1 Tham 13 - JAM DE NHIALIC 2011

Tɔŋ në Kɔc ke Pilithiin

¹ Run ke Thaulo aake ye thiërdiäk ɣɔn jɔ yen a melik, ku tɔ̈u ke ye melik de Yithriɛl në run kathiërŋuan ku rou.

² Ago Thaulo aguum kadiäk 3000 ke rem de tɔŋ guiir, ku tɔ aguum kaarou dɔ̈ŋ në yen ë Mikmac ku në piny ë kuur ë Bethel yic, ku tooc agum 1000 de rem ë tɔŋ kekë wënde Jɔnathan bïk lɔ Gibia, piny de dhiën ë Benjamin. Ku tɔ Thaulo kɔc kɔ̈k dɔk kenïïm baai.

³ Go Jɔnathan bɛ̈ny töŋ de tɔŋ ë Pilithiin nɔ̈k në Geba, ago kɔc ke Pilithiin kënë piŋ kedhie. Ago Thaulo kɔc ke Ɣeberuu tɔ cɔl në kuöth ë kɛŋ, në baŋ bïï kɔc bɛ̈n tɔŋ ë baai yic ëbɛ̈n.

⁴ Kɔc ke Yithriɛl acï keek yɔ̈ɔ̈k kedhie nɔn cï Thaulo bɛ̈ny ë tɔŋ ë Pilithiin nɔ̈k, ka cïï kɔc ke Pilithiin maan guöp. Go kɔc kedhie cɔ̈t ë Thaulo gam, ku mɛt nɔn bïï kek bɛ̈n rɔ̈m në Gilgal.

⁵ Go Pilithiin kenïïm kut në baŋ bïk kek tɔŋ luöi kɔc ke Yithriɛl, aake de nïïm bot kathiërdiäk 30,000 ke abëël ke tɔŋ, ku aguum kathiërdhetem 60,000 de kɔc ke jöŋgöör, ku rem de tɔŋ juëc cie lëu ë kuɛ̈n acït liɛɛt tɔ̈u ë wɛ̈ɛ̈r yɔu. Agokï lɔ Mikmac, të lɔ aköl amiäk në Bethaben, ku jɔkï piɔ̈ɔ̈t ëtɛ̈ɛ̈n.

⁶ Na wën ke ke mɛk kɔc ke Yithriɛl, agokï keek tɔ mum nïïm. Go kɔc kɔ̈k ke Yithriɛl lɔ thiaan ë kur thäär, ku pɔ̈l yiic, ku yïth yiic,

⁷ ku tem kɔc kɔ̈k wɛ̈ɛ̈r de Jordan kɔ̈u lekkï ë wuöt ke Gad ku Giliyad yiic. Ku Thaulo aa ŋoot ke tɔ̈u ë Gilgal, ku kɔc wën tɔ̈u ë yen aake lɛth ë riɔ̈ɔ̈c keek.

⁸ Ago Thamwɛl tiit ë nïn kadhorou, cït man cïï Thamwɛl ye yɔ̈ɔ̈k an bï looi, ku Thamwɛl aŋoot ke kën bɛ̈n Gilgal. Go kɔc jäl gɔl ku nyiëëŋkï Thaulo piny,

⁹ go Thaulo keek yɔ̈ɔ̈k an, “Gämkï yɛn miɔ̈c ye nyop ëbɛ̈n ku miɔ̈c de mät.” Ago miɔ̈c ye nyop ëbɛ̈n gam,

¹⁰ ku të thiin wën thöök en ë luɔɔide en jɔ ë Thamwɛl guɔ bɛ̈n. Go Thaulo ye loor nɔm ku tɔ nyuc,

¹¹ ago Thamwɛl lueel an, “Eeŋö cï looi?” Go Thaulo puɔ̈k nɔm en an, “Kɔc aake gɔl jäl ku nyiëëŋkï ya piny, ku yïn kën bɛ̈n aya, cït man wään cï yïn e lueel, ku däŋ aya, kɔc ke Pilithiin acïk kenïïm kut në Mikmac.

¹² Guɔ tak an, ‘Pilithiin abï a mook në Gilgal eenë, ku akɛ̈n them bä Bɛ̈nydït tɔ gam yɛn.’ Guɔ tïŋ ke piɛth luɔi bän miɔ̈c gäm Bɛ̈nydït.”

¹³ Go ë Thamwɛl lueel an, “Yïn cï këde pialëpiɔ̈u looi. Yïn kën lööŋ cïï Bɛ̈nydït Nhialicdun gäm yïn riëëu. Na ë cï keek döt aduëër yïn tääu në kɔc ke Yithriɛl nïïm wekë käudu ëbɛ̈n aɣet athɛɛr.

¹⁴ Ku ënɔɔnë ciɛɛŋdu acïï rɔt bï cuuth. Në baŋ kën yïn En riëëu, Bɛ̈nydït abï raandɛn kɔɔr bɛ̈ɛ̈i ku tɔ ee melik në kɔcke nïïm.”

¹⁵ Go Thamwɛl jäl ë Gilgal ke kuɛny kueerde yic. Ku kɔc kɔ̈k cï döŋ acïk Thaulo kuany cök të wën lee yen tëde remdɛn ë tɔŋ. Gokï jäl ë Gilgal lekï Gibia në piny de Benjamin. Ago Thaulo remdɛn ë tɔŋ kueen go ke yök aye bot kadhetem.

¹⁶ Ago Thaulo ku Jɔnathan wënde, ku kɔc ke Yithriɛl piɔ̈ɔ̈t ë Geba piny de Benjamin, ku piäät Pilithiin në Mikmac.

¹⁷ Go rem de tɔŋ ë Pilithiin lɔ biic ke ke cï röt tëek ë diäk lek rum: ago biäk töŋ de rem lɔ të lɔ Opera piny de Cual,

¹⁸ ku lɔ rem däŋë të lɔ Bethɣaron, ku lɔ däŋë në aken woi wak de Dheboim nɔm të lɔ jɔ̈ɔ̈ric.

¹⁹ Ku piny de Yithriɛl aa cïn yic thɛ̈th, në biäk cï Pilithiin ye them bïk Ɣeberuu pɛ̈n luɔi bï kek aa thäth në abätɛ̈ɛ̈u ku tɔɔŋ.

²⁰ (Ago kɔc ke Yithriɛl aa lɔ piny ë Pilithiin bïk pur, ku yiëëp, ku menyjel, ku alabithɔɔ lɔ thɔ̈ɔ̈th ëtɛ̈ɛ̈n,

²¹ Ku ariöp de thër ë yiëp aaye wënh thiin tök, ku kake pɔ̈ɔ̈r të cïï kek riääk, ku wëu kaarou aake ye ariöp theerë kakë pɔ̈ɔ̈r ku yiëëp thook.)

²² Ku në kööl ë tɔŋ acïn raan ë muk tɔŋ në rem de Yithriɛlic, ee Thaulo yetök kekë wëndɛn Jɔnathan kek amuk tɔɔŋ ku abätɛ̈ɛ̈u.

²³ Go Pilithiin rem de tɔŋ juëc tuɔɔc bïk kueer de Mikmac lɔ gël.