1 Mel 4 - JAM DE NHIALIC 2011

Bäny ke Tholomon

¹ Tholomon aaye melik ë Yithriɛl ëbɛ̈n,

² ku kakë ayek bänykɛn dït nu ë luɔi nɔm: Adharia wën ë Dhadok ee bɛ̈ny de kake Nhialic

³ Ku Eliɣorep ku Aɣija, wɛ̈ɛ̈t ke Cica ayek göny gɔ̈ɔ̈r, ku Jeɣocapat wën Aɣilud amuk kake ciɛɛŋ

⁴ Ku Benaya wën ë Jeɣoyada ee bɛ̈ny ë rem de tɔŋ ku Dhadok ku Abiathar ayek bäny ke kake Nhialic

⁵ Ku Adharia wën ë Nathan acï tääu tueŋ ke ye bɛ̈ny nu në bäny mac wuöt nïïm ku Dhabut wën ë Nathan ee bɛ̈ny de kake Nhialic, ku ee cath ke melik

⁶ Aɣicar ee bɛ̈ny nu ë kɔc lui baai de melik nïïm ku Adoniram wën Abda, ee bɛ̈ny de kɔc ee luui në luɔi ril

⁷ Go Tholomon bäny kathiëër ku rou kuany bïk lui në Yithriɛlic ëbɛ̈n. Aake ye kacaam määtiic ë wuötken yiic, ku yïnkï ke melik baaide, raan tök në keyiic aaye këde pɛɛi tök ee ruöönic bɛ̈ɛ̈i.

⁸ Ku kakë ayek rin ke bäny kathiëër ku rou, ku wuötkɛn ye kek bäny thïn: Benɣur: arɛ̈ɛ̈r piny ë kuur de Eparaim

⁹ Bendeker: arɛ̈ɛ̈r ë Makadh ku Caalbim ku Beth Cemec ku Eelon ku Beth Ɣanan

¹⁰ Benɣethet: arɛ̈ɛ̈r në Aruboth, ku Thokoth ku piny de Ɣeper ëbɛ̈n.

¹¹ Benabinadap, raan cï nyan de Tholomon cɔl Tapath thiaak: arëër piny de Dor ëbɛ̈n

¹² Ku Baana wën Aɣilud: arɛ̈ɛ̈r në Taanak ku Megido, ku piny thiääk ke Beth Can ëbɛ̈n, tëthiääk ke wuun cɔl Dharethan, të lɔ rut në wun cɔl Jedhreel, leer wun cɔl Abel Meɣola ku wun cɔl Jokmiim.

¹³ Ku Bengeber: arɛ̈ɛ̈r ë Ramoth Giliyad, ade bɛ̈i ke Jayir de kuat de Manatha, ka tɔ̈u ë Giliyad ku piny de Arogob de Bacan, ayek pɛ̈ɛ̈nydït kathiërdhetem acï gël ëbɛ̈n, ku adekï thook kɛ̈l cï gäär në maläŋ

¹⁴ Ku Aɣinadap wën ë Yido: arɛ̈ɛ̈r ë Maɣanayim.

¹⁵ Ku Aɣimaadh wään cï nyan de tholomon cɔl Bathemath thiaak: arɛ̈ɛ̈r piny de Naptali

¹⁶ Ku Baana wën de Ɣucai: arɛ̈ɛ̈r piny de Acer ku wuöt ke Biiloth.

¹⁷ Ku Jeɣocapat wën ë Parua: arɛ̈ɛ̈r ë Yithakar

¹⁸ Ku Cimei wën de Ela: arɛ̈ɛ̈r ë Benjamin.

¹⁹ Ku Geber wën ë Yuri: arɛ̈ɛ̈r piny de Giliyad, piny wään cieŋë Thiɣon melik de Amor ku Og melik de Bacan Ku ade bɛ̈ny mac baai ëbɛ̈n, mɛ̈t kekë kɔckë kathiëër ku rou.

