɛ̈r ke bot kadhetem de kɔc.

³ (Ku Aɣija bɛ̈ny de kake Nhialic aa nu në keyiic, ee wën de Aɣitup mänhë Yikabod wën ë Pineɣath, Pineɣath wën de Eli bɛ̈ny de kake Bɛ̈nydït nu ë Cilo, aa ceŋ ajïpɔ.) Ku acïn raan ë ŋic en nɔn cïï Jɔnathan jäl.

⁴ Ku në kueer de Mikmac yic të wën tëëk ë Jɔnathan thïn ke lɔ tëde Pilithiin, aa de kur kaarou në kueer këc, tök acɔl Bodhedh ku däŋë acɔl Thene.

⁵ Tök aa tɔ̈u ë kueer biäk të lɔ rut ke wel enɔm Mikmac, ku däŋë atɔ̈u ë biäk lɔ wöuwic ke wel enɔm Geba.

⁶ Go Jɔnathan dhuŋ ee kakɛn ë tɔŋ muk yɔ̈ɔ̈k an, “Bäär lokku të de rem de kɔc kuc Nhialic, tɛk däŋ bï Bɛ̈nydït wook kuɔny, acïn kë duëër Bɛ̈nydït pɛ̈n luɔi kony En wo, cakaa nɔn ye wok kɔc lik.”

⁷ Ago dhuŋ muk kakɛn ë tɔŋ bɛ̈ɛ̈r an, “Loi këduön kɔɔr bä looi, lɔ tueŋ yɛn bï nu wokë ë yïn ëtök.”

⁸ Go Jɔnathan lueel an, “Jɔ bɛ̈n, wok bï lɔ ë baŋtui të nu ë Pilithiin, ku abuk keek tɔ tïŋ wook.

⁹ Na lek wook yɔ̈ɔ̈k an, Tiɛtkï wook ëtɛ̈ɛ̈n agut të bï wok bɛ̈n, wok bï kɔ̈ɔ̈c të tɔ̈u wok thïnë.

¹⁰ Ku na lek wo yɔ̈ɔ̈k an buk lɔ të tɔ̈u kek thïn, ke wo bï lɔ, në baŋ bïï kënë aa kïn nyooth nɔn cï Bɛ̈nydït ke tääu në wocin.”

¹¹ Agokï röt nyuöth nëëm ke Pilithiin kedhie, go Pilithiin lueel, an, “Tiëŋkï Ɣeberuu, amulkï bei në pɔ̈liic të wën cï kek thiaan thïn.

¹² Go Pilithiin wën tɔ̈u ëtɛ̈ɛ̈n Jɔnathan kekë dhuŋ muk kakɛn ë tɔŋ cɔɔl në röldït, an “Bäkkï tënu wok thïn, ke we buk bɛ̈n nyuöth kë kaarkï!” Ago Jɔnathan dhuŋ muk kakɛn ë tɔŋ cɔɔl an, “Bäär nhial kuany ya cök. Acïï Bɛ̈nydït keek tääu në Yithriɛl ciin.”

¹³ Go Jɔnathan kɛɛc nhial ke ruec kuur në yecin ku mool në yecök, ku lɔ dhuŋ muk kakɛn ë tɔŋ ë yecök. Ago Jɔnathan Pilithiin yuöp piny ku jɔ dhuŋ muk kakɛn ë tɔŋ keek aa nɔ̈k.

¹⁴ Në ee tɔŋ tueŋë yic, Jɔnathan kekë dhuŋ muk kakɛn ë tɔŋ, acïk Pilithiin kathiërrou bɛ̈n nɔ̈k, në kaam cït pëër ë lɔ̈ɔ̈ric.

¹⁵ Na wën ke riɔ̈ɔ̈cdït ë dɔm rem de tɔŋ ë Pilithiin ëbɛ̈n, kɔc wën ee lɔ rum, ayï kɔc wën nu wutic, arëk abï piny rɔt nieeŋ, ku dɔm riɔ̈ɔ̈c dït keek.

