1 Pet 5 - JAM DE NHIALIC 2011

Thök ke Nhialic

¹ Röördït nu ë weyiic kek yɔ̈ɔ̈k, ku yɛn ee monydït aya, ku ya cäätɔ de ka cïï Kërtho guum, ku ya raan bï dɛ këdï aya në dhuëëŋ bï rɔt nyuɔɔth rial an:

² Yak luny ë Nhialic tiit luny nu ë weyiic, abäk keek aa tiit, ke cïn raan ee we cieŋ, ee këde piɔ̈ndun tei, ku acie biäk de wëu ke ayäär, ee miɛtëpiɔ̈u yen abä wek keek aa tiit.

³ Ku duökï ee ya bäny ee kɔc cieŋ, kɔc cï we tääu ë kenïïm, takï röt ee kɔc bï lunydun täudun aa dɔmic.

⁴ Na ëlëmiäk të cï Tïndïït ë Thök tuöl, Tïn nu ë tïït nïïm, ke we bï göl ë dhuëëŋ yök göl cïï bï biɔɔr anande.

⁵ Ku week aya, wek kɔc kor, yak ka ke röördït piŋ. Yeka, week wedhie, yak wethook piëëŋ abäk kuur aa wek röt kuɔɔr piny cieŋ cït man ë lupɔ: Nhialic ee kɔc ee röt tɔ dït ŋɛ̈ny, ku ye kɔc ee röt kuɔɔr piny gäm dhuëëŋdepiɔ̈u.

⁶ Yen kuɔɔr wek röt piny ë Nhialic cin cin ril ëtör, ke bï we jat nhial ëkööldɛn piɛth.

⁷ Yak diɛɛrduön aa wek diɛɛr ëbɛ̈n cuat ë yekɔ̈u, luɔi ee yen diɛɛr në këdun.

⁸ Yak röt tiit, yak yïn: raan de ater ke week, yen aye jɔŋdït rac, ee cool ë ciɛɛth piny, cït man ë köör ee kïïu, ke ye raan bï cuääl kɔɔr.

⁹ Yak ŋɛ̈ny, abäk aa kɔc ril në gäm, në ŋïny ŋiɛc wek en an, mïthëkɔckuön nu ë piny nɔm aye katuc manë ke dhal kacït ka dhal week.

¹⁰ Ku ënɔɔnë, Nhialic de piɔ̈u dhuëëŋ ëbɛ̈n, Raan cï we cɔɔl në këde dhuëëŋdɛn ee tɔ̈u athɛɛr në Kërtho Yecu, miäk, të cä wek käŋ guɔ guum tëthiinakäŋ, ee we tɔ ye dikëdik yen guöp, ku tɔ we kääc, ku tɔ we ril, ku tɔ we lïk piny.

¹¹ Në ye tɔ̈u kekë dhuëëŋ ku riɛldït aɣet athɛɛr ya. Amiin.

Thiëc Ciëën

¹² Yɛn ë awerek cekë tɔ luëthë week ë Thiluano, raan ŋiɛc nɔn ee yen mɛnhkënëdan adöt, acä gäär week riɛɛt ɛn wepiɔ̈ɔ̈th, ku ta rɔt ee cäätɔ në cöökë an, kënë ee dhuëëŋ de Nhialic piɔ̈u dhuëëŋ yic, dhuëëŋ kääc wek thïn.

¹³ Wek thiëëc ɣööt ke Nhialic nu Babilon, kɔc cï lɔc në week ëtök, ku wek thiëëc Mak wëndï aya.

¹⁴ Thiëckï röt wapäc në ciëm de nhiëër. Ë mät tɔ̈u ke week wedhie wek kɔc nu ë Kërtho Yecuyic. Amiin.