1 Mel 9 - JAM DE NHIALIC 2011

Nhialic Abe rɔt Nyuöth Tholomon

¹ Na wën aacï Tholomon Luaŋdït thöl në yïk, kekë ɣöndïït ë bäänyde, ku thöl këriëëc ë cï kiëët an bïï looi ëbɛ̈n.

² Ke Bɛ̈nydït ë be rɔt nyɔk në luɔi nyuth En rɔt en raan rou, cït man ɣɔn cï yen e looi në Gibiɔn.

³ Acï Bɛ̈nydït lɛ̈k en an, “Yɛn cï lɔ̈ŋdu piŋ. Ku ka cï thiëc Ɛn. Yɛn cï Luaŋdïït cï yïkë tɔ ɣeric, ke rinkï ë ke bï aa dhuëëŋ thïn ëtɛ̈ɛ̈n aɣet athɛɛr. Abä aa tiit ku gɛ̈l ë caŋ awään.

⁴ Ku yïn, të le yïn A kuany cök në piathëpiɔ̈u ku riëëu de Nhialic, cït man ɣɔn ye wuur Debid e looi, ku ye lööŋkï döt aköölnyïïn ku loi ka cä lɛ̈k yïn,

⁵ ke Yɛn bï thön wään cä thɔ̈n Debid wuurë döt, thön wään bïï lɛ̈k en an mïthku abïk tɔ̈u ë thööny de Yithriɛl nɔm ananden.

⁶ Ku na lɔ mïthku kɔ̈ɔ̈c ke ke cïï Ya be kuany cök, ku lɔ lööŋkï dhɔ̈ŋiic ayï këriëëc cä thɔ̈n week, ku läk yiëth kɔ̈k lam,

⁷ ku Yɛn bï kɔc ke Yithriɛl nyaai piny wään cä gäm keek, ku Yɛn bï ë Luaŋdïïtë pɔ̈l, Luaŋdïït cä tɔ ɣeric ke ye të bïï Ya aa lɔ̈ŋ thïn. Ku Yithriɛl abï aa kääŋ tëde raan ëbɛ̈n, ku abïï yɔŋ.

⁸ Ku Luaŋdït abï tɔ̈u piny ke ye kuut cï riääk, ku raan ee tëëk eenë ëbɛ̈n abï gäi, ku riëëk piɔ̈u an, ‘Eeŋö luiyë Bɛ̈nydït ee kënë pinyë, ayï Luaŋdïïtë?’

⁹ Ku abïï kɔc aa bɛ̈ɛ̈r, an, ‘Ee luɔi cï kek Bɛ̈nydït Nhialicden pɔ̈l, Nhialic ɣɔn bïï kuarken bei ë Rip, ku nömkï yiëth kɔ̈k, ku lamkï ke. Yeka cïï Bɛ̈nydït keek yiɛ̈n riääk.’”

Män de Tholomon kekë Ɣiram

¹⁰ Tholomon aa thöl run kathiërrou ke yïk Luaŋdït, ku ɣön de bäänyde.

¹¹ Go Ɣiram melik de Tayer Tholomon yiën tiim thidar ku tiim ke ameth, ku adhäm kɔɔr ëbɛ̈n në biäk de yïk. Na wën cï thök në yïk, go Tholomon Ɣiram gäm wuöt kathiërrou, piny de Galili.

¹² Go Ɣiram bɛ̈n bïï wuöt cïï Tholomon gäm en bɛ̈n tïŋ, ku acï ke bɛ̈n rɛɛc.

¹³ Ago lɛ̈k Tholomon an, “Kek wuöt cï gäm ɛn ka wänmääth!” Në baŋ de ee kënë piny acï cäk an, “Kabul” aɣet cï ëköölë, alueel an, “piny rac”.

¹⁴ Go Ɣiram Tholomon tuöc ka wär aguum kaŋuan 4000 ke kilɔɔ gram ke adhääp.