Yithriɛl Atiam Pilithiin

¹⁶ Na wën aa lɔ kɔc ke Thaulo tɔ̈u ë Gibia de Benjamin lieec, gokï rem de tɔŋ ë Pilithiin tïŋ ariŋkï ke ke cï nuɔɔn arëët.

¹⁷ Na wën ke Thaulo ë yɔ̈ɔ̈k kɔcke an, “Kuɛnkï rem de tɔŋ, ku tiëŋkï eeŋa cï wo nyääŋ piny.” Na wën cï kek kɔc kueen, gokï Jɔnathan kekë dhuŋ ee kakɛn ë tɔŋ muk yök ke ke liu.

¹⁸ Ago Thaulo Aɣija yɔ̈ɔ̈k an, “Bɛ̈ɛ̈iyë Athänduŋ de Män ë Bɛ̈nydït.” (Në ee aköölkë Aɣija aa ɣɛ̈ɛ̈c athänduŋ de mät në kɔc ke Yithriɛl nïïm tueŋ.)

¹⁹ Ku të wën jiɛɛm ë Thaulo kekë bɛ̈ny de kake Nhialic, ke anuɔɔn de Pilithiin ë lɔ ke ŋuak yenyin aläl, go ë Thaulo lɛ̈k bɛ̈ny de kake Nhialic an, “Acïn kaam bïï ë Bɛ̈nydït bɛ luɔp!”

²⁰ Ago Thaulo kekë remdɛn ë tɔŋ lɔ thɔ̈ɔ̈r ë Pilithiin, agokï Pilithiin yök ke ke cï nuɔɔn aläl, ka anɛ̈kkï röt kapäc.

²¹ Go kɔc ke Ɣeberuu wään cï mat në Pilithiin röt bɛ̈n puöc bei, ku mɛ̈tkï në kɔc ke Thaulo kekë Jɔnathan.

²² Na lɔ kɔc ke Yithriɛl wään cï thiaan piny ë kuur de Eparaim ye piŋ nɔn cïï ë Pilithiin kat, gokï mɛt tɔŋ ku copkï Pilithiin arëët,

²³ agokï thɔ̈ɔ̈r në keek abïk ɣet ë Bethaben baŋtui. Go Bɛ̈nydït kɔc ke Yithriɛl bɛ̈n luök ee köölë.

Ka cï Röt Looi në Tɔŋ Cök

²⁴ Ku kɔc ke Yithriɛl aake cï kɔ̈c në cɔk ee köölë, në baŋ cïï Thaulo gutguut lueel, an, “Aciɛɛn abï nu ë raan lɔ cam yeth, ke akɔ̈l ë kën lɔ piny, të ŋuɔɔt ɛn ke ya kën rɔt guöör në kɔc ke aterdï!” Ka acïn raan töŋ cï këcam thiëëp në rem de tɔŋic.

²⁵ Ago rem de tɔŋ ëbɛ̈n lɔ rooric, gokï miök de kiëcdït yök piny.

²⁶ Wën cï kek lɔ rooric gokï kiëcdït tïŋ ke wɛ̈t bei, ku acïn raan cï ye bɛ̈n jak, në baŋ riɔ̈ɔ̈c kek në gutguut.

²⁷ Ku akën ë Jɔnathan piŋ, nɔn cï wun kɔc duöt në gutguut, ago thieny ë nu ë yeciin yaak nhial ku gut athïn de kiëcic, ku ciɛm biäk ago nyin guɔ lɔ wɛ̈ny.

²⁸ Na wën ke lëk ë raan töŋ de rem ë tɔŋ en an, “Wook wodhie, wok cï kɔ̈c në cɔk, ku wuur acï rem de tɔŋ tɔ luel gutguut an, ‘Aciɛɛn abï nu ë raan lɔ këcam cam ee köölë.”’