Kuɛth ë Bääny ë Tholomon

²⁰ Kɔc ke Juda ku Yithriɛl aake cï juëc abïk ciët liɛɛt ë wɛ̈ɛ̈r yɔu, aake ye cam ku dëkkï ku mitkï piɔ̈ɔ̈th.

²¹ Melik Tholomon aa mac ciɛɛŋ ëbɛ̈n, gɔl në wɛ̈ɛ̈r ë Yuparat lee piny de Pilithiin, ku ɣeet aken de Rip. Ku kɔc mɛc ëtɛ̈ɛ̈n ëbɛ̈n aake ye athölböden yiɛ̈n Tholomon ku yek luööi në akööl ɣɔn pïïr en ëbɛ̈n.

²² Ka ye cam ë kööl tök baai de melik Tholomon, aake ye kilɔɔ kathiërdiäk (30) ke aɣaar lɔ mot, ku kilɔɔ kathiërdhetem ke aɣar ye cam.

²³ Ku miöör cuai kathiëër, ku miöör atiëëk kathiërrou, ku bɔt de amɛ̈l ku bɔɔth ayï keu ku ŋeer ku diɛt cuɛi.

²⁴ Tholomon aa mac piny ëbɛ̈n, gɔl në aköl athɛ̈i de wɛ̈ɛ̈r ë Yuparat në Tipatha ɣeet Gadha, ku meliik ë mac ëtɛ̈ɛ̈n kedhie aake ye yen luööi ku piŋkï thok, ku aa de mät ke wuöt thiääk në yen ëbɛ̈n.

²⁵ Në kaam ɣɔn pïïr ë Tholomon, Juda ëbɛ̈n, ku Yithriɛl aa rɛ̈ɛ̈r ë mätic ku cïn riɔ̈ɔ̈c. Gɔl në Dan ɣeet Biirceba, baai tök ee nɔm dɛ dom ë tiim ke ŋaapde.

²⁶ Tholomon aa de nɔm bot kathiërŋuan 40,000 ke jöŋgöör ke abëël, ku bot kathiëër ku rou 12,000 ke röör ee cath ë jöŋgöör kɔ̈ɔ̈th.

²⁷ Ku bänykɛn mac wuöt ëbɛ̈n kathiërrou, raan ëbɛ̈n në pɛɛi töŋdɛn cï mäc en ë ruöönic, ee këcam cï määtic yiɛ̈n melik kekë baaide.

²⁸ Bɛ̈ny töŋ ë baai aaye biäkde bɛ̈ɛ̈i në wal ye jöŋgöör ke nyuööth, ku barli ku aguöt të kɔɔrë ke thïn,

²⁹ Nhialic ë Tholomon gäm pɛlënɔm dït ku ŋïny de käŋ, cïï themë thok.

³⁰ Tholomon aa pelnɔm awär kɔc pelnïïm nu aköl amiäk ku Rip ëbɛ̈n.

³¹ Ee yen raan töŋ ë pelnɔm në kɔc pelnïïm yiic ëbɛ̈n, awär yï: Ethan raan wun ë Edhera, ku Ɣeman ku Kalcol, ku Darda wɛ̈ɛ̈t ke Maɣol. Tïc ë rinke ë thiëi në juöör cï ke tuɔɔk yiic ëbɛ̈n.

³² Acï aguum kadiäk 3000 ke kɛ̈ŋ cak, ku ka wär agum 1000 ë diɛt.

³³ Aa ye jam në baŋ de këriëëc ee cil piny ëbɛ̈n, gɔl në tiim ke thidar de Lebanɔn ale gut në ɣathop ee cil në kal kɔ̈u. Ku aaye jam aya në biäk ë läi, ku diɛt ku kak ee mol piny, ku rec wïïr.

³⁴ Ku meliik ke juöör ëbɛ̈n aake ye kɔcken tuööc bïk pɛlënɔm de Tholomon bɛ̈n piŋ.