1 Pet 2 - JAM DE NHIALIC 2011

Kuur Pïïr ku Jur Ɣeric

¹ Yen päl wek racëpiɔ̈u ëbɛ̈n, ku ruëëny ëbɛ̈n, ku piɔ̈n deyic aguk, ku tiɛɛl, ku jam rac ëbɛ̈n.

² Takkï röt cït mïth cï piac dhiëëth, aguɔkï cɛk ke jam ë Nhialic aa kɔɔr, cɛk awai, ke we bï dït ë keek akonyë we wëi.

³ Të cä wek dhuëëŋ de Bɛ̈nydït piɔ̈u yök ë yic.

⁴ Ee kuur pïïr, kuur cïï kɔc rɛɛc ë liŋliŋ ë yic, ku ye kuur ë lɔc Nhialic, aye kuur de naamde, ku na bäkï të nu yen.

⁵ Ke week aya wek ee ciët kuur pïïr, ago we yïk a ye ɣön ë wëi, bäk aa bäny ɣeriic bäny ke kake Nhialic, bäny ë ka ye läm näk keek yiɛ̈n Nhialic kake wëi, kamit ë Nhialic piɔ̈u në Yecu Kërtho.

⁶ Luɔi nu cöökë ë këcïgɔ̈ɔ̈ric an, “Wɔikï, yɛn tɛ̈ɛ̈u kuur dït ë Dhiɔnic, kuur nu ë aguk de pänyic, kuur cï lɔc, ku de naamdɛn dït: Ku raan gam en acïn yäär bï en yäär.”

⁷ Yen a de en naamde tëde week, wek kɔc cï gam: ku tëde kɔc reec gäm, “Kuur ɣɔn reecë yïk, Yen guöp acï tɔ ye kuur dïït nu ë aguk de pänyic.”

⁸ Ku lueel ë këcïgɔ̈ɔ̈r däŋ an, “Kënë ee Kuur ee kɔc kɔ̈th ë ye, ku ye kuurdït ee kɔc tɔ wiëëk. Kɔc ee kɔ̈th ë jam, në reec ee kek wël rɛɛc gam: këdɛn cï mɛk keek kï.”

⁹ Ku wek ee dhiën cï lɔc, bäny ke kake Nhialic, bäny ke dhiën ë melik, jur ɣeric, kɔc lɛɛn ke Nhialic pei, ke we bï kɔc aa guiëër piath de Raan ë cööl week bei ë cuɔlic bäk aa tɔ̈u ë ɣɛɛrdɛn ë pinyic ɣɛɛrdɛn ë gäi.

¹⁰ Ɣɔn wek ë cie kɔc, ku ënɔɔnë we cï aa kɔc ke Nhialic: wek aa kën kokdepiɔ̈u yök ɣɔn, ku ënɔɔnë acäk ja yök.

Lïïm ke Nhialic

¹¹ Wek kɔc nhiaar, wek läŋ, luɔi ciët wek kamaan ku ciëtkï kɔc cï ɣap ë wuöt lei, ke we bï ŋɔ̈ɔ̈ŋ de kake piny nɔm aa pɔ̈l, ee ke ye tɔŋ biök në wëikun.

¹² Yak ŋiëc rëër apiɛth ë juööriic, ku na cakaa kek ë ye we tum gup, acäk ciët kɔc ee kërac looi, ka bïk Nhialic dhil lɛc nɔm ë kööl bï en kɔc bɛ̈n neem, në luɔiduön piɛth ye tïŋ.

¹³ Yak ciɛɛŋ ëbɛ̈n gam në biäk de Bɛ̈nydït ciɛɛŋ ee kɔc piny cieŋ: nɔn ee yen melik, raan nu ë kɔc nïïm kedhie,

¹⁴ ku nɔn ee kek bäny, kɔc ee tooc ë yen lek kɔc ee kërac looi dui ku lek kɔc ee këpiɛth looi leec.

¹⁵ Yen aye këde Nhialic piɔ̈u, yen luɔi aa wek këpiɛth looi, aguɔkï kɔc cïn nïïm miɛɛm ë kuny kuc kek käŋ.

¹⁶ Na cakaa wek ë ye kɔc lääu nïïm, ke we duökï nɔmlääudun tɔ ye kën ë luɔi de kërac kum, yak tɔ̈u cït lïïm ke Nhialic.

¹⁷ Yak raan theek ëbɛ̈n. Yak mïthëkɔckun nhiaar. Yak riɔ̈ɔ̈c ë Nhialic. Yak melik riëëu.

Kääŋ de Guöm de Kërtho

¹⁸ Wek lïïm, yak rëër ë bänykun cök në riëëu aa wek ke riëëu, ku acie bäny piɛth kapäc, bäny ee jam ëmääth, ee bäny ee jam ke ke guël lööŋ, kek abä wek ke rëër ë kecök aya.

¹⁹ Ku të guumë raan karɛc në biäk de riëëu riëëu en Nhialic, ka cï duöi ɣɔ̈ric, yen aye dhuëëŋdepiɔ̈u.

²⁰ Ku na duiyë week ë ka cäk wööc, ku jakï guum në piɔ̈n lir, ke bï aa dhuëëŋ ŋö? Ku na cakaa wek ë cï këpiɛth looi, ke we dui.

²¹ Kënë yen aye luɔi cï Kërtho käŋ guum aya në biäkdun ago we nyäŋ ke bäk dɔmic, ke we bï täude aa kuanyic.

²² Raan cïn kërɛɛc cï looi, ku cïn ruëëny cï yök ë yethok,

²³ raan wään lɛ̈ɛ̈të, ku cïï be lat, wään guum en kërac, ke cïï kɔc wai, ku cï këde tääu ë Raan cin Raan ee löŋ ŋiëc guiir ëgɔk.

²⁴ Yenguöp ë karɛckuɔ ɣääc ë yeguöp ë tim kɔ̈u, luɔi bï wok thou tëde kërac, ku jɔku pïïr tëde piathëpiɔ̈u, dui ë duiyë ye, en aa tɔ we dem.

²⁵ Wään wek ë cït thök ee tai, ku ënɔɔnë we cï wenïïm pɔ̈k Tïndun Raan ee wëikun tiit.