²⁹ Go Jɔnathan bɛ̈ɛ̈r an, “Awuur acï wunde kɔ̈ɔ̈r nuan, tïŋ luöi cän nyin lɔ wɛ̈ny wën thiëëp ɛn kiëc thiinë!

³⁰ Aduëër aa këpiɛth arëët, na ee rem de tɔŋ ë cï tɔ cäm ee köölë, në kakɛn cïk rum tëde kɔc ke aterden. Ke nääk nɛ̈kë kɔc ke Pilithiin aduëër dït aläl!”

³¹ Në ee köölë kɔc ke Yithriɛl acïk Pilithiin tiaam, thɛ̈ɛ̈rkï keek, dɔm në Mikmac leer Aijalon. Ku në ee kaamë yic kɔc ke Yithriɛl aake cï jɔ kɔ̈c në cɔk,

³² agokï lööny në ka cïk keek peec tëde kɔc ke aterden yiic, agokï thɔ̈k ku ɣɔ̈k tɛm röt ëtɛ̈ɛ̈n, ku cuetkï rïïŋ ke thith.

³³ Na wën ke lëk ë raan däŋ Thaulo an, “Tïŋ kɔc aluikï kërac Bɛ̈nydït, në cuën cuet kek rïŋ ke thith.” Ago Thaulo bɛ̈ɛ̈r, an, “Wek cï gäm dhoŋ kɔ̈u, laarkï kuurdït agök eenë raantök.”

³⁴ Na wën ke be lueel an, “Lɔ biic në kɔc yiic ku lëk ë keek an, ŋɛk ë ye weeŋde kekë thɔ̈ɔ̈kde bɛ̈ɛ̈i, ku teem ke röl eenë, ku cuetkï keek. Duökï kërac lui Bɛ̈nydït në cuën cuet wek rïŋ ke thith.” Ago ŋɛk weeŋde bɛ̈ɛ̈i ee wɛ̈ɛ̈rë yic, ku teem röl ëtɛ̈ɛ̈n.

³⁵ Ago Thaulo yïk yiëk Bɛ̈nydït, ee yïïŋ tueŋ ë kɔn yiëk Bɛ̈nydït.

³⁶ Na wën ke lëk ë Thaulo kɔcke, an, “lokku mɛkku Pilithiin, agoku keek peec ëlë wakɔ̈u, ku nɛ̈kku keek kedhie.” Ago kɔc bɛ̈ɛ̈r, an, “Loi këduön ye tïŋ ke piɛth.” Go bɛ̈ny de kake Nhialic lueel, an, “Kɔnku Nhialic luɔp.”

³⁷ Ago Thaulo Nhialic luɔp, an, “Bä lɔ piny la Pilithiin mak? Bä keek tɔ tiaam?” Ku Nhialic akën lopde bɛ̈n bɛ̈ɛ̈r ee köölë.

³⁸ Na wën ke lueel Thaulo an, “Bäkkï eenë wek bäny ke rem de tɔŋ wedhie, ke buk ŋic ee kërɛɛc ŋö cï looi ee köölë.

³⁹ Yɛn ë kuëëŋ në rin ke Bɛ̈nydït pïïr raan ee Yithriɛl kuɔny. Cakaa wëndiën Jɔnathan yen ë wäc, ka abï dhil nɔ̈k.” Ku acïn raan töŋ cï bɛ̈n jam në kɔc yiic.

⁴⁰ Na wën ke Thaulo ë yɔ̈ɔ̈k kɔc ke Yithriɛl kedhie an, “Kääckï ëtɛ̈ɛ̈n, ku yɛn wokë Jɔnathan wëndï, wok bï kɔ̈ɔ̈c eenë.” Ago kɔc bɛ bɛ̈ɛ̈r, an, “Loi këduön ye tïŋ ke piɛth.”