Ka Kɔ̈k cï Tholomon ke Looi

¹⁵ Melik Tholomon acï kɔc luööi në riɛl bïk Luaŋdït yïk kekë ɣön ë bääny, ku tɔ keek kut piny nu të lɔ aköl amiäk de Jeruthalem, ku yïk kal de pänydït ëbɛ̈n. Ku be wuötkë yïk Ɣadhor ku Megido ku Jedher.

¹⁶ (Melik de Rip aacï Jedher mak ku rum, ku nɛ̈k kɔc ë Kanaan ë ceŋ en, ku ɣök mac. Acï pänydïtë bɛ̈n gäm nyande ke ye miɔ̈c de miɛtë piɔ̈u ɣɔn cïï Tholomon ye thiaak,

¹⁷ na wën ke Tholomon ë be Jedher yïk). Tholomon acï wuöt Bethɣaron yïk ayadäŋ,

¹⁸ ku Baalath, ku Tamar nu jɔ̈ɔ̈r de Juda yic,

¹⁹ pɛ̈ɛ̈nydït ye kacaamke tɔ̈ɔ̈u thïn, ku yïk pɛ̈ɛ̈nydït ye ke abëël ke tɔŋ tɔ̈ɔ̈u thïn, ku pɛ̈ɛ̈nydït ke kɔckɛn ke jöŋgöör, ku yïk këriëëc kɔɔr ëbɛ̈n në Jeruthalem ku Lebanɔn ku në ɣään kɔ̈k kɔɔr ë piɔ̈nde në ciɛɛŋde yic.

^20-21 Tholomon aaye käu de kɔc ke Kanaan luööi në riɛl, kɔc ɣɔn kën ë kɔc ke Yithriɛl ke nɔ̈k wään nööm kek piny. Kek yï käu de Amor, ku Ɣit, ku Peridh, ku Ɣib, ku Jebuth, ayek lïïmken aɣet cï ee köölë.

²² Tholomon akën kɔc ke Yithriɛl tɔ ee lïïm, aake ye rem de tɔŋ, ku yek bäny ke rem de tɔŋ, ku yek bäny ke akuut ke rem de tɔŋ, ku bäny ke rem de tɔŋ ee cath ë jöŋgöör kɔ̈ɔ̈th, ku rem de tɔŋ ee jöŋgöör kuaath.

²³ Ku kuën ë bäny ee kɔc tɔ lui ë riɛl, aake ye bot kadhïc ku thiërdhïc 550 luui Tholomon në ɣään kithiic.

²⁴ Go Tholomon piny nu pänydït biäk të lɔ aköl amiäk kuöt në biäk de tiiŋde nyan ë melik de Rip, go jäl në Pänydït de Debid, ku jɔ lɔ paandɛn cï piac yiëk en.

²⁵ Tholomon aaye miɔ̈c ye nyop ëbɛ̈n ku miɔ̈c de mät gäm Bɛ̈nydït, në ruöön tökic raandiäk në yïïŋ ɣɔn cï luöi Bɛ̈nydït nɔm. Ku aaye wal ŋïr nyuöp Bɛ̈nydït aya. Ago Luaŋdït jɔ thöl në yïk.

²⁶ Go Tholomon abëël wïïr dït piäät në Edhiongeber, të thiääk ke Elath në Wɛ̈ɛ̈r Thith yɔu, piny de Edom.

²⁷ Go melik Ɣiram Tholomon tuöc kɔckɛn ŋic abëël wïïr caath, ku ŋickï awɛɛŋ ke wɛ̈ɛ̈r bïk aa ger ëtök në kɔc ke Tholomon në abëël wïïr yiic

²⁸ Go abëël wïïr ɣet piny de Opir, ku yek Tholomon yiɛ̈n aguum kathiëër ku ŋuan 14,000 ke kilɔɔ gram ke adhääp.