1 Tham 10 - JAM DE NHIALIC 2011

¹ Go Thamwɛl gul ë miök de olip nööm ku wɛ̈l ë Thaulo nɔm, ku ciim thok lëk en an, “Yïn cïï Bɛ̈nydït lɔc bä ya melik de Yithriɛl kɔcke. Yïn bï kɔc tiit ku gël ke në kɔc de ater në keek. Ku kë bï yïn e ŋic kï nɔn cïï Bɛ̈nydït yï lɔc bä ya melik de kɔcke:

² Të le yïn lɔ jäl ë yalɔ̈ɔ̈m ëlëthɛɛr, yïn bï lɔ rɔ̈m wekë kɔc kaarou në raŋ de Racel lɔ̈ɔ̈m ë Dheldha, piny ë Benjamin. Ku abï kɔckë lɛ̈k yïn nɔn cïï mul wään kɔɔrë yök, ka wuur acï be diɛɛr në këde mul, adiɛɛr në këdu. Ku ee cool ë lop an, ‘Eeŋö bä looi ë këde wëndï?’

³ Ku yïn jɔ baaric ëtɛ̈ɛ̈n ɣet ë tim ɣeric ë ɣök de Tabor. Yïn bï lɔ rɔ̈m wekë kɔc kadiäk ëtɛ̈ɛ̈n, kɔc lɔ Nhialic miɔɔc Bethel. Raan tök në keyiic athel thök bɔɔth kadiäk, ku raan däŋë amuk kuïïn cï pam kadiäk, ku raan ye kek diäk amuk athep thiäŋ ke mɔ̈u.

⁴ Abïk yïn thiëëc ku gëmkï yïn kuïïn cï pam kaarou ku abä ke dɔm ë kecin.

⁵ Ku ëtɛ̈ɛ̈n, yïn bï lɔ në kuur ë Nhialic nɔm në Gibia, të tɔ̈u ë wun de Pilithiin lɔ̈ɔ̈m. Yïn bï rɔ̈m wekë tït juëc në wut këc ëtɛ̈ɛ̈n, ke ke bɔ̈ piny në yïk nɔm ke ke gut lɔ̈r, ku thom, ku kothkï arur ku kɛŋ. Ku abï kit ke ke riäŋ.

⁶ Ku wëi ke Bɛ̈nydït abïk bɛ̈n në yïguöp ëthiäu, ka yïn bï mɛt lɔ̈ɔ̈r we keek ke we cäär, ka yïn bï rɔt waar abä aa raan mɛɛn.

⁷ Ku të cïï ee kakë röt looi, ke yï loi kë cïï Nhialic lɛ̈k yïn an bä lɔ looi.

⁸ Ka yïn lɔ Gilgal në yenɔm tueŋ, ku yɛn bï lɔ̈ɔ̈k lɔ ëtɛ̈ɛ̈n, ke ya bï Bɛ̈nydït lɔ gäm miɔ̈c ye nyop ëbɛ̈n ku miɔ̈c de mät ëtɛ̈ɛ̈n. Tit ɛn ëtɛ̈ɛ̈n në nïn kadhorou ke yï bä lɔ guiëër kë bä looi.”

⁹ Na wën aa jäl Thaulo në Thamwɛl lɔ̈ɔ̈m, go ë Nhialic puk piɔ̈u. Ago këriëëc cïï Thamwɛl lueel ëbɛ̈n rɔt looi ee köölë.

¹⁰ Na wën aa ɣeet Gibia, ke räm kekë tït juëc, ago wëi ke Nhialic ye dɔm arëët, ago käŋ caar kekë tït ëtök.

¹¹ Na wën aa tïŋ ë kɔc ŋic en nɔn cɛɛr en käŋ kekë tït ëtök, ke ke lop an, “Eeŋö ë wën ë Kic dɔm? Cï Thaulo bɛ̈n aa tiët nɛn däŋ aya?”

¹² Ago raan töŋ ë rɛ̈ɛ̈r ëtɛ̈ɛ̈n bɛ̈ɛ̈r an, “Ku tït kɔ̈kkë yak tak ye wärken yïŋa?” Yen të ëbïï ë kääŋë ye lueel ka an, “Cï Thaulo bɛ̈n aa tiët nɛn däŋ aya?”

