1 Mel 6 - JAM DE NHIALIC 2011

Tholomon Ayïk Luaŋdït

¹ Ɣɔn cï bot kaŋuan ku thiërbɛ̈t ke run wan, në jäl ë kɔc ke Yithriɛl ë Rip, të wään ye Tholomon run ŋuan ë bäänyic piny de Yithriɛl, në pɛɛi ë rou, pɛɛi de Dhip, ke jɔ Luaŋdït gɔl ë yïk.

² Ɣön cï melik Tholomon yiɛ̈k Bɛ̈nydït, bɛ̈ɛ̈r de yen kɔ̈u thïn, aaye mitïïr kathiërrou ku dhorou, ku dït de yen yic aaye mitïïr kadhoŋuan, ku bɛ̈ɛ̈r de ke lɔ nhial ee mitïïr kathiëër ku diäk ku biäk.

³ Ku gɔ̈ɔ̈l nu ë yethok aye bɛ̈ɛ̈r de yen kɔ̈u mitïïr kaŋuan ku biäk, ku dït de yen yic ee mitïïr kadhoŋuan.

⁴ Ku lui Luaŋdït awëërnyïïn kor ril ëtör ë yekɔ̈u ëbɛ̈n.

⁵ Ku yïk ɣöt në kal ë pänydït kɔ̈u, ku wil tëɣeric në ɣöötdït de yiic aber ee yiic diäk ke ke lɔ nhial, ku adekï yiic ɣööt juëc.

⁶ Bɛ̈ɛ̈r de aber nu piny ke lɔ nhial ee mitïïr kaarou ku biäk, ku bɛ̈ɛ̈r de aber nu cil ee mitïïr kaarou ku biäk, ku bɛ̈ɛ̈r de aber nu nhial ee mitïïr kadiäk ku biäk. Ku päny de Luaŋdït në ɣööt yiic kedhie, aake yiu ë yiɛɛu yem piny, ago ɣööt jɔ röŋ në päny kɔ̈u apiɛth ke cïn nïn be ë yiɛ̈k ë kekɔ̈ɔ̈th.

⁷ Ku kur ë yïk ke Luaŋdït acï ke ŋiëc kiëët apiɛth tëdɛn ë lölë ke bei thïn, ka yïŋ de luaŋdït aa loi rɔt të cïn awuɔɔu de kake tuëŋ ye piŋ, ku ka ke thäth ë loi ë wëëth cït yiëp ke thɔn ë dëi.

⁸ Të ye kɔc lɔ thïn në aber ë ɣööt piny, anu ë biäk të lɔ wöuwic de Luaŋdït, ku ade yic kueer cï ŋɛp ye kɔc lɔ aber ë ciɛɛlic ku aber ë diäk.

⁹ Go melik Tholomon yïŋ de Luaŋdït jɔ thöl. Ku jɔ gëlic nhial në pɛɛm pätiic ë loi në tiim ke thidar.

¹⁰ Ku ade ɣööt kɔ̈k cï yiëk në päny de Luaŋdït kɔ̈u, në tiim ke thidar, bɛ̈ɛ̈r de ɣön tök ke lɔ nhial ee mitïïr kaarou ku biäk.

¹¹ Go Bɛ̈nydït jamë lɛ̈k Tholomon an,

¹² “Në biäk de Luaŋ yiɛ̈k ë Yɛn, na ye cath në wëëtdï yiic, ku ye luɔidï looi, ku ye lööŋkï muk kedhie ku cathë në keyiic, ke jamdï abä tɔ ye yic tëde yïn, jam wään cä lɛ̈k Debid wuur.

¹³ Yɛn bï rëër në mïth ke Yithriɛl yiic, ku Yɛn cïï kɔckiën ke Yithriɛl bï puɔ̈l.”

¹⁴ Go Tholomon Luaŋdït thöl në yïk.

Guiɛɛk de ka bïï Tääu ë Luaŋdïtic

¹⁵ Päny yic thïn gɔl në yiɛɛu piny leer ë ɣöt dol, aa kum kɔ̈u në pɛɛm ke tiim. Ɣöt dol kekë pänyde aa kum kɔ̈u në tiim ke thidar, ku kum yiɛɛude piny në tiim ke ameth.

¹⁶ Go ɣön thïn cɔl tëɣeric aläl yïk në luak thar ciëën. Bɛ̈ɛ̈rde ee mitïïr kadhoŋuan ku aa cï kumic në tim de thidar gɔl në yiɛɛude leer ë ɣöt dol.

