1 Tham 11 - JAM DE NHIALIC 2011

Thaulo Atiam Kɔc ke Ammon

¹ Na wën, ke Naɣac raan de Ammon ë leer rem de tɔŋ Jabec piny ë Giliyad, ku took. Ago kɔc ke Jabec lɛ̈k Naɣac an, “Loi mät we wook, ku wek buk aa luööi.”

² Ago Naɣac raan de Ammon bɛ̈ɛ̈r an, “Yɛn bï mät gam wo week në ee töŋë: ku töŋë ee luɔi bän nyin cuëny de raan ëbɛ̈n tuök bei në weyiic, ago kɔc ke Yithriɛl jɔ yäär kedhie.”

³ Ago röördït ke Jabec lueel an, “Gämkï wo nïn kadhorou bï wok kɔc tuɔɔc piny ë Yithriɛl ëbɛ̈n. Na cïn raan cï bɛ̈n bï wo bɛ̈n loor, ke wo bï röt gäm week.”

⁴ Ago kɔc ë toc ɣet Gibia të nu Thaulo. Na wën aa lëkkï kɔc thoŋ ë bïïkï, go kɔc dhiau aläl në jiɛthëpiɔ̈u.

⁵ Ku Thaulo aa jɔ piac bɛ̈n domic kekë miɔɔrde, ago lop an, “Eeŋö yï dï? Eeŋö dhiëëuwë raan ëbɛ̈n?” Agokï tɛ̈t kë cïï tuuc ë bɔ̈ ë Jabec lueel.

⁶ Na wën, aa piŋ Thaulo ee kënë, ke dɔm ë Wëi ke Nhialic, ago ŋeeny arëët.

⁷ Na wën ke nöm miöör kaarou, ku thim keek ë thïïm, ku tooc tuuc jɔt leerkï keek piny ë Yithriɛl ëbɛ̈n ku thɔn keek an, “Raan ëbɛ̈n, raan cïï Thaulo lɔ kuany cök tɔŋ kekë Thamwɛl, miöörkë abï keek thim cït ee miöörkë!” Ago kɔc ke Yithriɛl riɔ̈ɔ̈c në kë bïï Bɛ̈nydït luöi keek. Agokï keyiic määt kedhie abï ciën raan töŋ dɔ̈ŋ.

⁸ Go Thaulo ke mat nïïm në Bedhek, go kuën ë kɔc ke Yithriɛl yök ke ye bot kadiäk ke aguum 300,000, ku bot kathiërdiäk 30,000 në kɔc ke Juda.

⁹ Agokï lɛ̈k tuuc ke Jabec an, “Lak lɛ̈kkï kɔckun an, “Wek buk luök miäk akën akɔ̈l rɔt kɔn puk. Na wën aa piŋ kɔc ke Jabec thok, ke ke mit piɔ̈ɔ̈th arëët

¹⁰ ku lëkkï Naɣac an, “Wok bï röt gäm week miäk aköl, ka we bï wo jɔ luöi kë kaarkï në wepiɔ̈ɔ̈th.”

¹¹ Ago Thaulo remdɛn ë tɔŋ tɛ̈ɛ̈kic në tuuŋ kadiäk në ee wɛ̈ɛ̈rë yic. Na ɣɔn amiäk adurduur, ke ke mook kɔc ke Ammon piny. Na wën aacï akɔ̈l kɔ̈ɔ̈c cil ke ke näk kɔc juëc aläl në keyiic. Ago kɔc cï döŋ ë keyiic jɔ aa kat ke ŋɛk ë cök enɔm tëde pei.

¹² Na wën ke lëk ë kɔc ke Yithriɛl Thamwɛl an, “Ee yï ŋa ë jai wään an cïkï Thaulo kɔɔr bï aa melikda? Gämë ke wook buk keek bɛ̈n nɔ̈k!”

¹³ Ago Thaulo jaai lueel an, “Acïn raan näk ee köölë, në luɔi yen kööl cïï Bɛ̈nydït Yithriɛl luök.”

¹⁴ Ago Thamwɛl lɛ̈k keek an, “lokku Gilgal wodhie, buk Thaulo bɛ lɔ tɔ ye melikda.”

¹⁵ Agokï lɔ Gilgal kedhie, lek Thaulo bɛ tɔ ye melik. Agokï miɔ̈c de mät gam, ago Thaulo dhuëëŋ de ee kënë looi ee köölë kekë kɔc ke Yithriɛl kedhie.