1 Tham 1 - JAM DE NHIALIC 2011

Elekana kekë Baaide ë Cilo

¹ Ade raan de Ramathaim Dhopim, raan piny ë kuur de Eparaim, ku acɔl rin Elekana wën de Jeroɣam, Jeroɣam wën de Eliɣu, Eliɣu wën de Dhup, Dhup wën de Toɣu, raan ë dhiën biäk ë Dhup.

² Ku Elekana aa de nɔm diäär kaarou, rin ke tiiŋ tök acɔl Ɣana ku rin ke tiiŋ däŋë acɔl ke Penina. Ku Penina aa de nɔm mïth, ku Ɣana aa cïn nɔm mïth.

³ Në ruöön thok ëbɛ̈n Elekana aaye jäl paande në Rama le Cilo, lee Bɛ̈nydït de rɛm lam, ku le gäm miɔ̈c ë Cilo. Ku wɛ̈ɛ̈t ke Eli kaarou yï Ɣopni kekë Pineɣath, aake ye bäny ke kake Bɛ̈nydït ëtɛ̈ɛ̈n,

⁴ Në akööl ye Elekana miɔ̈c gam, aaye Penina tiiŋde gäm thïm ë rïŋ ku miɔɔc wɛ̈ɛ̈tke ku duetke ŋɛk ke thïmde aya.

⁵ Na cakaa nɔn ë nhiɛɛr en Ɣana aläl, aaye Ɣana gäm thïm töŋ de rïŋ, në luɔi cïï ë Bɛ̈nydït yen tɔ ee rol.

⁶ Ku Ɣana aaye tiiŋ mɔɔcde ye leeŋ piɔ̈u ke bï piɔ̈u diu në luɔi cïï ë Bɛ̈nydït ye tɔ ee rol.

⁷ Ku kënë aaye rɔt looi aya në run nyïïn ëbɛ̈n, të cï kek lɔ Luaŋdït, aye ë tiiŋ mɔɔcde ye leeŋ piɔ̈u. Go Ɣana dhiau ku cïï cäm.

⁸ Na wën ke lëk ë monyde Elekana yen an, “Ɣana eeŋö dhiëëuwë? Ku eeŋö cïï yïn cäm? Ku eeŋö ee yïn piɔ̈u diu? Yɛn cä mïth kathiëër wär tëde yïn?”

Ɣana kekë Eli

⁹ Na wën aa cïk thök ë cäm ku thökkï ë dëk në Cilo, ke Ɣana ë jɔt rɔt. Ku Eli bɛ̈ny de kake Nhialic aa rɛ̈ɛ̈r ë thööc nɔm, thööc nu Luaŋdïït de Bɛ̈nydït thok.

¹⁰ Ɣana aa cïï piɔ̈u jiɛth aläl ku lɛ̈ŋ Bɛ̈nydït ke dhiau në jiɛthëpiɔ̈u.

¹¹ Ku kuëëŋ mël ku lueel an, “Bɛ̈nydït de rɛm, tïŋ ɛn yɛn lïmdu! Tïŋ ee nuandïït cï ya yökë, ku tak ɛn! Du nɔm mär në yɛn! Gämë ya mɛwä, ku të le yïn e gäm ɛn, abä gäm Bɛ̈nydït bï aa këde në pïïrde yic ëbɛ̈n, ku acï bï kɔn muut nɔm anande.”

¹² Ku të ŋoot ë Ɣana ke läŋ Bɛ̈nydït aläl ë kaam dït agök, aa woi ë Eli ye thok.

¹³ Ku Ɣana aa läŋ në yepiɔ̈u ë määth, ku aaye thok lɔ nieu ku cïï röl tiëc, go Eli ye tak nɔn cï yen wiɛɛt,

¹⁴ ago Eli lɛ̈k en an, “Eeŋö ee yïn cool ke yï wiɛɛt? Päl mɔ̈u në dëk!”

¹⁵ Ago Ɣana ye bɛ̈ɛ̈r an, “Acie yeka bɛ̈nydï, yɛn ee tiiŋ cï nuan arëët, ku yɛn kën kɔn dek ë mɔ̈u ayï mɔ̈n tuc. Yɛn aa läŋ Bɛ̈nydït në yapiɔ̈u ëbɛ̈n.

¹⁶ Du lïmdu thɔ̈ŋ tiiŋ ee karɛc looi. Yɛn aa läŋ në biäk de nuandïït cï yɛn yök në jiɛthëpiɔ̈u.”

¹⁷ Go Eli ye puk nɔm an, “Lɔ wekë mät, ku Nhialic de Yithriɛl abï yï gäm këduön ë läŋ.”

¹⁸ Ago Ɣana lueel an, “Tɔ lïmdu yök këpiɛth ë yïnɔm.” Go jɔ jäl, ku le cam. Akën piɔ̈u bɛ̈n bɛ diu.

Dhiënh ë Thamwɛl ku Gɛmde

¹⁹ Na ɣɔn amiäk adurduur ke ke jɔt röt, ku lɛ̈ŋkï Bɛ̈nydït, ku jiëlkï lek paanden ë Rama. Na wën ke Elekana ë yɔ̈k kekë tiiŋde Ɣana, go Bɛ̈nydït lɔ̈ŋden gam, go Ɣana meth yök.

²⁰ Na ɣɔn ee nïnkë yiic, go Ɣana liac, ku dhiëëth mɛwä, ago cäk rin an, Thamwɛl, lueel an, “Në luɔi cän Bɛ̈nydït lɔ̈ŋ në biäkde!”

²¹ Na ɣɔn aacï akööl guɔ bɛ̈n akööl ye Elekana lɔ Cilo kekë baaide, lek Bɛ̈nydït gäm miɔ̈c de ruöön thok, ku miɔ̈c ɣɔn cï yen kuëëŋ.

²² Ku Ɣana akën bɛ̈n lɔ ke keek, acï lɛ̈k monyde an, “Të le meth nyueth, abä lɛɛr Luaŋdït, ku abï jɔ tɔ̈u ëtɛ̈ɛ̈n në pïïrde yic ëbɛ̈n.”

²³ Ago Elekana monyde lëk en an, “Yen ka, täŋdu apiɛth, dɔ̈ŋë baai agut cï kööl bï yïn meth kɔn nyueth, në Bɛ̈nydït tɔ kuëëŋdu tɔ ee yic.” Ago Ɣana döŋ baai löök meth muk.

²⁴ Na ɣɔn aa le meth nyueth, ke leer meth Cilo ke ŋoot ke ye mɛnh thiin akäŋ, ku kuɛɛth miɔɔr ee run diäk, ku nööm apen de aɣaar ku tööny ë mɔ̈u athiäŋ, ku jɔt Thamwɛl ke ee meth cït ë mandɛnë, ku lee Luaŋdït në Cilo.

²⁵ Na wën aa cïk miɔɔr nɔ̈k, ke ke yïn meth Eli.

²⁶ Go Ɣana Eli luɔp an, “Ŋic ɛn ënɔɔnë bɛ̈ny? Ee yɛn tiiŋ wään bï Bɛ̈nydït lɔ̈ŋ në yïlɔ̈ɔ̈m eenë ke kääc.

²⁷ Aa läŋ ë këde mɛnhë, go Bɛ̈nydït ye gäm ɛn.

²⁸ Ka ënɔɔnë meth akaar bä gäm Bɛ̈nydït. Ku abï jɔ aa këde Bɛ̈nydït në pïïrde yic ëbɛ̈n.” Agokï Bɛ̈nydït jɔ lam ëtɛ̈ɛ̈n.