1 Mel 3 - JAM DE NHIALIC 2011

Tholomon Aläŋ Pɛlënɔm

¹ Go Tholomon män ë thiëëk looi kekë melik de Rip, ku nööm nyan ë melik. Go bɛ̈ɛ̈i Pänydït de Debid, agut të bï ë ɣöndɛn ë melik thök në yïk, ku Luaŋdït ku päny wil Jeruthalem kɔ̈u.

² Kɔc ke Yithriɛl aake ye Nhialic näk në ɣään thöny nïïm në kë cïn en Luaŋdït ë cï yïk në rin ke Bɛ̈nydït.

³ Go Tholomon Bɛ̈nydït nhiaar, ku ye cath në wël ke Debid wuniic, ku aaye miɔ̈c näk ku wal ŋïr gam në ɣään ke läm yiic ayadäŋ.

⁴ Në akööl kɔ̈k go melik lɔ Gibiɔn bïï Nhialic lɔ näk, në baŋ nu ë yïïŋ de naamde ëtɛ̈ɛ̈n. Acï bot ke miɔ̈c ye nyop ëbɛ̈n kɔn gam ëtɛ̈ɛ̈n wään tueŋ.

⁵ Na ɣɔn wakɔ̈u go Bɛ̈nydït tuöl tëde Tholomon ë Gibiɔn ke ye nyuöth, lueel an, “Eeŋö bä lip kë bä gäm yïn?”

⁶ Go Tholomon bɛ̈ɛ̈r an, “Yïn cï nhiëër agɔk nyuöth wäär Debid raanduön ee Yï luööi, cït man ee yen cath ë kuɛɛrku yiic në yic, ku në piathëpiɔ̈u. Yïn ŋoot ke Yï döt nhiëërduön agɔk wekë yen, në kë cïï Yïn en yiɛ̈n mɛwä bï nyuc në thöönyde nɔm, cït ee köölë.

⁷ Bɛ̈nydït Nhialicdï, Yïn cï lïmdu tɔ ye melik, në nyin ë wäär Debid, ku yɛn ee meth tei, mɛnh kuc lɔ biic ku bɛ̈n thïn.

⁸ Ku lïmdu anu ë kɔciic cil, kɔc cï lɔc, kɔc juëc arëët kɔc cïï duëërë ŋic nyïïn, ku cïï ke lëu në kuɛ̈n.

⁹ Yen gëm Yïn lïmdu piɔ̈n ee käŋ ŋic, bä löŋ ë kɔcku ŋiëc aa guiir, bä kërac aa ŋic ku ŋiɛc këpiɛth, eeŋa duëër ë kɔckuön juëckë lëu në mäc?”

¹⁰ Jamë ë Bɛ̈nydït tɔ mit piɔ̈u, në kë cï Tholomon ee kënë lip,

¹¹ go Nhialic lɛ̈k en an, “Në luɔi cï yïn ee kënë lip ke cie juëc ë run bï yïn ke pïïr kek lip, ku cie juëc ë käŋ, ku cie thon ë kɔc ke aterdu, ku kɔɔr ŋïny bï yïn käŋ aa ŋic, bä löŋ ëbɛ̈n ŋiëc aa guiir,

¹² Yɛn bï kë cï kɔɔr looi. Yïn bä gäm pɛlënɔm, ku piɔ̈n ee käŋ yök yiic, ka bï ciën raan töŋ bï ciët yïn ɣɔn ë yïnɔm tueŋ, ku acïn raan däŋ bï bɛ ciët yïn.

¹³ Ku yïn cä yiɛ̈n kë kɛ̈në kɔɔr aya, juëc de käŋ, ku riëëu, ku abï ciën melik cït yïn ë meliik yiic në aköölku yiic kedhie.

¹⁴ Ku të bï yïn aa cath ë kuɛɛrkï yiic, ku bä jamdï ku lööŋkï ya döt cït man ɣɔn ee wuur Debid cath, ke Yɛn bï aköölku ŋuak nyïïn.

