1 Pet 3 - JAM DE NHIALIC 2011

Diäär ku Röör

¹ Yen acït rëër bä wek aa rëër ë jam de röörkun yiic röörkun gup, wek diäär, ku na cak dɛ röör cïï jam gam, ka duëërëke tɔ gäm në täu piɛth de diëërken, na cakaa yen ë cïn gäm,

² të ye kek täudun ɣeric ëgɔk woi täuduön deyic riëëu.

³ Ku kiëër aa wek röt kiir, duökï ee tɔ ye kiëër ë nai de nhïm, ku ciɛɛŋ de adhääp, ku ciɛɛŋ de lupɔ läk, kiëër ee biäk biic tei.

⁴ Yak kiëërdun tɔ ye raan cï thiaan ë wepiɔ̈ɔ̈th, raan lirpiɔ̈u ku cïn thok wël, yen aye kiëër cïï bï dhiap, kiëër de naamdɛn piɛth ë Nhialic nɔm.

⁵ Yen aye kiëër ë ye diëër ɣeriic röt kiir ɣɔn thɛɛr aya, diëër ee Nhialic ŋɔ̈ɔ̈th, ku yek rëër ë jam de röörken yiic röörken gup:

⁶ acït man ee Thara këde Abraɣam piŋ, go aa cɔɔl an, bɛ̈ny: ku wek cï guɔ aa nyïïrke, të ya wek këpiɛth looi, ku cäkï ee riɔ̈ɔ̈c ë këdäŋ abäk piɔ̈ɔ̈th atec.

⁷ Yen acït rëër bä wek aa rëër në diëërkun ëtök, wek röör, abäk röt ŋic apiɛth, ku yak tik theek, ku yak muk ëmääth, cït man ë töny kɔ̈c, luɔi aa wek kɔc bï dhuëëŋ de pïïr lɔ̈ɔ̈k lak në keek ëtök, ke lɔ̈ŋduön aa wek lɔ̈ŋ ke cïï bï gɔ̈ɔ̈u.

Guöm në biäk de Luɔi ë Këpiɛth

⁸ Cöök ciëën, yak tɔ̈u në piɔ̈n tök wedhie, yak piɔ̈ɔ̈th dap dhiau ë röt wapäc, yak röt nhiaar cït mïth ke raan tök, yak piɔ̈ɔ̈th dap kok, yak röt tɔ kor.

⁹ Duökï kërac ë puk nɔm ë kërac, ku lɛ̈t duökï ee puk nɔm ë lɛ̈t, acie yen, athiɛɛi yen abä wek e puk nɔm, luɔi ŋiɛc wek en an, ë luɔi bä wek athiɛɛi lɔ̈ɔ̈k lak, yen kë ë cöölë week ka.

¹⁰ Luɔi cï e gɔ̈ɔ̈r an, “Raan de piɔ̈u luɔi nhiɛɛr en pïïr, ku jɔ kööl piɛth tïŋ, ke ye yeliep pɛ̈n jam rac, ku ye yethok pɛ̈n jam ë ruëëny.

¹¹ Ë ye rɔt yal ë luɔi de kërac, ku ye këpiɛth jɔ looi, ë ye mät kɔɔr, ku jɔ aa cop.

¹² Nyïïn ke Bɛ̈nydït ayek kɔc piɛthpiɔ̈ɔ̈th woi, ku yïthke ayek palden dap piŋ, ku Bɛ̈nydït ee yenyin jɔ̈t kɔc ee kërac looi.”

¹³ Ku eeŋa bï we luöi kërac, të ya wek kɔc ee këpiɛth kuanyic?

¹⁴ Ku na cakaa wek ë gum kërac në biäk de piathëpiɔ̈u, ke we cï thieei: ku duökï ee riɔ̈ɔ̈c ë riɔ̈ɔ̈cden, ku duökï wepiɔ̈ɔ̈th ee tɔ jeth.

¹⁵ Ku yak Kërtho theek ë wepiɔ̈ɔ̈th takï ë Bɛ̈nydït. Yak cool ë cuɔc wek röt, ke we bï löŋ de raan ëbɛ̈n ŋiëc aa bɛ̈ɛ̈r, raan ee we thiëëc në këde aŋäth ŋäthkï, abäk aa bɛ̈ɛ̈r në piɔ̈nlir ku riëëu,

¹⁶ yak cath ë piɔ̈n agɔk, ku na cakaa kek ë ye we tum gup an, yak kɔc ee kërac looi, ka bïk yäär kek kɔc ee rëërduön piɛth ë Kërthoyic lat.

¹⁷ Të nu yen ë Nhialic piɔ̈u nɔn bä wek käŋ guum në biäk de luɔi piɛth yak looi, yen aŋuän në luɔi guööm wek käŋ në biäk de luɔi de kërac.

¹⁸ Luɔi cï Kërtho käŋ guum aya raantök në këde kërac, raan piɛthpiɔ̈u en aa gum käŋ në biäk de kɔc racpiɔ̈ɔ̈th, luɔi bï en wo lɛɛr të nu Nhialic, ë tɔ thou ë guöpic, ku tɔ pïïr ë wëi yiic,

¹⁹ ago lɔ aya në wëi yiic le wëi cï mac guiëër wël.

²⁰ Wëi ke kɔc ee löŋ rɛɛc piŋ ɣɔn thɛɛr, ɣɔn tiit ë liɛɛr ë Nhialic piɔ̈u kɔc ɣɔn nu Nowa, të ɣɔn looiyë abëldït, abël ɣɔn cï kɔc liaakäŋ kony wëi thïn, kɔc kabɛ̈t, në pïïu.

²¹ Ku yen acït kuny ee baptith wo kony wëi ënɔɔnë aya, acie bïï bï acuɔl ë raan guöp bɛ̈ɛ̈i bei, ee kɔ̈ɔ̈r ee raan kɔɔr luɔi, ŋic en e piɔ̈u nɔn le en gɔk ë Nhialic nɔm, në jön cï Yecu Kërtho rɔt jɔt,

²² raan cï lɔ paannhial, ku ye tɔ̈u ë ciin cuëëny de Nhialic, ku tuucnhial ku bäny ku riɛl acï ke tɔ piŋ këde.