⁴¹ Na wën ke Thaulo ë läŋ Bɛ̈nydït Nhialic de Yithriɛl an, “Bɛ̈nydït, eeŋö kën yïn lɔ̈ŋdï bɛ̈ɛ̈r ee köölë? Bɛ̈nydït Nhialic de Yithriɛl, bɛ̈ɛ̈rë lɔ̈ŋdï në kur ɣer yiic. Na ye awäc këdï ku nɔn ee këde Jɔnathan ke bɛ̈ɛ̈rë në Yurim, ku na ye awäc këde kɔc ke Yithriɛl ke bɛ̈ɛ̈rë në Thumim: kur kaarou ye bɛ̈ny de kake Nhialic ke dɛɛny bïï yen këde Nhialic piɔ̈u ŋic. Go gaak löny kekë Jɔnathan ku Thaulo, ku tiëc kɔc ke Yithriɛl ke cïn kë cïk looi.

⁴² Go Thaulo bɛ lueel an, “Dɛɛnykï gaak ë kaamdï wokë Jɔnathan wëndï.” Go gaak löny kekë Jɔnathan.

⁴³ Ago Thaulo Jɔnathan luɔp, an, “Lɛ̈kë yɛn eeŋö cï looi?” Ago Jɔnathan lɛ̈k en an, “Yɛn aa thiëp kiëc thiinakäŋ tei në thienydï nɔm, ku ënɔɔnë yakï, yɛn cï gam ë thuɔɔu?”

⁴⁴ Go Thaulo bɛ̈ɛ̈r an, “Yɛn cï kuëëŋ në rin ke Nhialic, yïn bïï dhil nɔ̈k ee köölë Jɔnathan!”

⁴⁵ Na wën ke lëk ë kɔc Thaulo an, “Duëër Jɔnathan thou adï? Ku ee yen raan ë tɔ Yithriɛl tiëm ë tiëm dïïtë? Ei taitai, wok cï kuëëŋ në rin ke Bɛ̈nydït pïïr. Cakaa riöp de yen cök ë cïï dhoŋ. Kënë looi ee köölë aa looi në riɛl de Nhialic.” Ago kɔc Jɔnathan jɔ kony ku akënë bɛ̈n nɔ̈k.

⁴⁶ Na wën, ke Thaulo ë päl cum de Pilithiin, ku jɔkï kenïïm puɔ̈k pinyden.

Bääny de Thaulo kekë Dhiënde

⁴⁷ Wään cï Thaulo aa melik de Yithriɛl, go thɔ̈ɔ̈r ke kɔc ke aterde kedhie në ɣään yiic ëbɛ̈n: ë thɔ̈ɔ̈r ke kɔc ke Mowap, ku kɔc ke Ammon, ku kɔc ke Edom ku meliik ke Dhoba, ku Pilithiin. Të yen lɔ thïn ëbɛ̈n, aaye kɔc ke aterde tiaam.

⁴⁸ Ago thɔ̈ɔ̈r aläl kekë kɔc ke Amalek ku tiɛɛm keek ku luɛ̈k Yithriɛl në kɔc ee yen yɔŋ cin.

⁴⁹ Wɛ̈ɛ̈t ke Thaulo ee yï Jɔnathan, ku Yicibi, ku Malkicua. Ku nyandɛn kɛ̈i acɔl Merap, ku nyandɛn thiinë acɔl Mical.

⁵⁰ Ku tiiŋde acɔl Aɣinowam nyan de Aɣimaadh, ku bɛ̈ny ë rem de tɔŋ de Thaulo acɔl Abener wën de Ner. Ku Ner ee wulënë ë Thaulo.

⁵¹ Wun Thaulo Kic kekë wun Abener Ner, ayek wɛ̈ɛ̈t ke Abiel.

⁵² Në akööl ɣɔn pïïr ë Thaulo kedhie, Thaulo aaye thiɔɔr kekë Pilithiin aläl dïïtë. Ku të cï Thaulo raan ril tïŋ ku nɔn yen jöt, aaye mat në remdɛn ë tɔŋic.