¹⁵ Na wën ke Tholomon ë jɔ pääc, ago yök nɔn cï Nhialic jam ke yen ë nyuöth yic. Go lɔ Jeruthalem, ku kɛ̈ɛ̈c në Athänduŋ de Bɛ̈nydït nɔm, ku gëm Bɛ̈nydït miɔ̈c ye nyop ëbɛ̈n, ku miɔ̈c de mät. Ku jɔ bänyke kedhie luöi këcamdït.

Tholomon Aguiir Gööny Rilic

¹⁶ Na wën ke diëër akɔɔrröör kaarou ke ke bɔ̈ tëde melik Tholomon bïkkï ku kɛ̈ɛ̈ckï ë yenɔm.

¹⁷ Go tiiŋ tök lueel tiiŋ an, “Yïn bɛ̈nydï, wok ceŋ ɣön tök wokë tiiŋë, guɔ dhiëth ë mɛwä ke ŋoot ke rɛ̈ɛ̈r baai ke yɛn.

¹⁸ Na lɔ nïn kadiäk tëëk, ke dhiëth aya në wënde. Aa ye wook waarou ɣööt.

¹⁹ Ku thou mɛnh ë tiiŋë wakɔ̈u në min cï en e miɛnic ke dal ë nïnic.

²⁰ Na wën ke jɔt rɔt ë wɛ̈ɛ̈ric cil, ku jɔt wëndï ë ya yɔu ke nyan lïmdu aa ŋoot ke nin, ku le tääu ë ye yɔu, ku tɛ̈ɛ̈c mɛnhdɛn cï thou ë ya yɔu.

²¹ Na wën a jat rɔt ɣɔn amiäk bä mɛnhdï bɛ̈n tɔ thuët, ke tiëŋ acï thou, na wën aa la ye gɔɔk guöp apiɛth ɣɔn amiäk ke yɔ̈k ke cie wëndiën cä dhiëëth.”

²² Go tiiŋ däŋë lueel an, “Ei mɛnh pïïr ee wëndï, ku kë cï thouwë ee wëndu!” Ku lueel ë tiiŋ tueŋë an, “Ei kë cï thou ee wëndu, ku mɛnh pïïrë ee wëndï!” Agokï jɔ teer ë melik nɔm.

²³ Go melik Tholomon lueel an, “Aye ŋɛk lueel an ee wëndï ë kë pïïrë, ku wëndu ka cï thouwë, ku lueel ŋɛk an, Ei, wëndu ka cï thouwë, ku wëndï ka kë pïïrë.”

²⁴ Go melik lueel an, yiënkï yɛn abätäu, ago abätäu lɔ bɛ̈ɛ̈i ë melik nɔm,

²⁵ go melik lueel an, “Tɛkkï mɛnh pïïr ë rou, gɛ̈më ŋɛk biäk ku gɛ̈më ŋɛk biäk.”

²⁶ Go tiiŋ wën pïïr ë mɛnhde ë yic, piɔ̈u kok ke mɛnhde arëët go melik yɔ̈ɔ̈k an, “Yïn bɛ̈nydï, gämë mɛnh pïïr raanë, ku du nɔ̈k!” Ku lueel ë tiiŋ däŋë an, “Acï bï ya këdï ku cie këdu, meth abïï tekic ë rou.”

²⁷ Na wën ke puk melik nɔm an, “Gämkï mɛnh pïïr tiiŋ tueŋë, duökï näk, ee mɛnhde ë yic.”

²⁸ Go Yithriɛl ëbɛ̈n guiëër cïï melik Tholomon löŋ ŋiëc guiir piŋ, gokï melik jɔ riëëu, në tïŋ cïï kek e tïŋ nɔn ciɛthë pɛlënɔm ë Nhialic ke yen, ku bï löŋ aa guiir ë yic.