¹³ Na wën aacï Thaulo thök në cäär, ke lɔ në yïk lɔ̈ɔ̈m ë kuur nɔm.

¹⁴ Ago wulënë ë Thaulo luɔp kekë lïm ciɛth kek an, “Ee të nou dïït ë cä wek ɣet thïn?” Ago Thaulo puk nɔm an, “Wok aacï mul lɔ kɔɔr, na wën aa kënku ke yök, ke wo ɣet ë Thamwɛl lɔ̈ɔ̈m.”

¹⁵ Ago wulënë ë Thaulo bɛ̈ɛ̈r an, “Ka eeŋö cïï Thamwɛl lɛ̈k yïn?”

¹⁶ Ago Thaulo lɛ̈k en an, “Acïï Thamwɛl lɛ̈k wook nɔn cïï mul lɔ̈ɔ̈k yök.” Ku akën ë Thaulo ye lɛ̈k kë cïï Thamwɛl guiëër en në biäk bï yen aa melik.

Thaulo atɔ ye Melik

¹⁷ Ku ëtɛ̈ɛ̈n, Thamwɛl ë kɔc ke Yithriɛl bɛ̈n caal në Bɛ̈nydït nɔm kedhie në Midhpa,

¹⁸ ku lëk keek an, “Acïï Bɛ̈nydït Nhialic de Yithriɛl lueel an, ‘Ee Yɛn ë bïï we bei ë Rip ku luäk week bei në kɔc ke Rip cin, ku në kɔc kɔ̈k cin kɔc ɣɔn yɔŋ we.

¹⁹ Ee Yɛn Nhialicdun, Raan ë luäk week në nuɛɛnkun yiic ku ka dhal week ëbɛ̈n, ku ee köölë wek cï ya reec, ku lɛ̈kkï Yɛn an gäm week melik. Yen tëde ka, ënɔɔnë mätkï röt Bɛ̈nydït wedhie, në dhiëënkun ku ɣöötkun.”’

²⁰ Na wën ke Thamwɛl ë tɔ dhiëën ke Yithriɛl cut röt tëthiɔ̈k, go Bɛ̈nydït dhiën de Benjamin lɔ̈c bei.

²¹ Na wën ke Thamwɛl ë tɔ dhiën de Benjamin tɔ cut röt ke cath në bɛ̈i, go baai de Matari lɔ̈c bei. Ago baai de Matari bɛ tɔ cut rɔt ke cath në kɔc, go Thaulo wën ë Kic lɔc. Na wën an kɔɔr, ke yök ke liu në kɔc yiic.

²² Agokï Bɛ̈nydït bɛ luɔp an, “Nu raan cï lɔc ënou? Nu në woyiic eenë?” Go Bɛ̈nydït bɛ̈ɛ̈r an, “Yeka cï thiaan në yuöötic tɛ̈n?”

²³ Agokï lɔ diëc, na wën le ɣeet ë kɔc yiic, ke wär kɔc nïïm kedhie.

²⁴ Ago Thamwɛl lɛ̈k kɔc an, “Yen raan cïï Bɛ̈nydït lɔc kï! Acïn raan töŋ cït en në woyiic wodhie.” Ago kɔc cööt lueelkï an, “Melik yïn bï tɔ̈u athɛɛr!”

²⁵ Ago Thamwɛl keek jɔ wɛ̈ɛ̈riic täu bïï melik tɔ̈u ayï luɔɔide, ku gɛ̈ɛ̈r ke piny në awerekic, ku tɛ̈ɛ̈u awerek tëɣeric. Ku jɔ kɔc bɛ̈n tɔ jäl.

²⁶ Ku jɔ Thamwɛl jäl ayadäŋ ke lɔ Gibia. Ago kɔc riil cïï Nhialic gut piɔ̈ɔ̈th cath në yen ëtök.

²⁷ Ago kɔc kɔ̈k de gup wël melik rɛɛc ku luelkï an, “Acïn këpiɛth bïï ee raanë luöi wook.” Agokï jaai ke cïkï yïn miɔ̈c.