1 Pet 4 - JAM DE NHIALIC 2011

Pïïr cï Waar

¹ Ku ënɔn cï Kërtho käŋ guum ë biäkda ë yeguöp, ke week aya, yak wepiɔ̈ɔ̈th tɔ thöŋ ë piɔ̈nde, raan cï käŋ guum ë yeguöp acï guɔ pɔ̈k ke kërac.

² Ago täu täu wek ë guöpic ë aköölkuön ë pïïr cï döŋ tëde week, ke cïï bï aa këde ŋɔ̈ɔ̈ŋ ë kɔc dɔm, abï aa këde piɔ̈n ë Nhialic.

³ Akööl wään cï wan acïk dhil looi, akööl wään ee wok kamit ë Juöör piɔ̈ɔ̈th looi, kööl ë ye wok cool ë loi luɔi de dhööm, ku ŋɔ̈ɔ̈ŋ de kërac, ku dëŋ de mɔ̈u, ku thuëëc rac, ku wïn ee kɔc wit ë mɔ̈u, ku läm de yiëth col ëcut.

⁴ Ku kɔckë ayek gäi në luɔi rɛɛc wek röt cuat ë kërɛɛc gökdïïtë yic cït man ë kek, agokï week aa lat ë län rac.

⁵ Kɔc bï këden lueel ë bɛ̈ny nɔm bɛ̈ny cï rɔt coc bï löŋ dap guiir löŋ de kɔc pïïr ayï kɔc cï thou.

⁶ Yen aa guïïrë wëlpiɛth kɔc aɣɔ̈l kɔc cï thou, ke löŋden bï guiir ë guiëër ë kɔc rɛ̈ɛ̈r ë guöpic, ku bïk pïïr ë wëi yiic në këde Nhialic piɔ̈u.

Raan ë Miɔ̈c de Nhialic Ŋiëc Döt

⁷ Ku thök bï käŋ thök kedhie acï guɔ thiɔ̈k: yen piath wek nïïm, ku yak röt tiit aguɔkï Nhialic ŋiëc aa lɔ̈ŋ.

⁸ Ku cöök nu ë cök nïïm, ee nhiëër bä wek röt nhiaar aläl, nhiëër ee kutdïït ë karɛc kum.

⁹ Yak röt nyuööc, ë ŋɛk e ŋɛk nyuööc, ke cïn dok aa wek dok ë weyäc.

¹⁰ Week wedhie, të cï raan këdäŋ yök kë cï gäm en, ke teke ke mänhë kɔ̈c, en abä wek ciët kɔc piɛth cï tääu ë dhiën nɔm, kɔc ŋic dhuëëŋ ë Nhialic döt dhuëëŋ kithic.

¹¹ Raan guiir wël, ke ke guiir cït man ee kek wël ke Nhialic, raan loi ka ke kɔc ë looi në riɛl cïï Nhialic yiɛ̈n en: ke Nhialic bï dhuëëŋ yök në Yecu Kërtho ë këriëëcic ëbɛ̈n, Raan de nɔm dhuëëŋ ku ciɛɛŋ aɣet athɛɛr ya. Amiin.

Guöm në Luɔi yïn Kërthiaan

¹² Wek kɔc nhiaar, duökï gäi ë thëm tuc cït mac nu ë weyiic, thëm ee we them ënɔɔnë, duökï e lueel an, ee këgäi mɛɛn pei kë cï tuöl tëde week.

¹³ Yak piɔ̈ɔ̈th miɛt, në röm ram wek ka cï Kërtho guum në yen ëtök, na miäk, të cï dhuëëŋde rɔt nyuɔɔth aya, ke we bï piɔ̈ɔ̈th miɛt abäk piɔ̈ɔ̈th a yum.

¹⁴ Tën ee we cäk thook në biäk de rin ke Kërtho, ka ye thieithieei week, Wëi ke dhuëëŋ ku Wei ke Nhialic ë ke rɛ̈ɛ̈r ë wegup: ee ke bï aa läät tëde keek, ku ye dhuëëŋ tëde week.

¹⁵ Ku ë cïn raan ë weyiic raan bï këde yök ë näŋ cï en raan nɔ̈k, ku luɔi ee yen cuɛ̈ɛ̈r, ku luɔi cï en kërac looi, ku në cook ee yen jamde cuɔɔk ë jam de kɔc kɔ̈k yiic.

¹⁶ Ku na guum raan kërac në baŋ ee yen Kërthiaan, ke cïï yäär, ë lec Nhialic në rinke.

¹⁷ Kööl bï löŋ gɔl ë guiëër ɣön ë Nhialic kï, cï bɛ̈në: ku të cï e kɔn gɔl ë wook, ku kë bï kɔc yök rial bï ciët ŋö kekë kɔc ee wëlpiɛth ke Nhialic rɛɛc piŋ?

¹⁸ Cït man ye këcïgɔ̈ɔ̈r ye lueel an, “Ku të ye raan piɛthpiɔ̈u kony wëi ë kadhäl, ke raan reec Nhialic ku raan ee kërac looi bïk tïc tënou?”

¹⁹ Yen ka, kɔc ee kërac guum në këde piɔ̈n ë Nhialic ë ke ye wëiken kuɛ̈i Nhialic në luɔiden piɛth yek looi, luɔi ee yen Aciëŋ dïït ee käŋ ŋiëc döt.