¹⁷ Ku ɣön thiääk ke tëɣeric aläl aaye bɛ̈ɛ̈r de yen kɔ̈u mitïïr kathiëër ku bɛ̈t.

¹⁸ Ku tiim de thidar tɔ̈u thïn, acï ke guaŋ ke ke cït kec ku gɛk, acï ke looi në tiim de thidar kedhie acïnic kuur.

¹⁹ Go të bï athänduŋ de mät tääu thïn looi në ɣön nu tëɣeric thar ciëën.

²⁰ Tëɣeric tɔ̈u thïn aa ye bɛ̈ɛ̈rde mitïïr kadhoŋuan, ku dït de yen yic ee mitïïr kadhoŋuan, ku bɛ̈ɛ̈rde ke lɔ nhial ee mitïïr kadhoŋuan, ku acï Tholomon kum kɔ̈u ëbɛ̈n në adhäm awai. Yïk acï kum kɔ̈u në pɛɛm ke tim de thidar.

²¹ Go Luaŋdït yiuwic ëbɛ̈n thïn në adhäm awai, ku looi kuat athääp gël kueer lɔ tëɣericic thïn.

²² Na wën ke jɔ ɣöt yiuwic në athääp ëbɛ̈n, ayï yiu yïïŋ nu tëɣericic në adhääp.

²³ Ku në tëɣericic thar ciëën, Tholomon ë Cerubiim kaarou looi në tim de olip ku tɛ̈ɛ̈u thïn, bɛ̈ɛ̈r de tök ee mitïïr kaŋuan ku biäk.

^24-26 Wuök ke cerubiim tök rɛ̈ɛ̈r ke cï peer ee mitïïr kaŋuan ku biäk, ku wuök tök ee mitïïr kaarou ku biäk, ku Cerubiimkë kaarou akïtkï në bɛ̈ɛ̈r ku dït ë kɔ̈u.

²⁷ Tholomon acï cerubiim tääu në ɣön nu thar ciëënë yic ke ke rɛm röt piny Tëɣeric aläl, ku wuök ke cerubiim cïk peer kaarou ayek röt jak ɣötic cil, ku jak wuök kɔ̈kkë pɛ̈ɛ̈ny ke ɣöt.

²⁸ Wuök ke cerubiim kaarou acï ke kum kɔ̈ɔ̈th në adhääp.

²⁹ Pɛ̈ɛ̈ny ke ɣöt yic thïn ëbɛ̈n ku lɔ pɛ̈ɛ̈ny ke ɣöndïït nu thïn, acïï ke cerubiim cï guaŋë giɛɛt ë ke kɔ̈ɔ̈th, ku akööt ku lɔ gɛk cïï wal moc.

³⁰ Ku gɛk cïï wal moc ee ɣööt kë yiic kaarou acï ke kum kɔ̈ɔ̈th në adhääp.

³¹ Kueer ee lɔ tëɣericic, acï yiëk thïïk kaarou në tim de olip, ku ye liep në thook kadhïc.

³² Ku thookë, acïï ke cerubiim giɛɛt ë ke kɔ̈ɔ̈th, ku akööt ku gɛk, ku acï ke kum kɔ̈ɔ̈th në adhääp.

³³ Ku lui thook kaŋuan në tim de olip, thook ye ke lɔ thïn.

³⁴ Ku thook kaarou ë loi në tim de ameth, thoŋ tök ee nöök ë keyiic, ku liep e yic në rou ku matic.

³⁵ Ku acïï ke cerubiim giɛɛt ë ke kɔ̈ɔ̈th, ku akööt ku gɛk, ku acï ke kum kɔ̈ɔ̈th në adhääp.

³⁶ Pëër nu thïn në luaŋdït thok, aye aber töŋ de tim de thidar lɔ yiëk në abeer kɔ̈kkë kadiäk nïïm abeer ë yïk në kur cï guaŋ.

³⁷ Këërkëër ë Luaŋdït aa tɛ̈ɛ̈uwë piny në pɛɛi ë Dhip (yen cɔl Bilthii) në ruöön ye Tholomon run ŋuan në bääny yic.

³⁸ Na ɣɔn ë pɛɛi ë Bul (yen cɔl Akɔ̈nydït) në ruöön ye Tholomon run thiëër ku tök ë bääny yic, yen aa thöökë ë yïŋ de Luaŋdït kekë kake ëbɛ̈n në run kadhorouwiic.